ހދ. ހަނިމާދޫ އެއާޕޯޓް ތަރައްގީކުރަން ބޭނުންވެގެން ޕްލޭނިން މިނިސްޓްރީން އެދިފައި ވަނީ މާބޮޑު ބިމަކަށް ކަމަށާއި އެވަރުގެ ބިމެއް ދޭން ކައުންސިލުން ބޭނުން ނުވާ ކަން މިރޭ ހާމަކޮށްފި އެވެ.
ޕްލޭނިން މިނިސްޓްރީން އެދިފައި އޮތީ އާޕޯޓް ސަރަހައްދުން 853،937 އަކަފޫޓުގެ ބިމެއް ހަމަޖައްސައި ދިނުމަށެވެ. މިކަމުގެ ފަހަތުގައި އޮތީ، އެ ބިމުން އިންޑިއާގެ މިލިޓަރީއަށް ފުރުސަތު ދިނުން ކަމުގެ ތުހުމަތާ އެކު މައްސަލަ އޮތީ ބޮޑުވެފަ އެވެ.
ހަނިމާދޫ އެއާޕޯޓު ޒަމާނީ ފެންވަރަށް ތަރައްގީކުރުމަކީ އިންޑިއާގެ 800 މިލިއަން ޑޮލަރުގެ ލައިން އޮފް ކްރެޑިޓް ފެސިލިޓީން ފަންޑުކުރާ މަޝްރޫއެކެވެ. އެ މަޝްރޫއަށް 85 މިލިއަން ޑޮލަރު ނުވަތަ 1.3 ބިލިއަން ރުފިޔާ ހޭދަވާނެ ކަމަށް ފިނޭންސް މިނިސްޓްރީން ބުނެ އެވެ. އެ އެއާޕޯޓް ތަރައްގީ ކުރަން ވެސް ހަވާލުކުރަނީ ލޯން ދޭ އިންޑިއާގެ ކުންފުންޏަކާ އެވެ.
ހަނިމާދޫ ކައުންސިލުން މިރޭ ނެރުނު ބަޔާނެއްގައި ބުނީ އެއާޕޯޓާ ގުޅޭ ބިމާ ބެހޭ ގޮތުން ވަކި ބަޔަކު އިސްނަގައިގެން ދޮގު މައުލޫމާތު ފަތުރަމުންދާ ކަމަށެވެ. ސަރުކާރުން އެދުނު ގޮތަށް ބިން ހަމަޖައްސައިދިނުމާ ދެކޮޅަށް ޕެޓިޝަނެއްގައި ސޮއިކުރުމުގެ އިތުރުން ރޭ އެ ރަށުގައި އިހްތިޖާޖުކޮށްފައިވެ އެވެ.
ކައުންސިލުން ބުނިގޮތުގައި އެއާޕޯޓްތަރައްގީ އަށް ބޭނުންވެގެން ހަމަޖައްސައިދޭން އެދި ފޮނުވާފައިވާ ލިއުންތަކުން ހާމަވާން އޮތް ގޮތުގައި މިހާރު އޮތް އެއާޕޯޓުގެ ނަރުދަލުން ފެށިގެން ކަނޑައަޅާފައިވާ ބިމަކީ ބޮޑު ބިމެކެވެ.
"އެ ލިޔެކިޔުންތައް ބަލައި އެ ބިމާ މެދު މި ކައުންސިލުން ވެސް ކަންބޮޑުވިކަން ފާހަގަކުރަމެވެ،" ބަޔާނުގައިވެ އެވެ.
ކައުންސިލްގެ އިތުރުން ރައްޔިތުންގެ ކަންބޮޑުވުން އިންތިހާއަށް ހުރި ކަން ޕްލޭނިން މިނިސްޓްރީގެ ސަމާލުކަމަށް ގެނެސްފައިވާ ކަމަށް ބަޔާނުގައިވެ އެވެ. މިހާރު މަޝްވަރާކުރަމުން އަންނަނީ އެ ވަރުގެ ބިމެއް ދޭން ހުރި ކަންބޮޑުވުންތަކާ ގުޅޭ ގޮތުން ކަމަށް ކައުންސިލުން ބުންޏެވެ.
"މިނިސްޓްރީއާ ވާހަކަ ދައްކަމުން މިގެންދަނީ އެވަރުގެ ބިމެއް ނުދީ ނުވަތަ މިނިސްޓްރީން އެދިލައްވާ ބިން ވީހާވެސް ކުޑަކޮށް އެއާޕޯޓް ތަރައްގީގެ މަޝްރޫއަށް އިތުރުކޮށް އެއާޕޯޓް ތަރައްގީގެ މަޝްރޫއު ނުހުއްޓި ކުރިއަށް ގެންދިއުމަށެވެ،" ކައުންސިލްގެ ބަޔާނުގައިވެ އެވެ.
މިކަން ނުނިމެނީސް ކައުންސިލުން ވަކިގޮތަކަށް ނިންމައިފި ކަމަށް ކުރާ ތުހުމަތުތަކުގައި ހަގީގަތެއް ނެތް ކަމުގެ ޔަގީންކަން ދީފައި ވެ އެވެ.
ކައުންސިލުން ބޭނުން ވަނީ މިނިސްޓްރީން އެދުނު މިންވަރަށް ވުރެން ކުޑަކޮށް ބިން ހަމަޖައްސައިދޭށެވެ. އެކަން ޕްލޭނިން މިނިސްޓްރީއަށް އަންގައި މަޝްވަރާތައް ވަނީ ފަށައިފަ އެވެ.
މިހެން މިކަން ހިނގަނިކޮށް ފިތުނަ އުފައްދަން ވާހަކަ ފަތުރައި، ކައުންސިލަރުން ބަދުނާމުވާގޮތަށް ފޮޓޯ އާއްމުކޮށް ވާހަކަ ފަތުރާތީ ކައުންސިލުން ވަނީ ކަންބޮޑުވުންފާޅުކޮށްފަ އެވެ. ހަގީގަތާ ހިލާފު ވާހަކަތަކުން ރައްޔިތުންގެ ފިތުނަ އުފެއްދުން ފަދަ ކަންކަން ނުކުރަން ވަނީ އިލްތިމާސްކޮށްފަ އެވެ.
ސަރުކާރުން ބުނެފައިވާ ގޮތުގައި އެއާޕޯޓް ސަރަހައްދަށް ބިން ހޯދަން އެދިފައި ވަނީ އެންމެ ބޮޑެތި މަތިންދާ ބޯޓު ޖައްސާވަރަށް ރަންވޭ ތަރައްގީ ކުރާށެވެ. ރަންވޭ ބޮޑު ކުރުމުގެ އިތުރުން ސިފައިންގެ މައި މަރުކަޒެއް ވެސް ހޯދަން އެދިފައިވާ ބިމުގައި އަޅަން ނިންމާފައިވާ ކަމަށާ އެއީ އިންޑިއާ މީހުން ތިބެން ކަނޑައަޅާ ބިމެއް ނޫން ކަމަށް އިކޮނޮމިކް މިނިސްޓަރު ފައްޔާޒް އިސްމާއިލް ވަނީ ވިދާޅުވެފަ އެވެ.
"އެ ވިދާޅުވާ 8،50،000 އަކަފޫޓަކީ އޭގެ ތެރެއިން އެއްބަޔަކީ އެއާޕޯޓް އެކްސްޓެންޝަނަށް ބާއްވާފައި އޮތް ބައެއް. އަނެއް ބަޔަކީ އެނގިވަޑައިގަންނަވާނެ އެމްއެންޑީއެފްގެ ނޮދަން ކޮމާންޑް ސެންޓަރު މިހާރު މާފިލާފުށިން އެއްކޮށް ހަނިމާދޫއަށް ބަދަލު ކުރުމުގެ ވިސްނުން އެބޭފުޅުންގެ ހުރީ،" ފައްޔާޒް ވިދާޅުވި އެވެ.
އޭނާ ވިދާޅުވެފައިވާ ގޮތުގައި ބިން ދޫކުރުން އޮތީ ކައުންސިލްގެ އަތްމަތީގަ އެވެ. ކޮންމެ ނިންމުމެއް ނިންމި ނަމަވެސް މައްސަލައެއް ނެތް ކަމަށް ވެސް ވިދާޅުވެފައިވެ އެވެ.
