މިސްކިތްތަކުގެ ހުރަމަތްކެނޑޭގޮތަށް އެތަނުގެ ތެރޭގައި މަސްތަކުވާތަކެތި ބޭނުންކޮށް، ކައިބޮއި ނިދާ ހަދާތީ، އެކަން ހުއްޓުވަން އިދިކޮޅުގެ ފަރާތުން ރައްޔިތުންގެ މަޖިލީހަށް މައްސަލައެއް ހުށަހަޅައިފި އެވެ.
ކޮވިޑްގެ ފިޔަވަޅުތައް ވަރުގަދަ ކުރުމުގެ ގޮތުން މިހާރު މާލޭ ސަރަހައްދުގެ ހުރިހާ މިސްކިތްތައް ވަނީ ބަންދުކޮށްފަ އެވެ. ނަމަވެސް، މިސްކިތްތަކަށް ވަދެ، ނިދައި މަސްތުވާން މީހުން ތިބޭ ކަމުގެ ޝަކުވާތައް ބޮޑުވި އެވެ.
އެކަމާ ގުޅިގެން ގިނަ ބަޔަކު ހައްޔަރު ވެސް ކޮށްފައިވަނިކޮށް، މަޑުއްވަރީ ދާއިރާގެ އިދިކޮޅު މެމްބަރު އާދަމް ޝަރީފް މިއަދު އެ މައްސަލަ ހުށަހަޅުއްވަމުން ވިދާޅުވީ މިސްކިތްތަކަށް ވަދެ، އެތަނުގެ ތެރޭގައި މަސްތުވެ، ކައިބޮއެ، ނިދައި ފެންވަރައި، މިސްކިތްތަކުގެ ހުރުމަތްކެނޑުން އާއްމުވެފައިވާ ކަމަށެވެ.
އެހެންކަމުން، އެ މައްސަލާގައި ވަނީ މިސްކިތްތައް ބެލެހެއްޓުމުގެ އިންތިޒާމް މިހާރަށް ވުރެ ހަރުދަނާކޮށް، އެތަންތަނުގެ ހުރުމަތްކެނޑުން ހުއްޓުވަން ސަރުކާރަށް ގޮވާލައިފަ އެވެ.
އެ މައްސަލަ ބަލައިގަތުމާމެދު ނެގުނު ވޯޓުގައި، އެ މައްސަލަ ބަލައިގަނެ، ބަހުސްކުރަން ފާސްކުރީ 31 މެމްބަރުންގެ ވޯޓާއެކު އެވެ. އެ މައްސަލައިގައި ބަހުސްކުރަން ނުފެންނަ ކަމަށް ދެ މެމްބަރަކު ވޯޓު ދެއްވިއިރު، ވަކި ގޮތަކަށް ވޯޓު ނުދެއްވާ ދެ މެމްބަރުން ވެސް ތިއްބެވި އެވެ.
އެ މައްސަލަ ބަލައިގަތުމަށްފަހު ވާހަކަ ދައްކަވަމުން އާދަމް ޝަރީފް ވިދާޅުވީ މިސްކިތްތަކުގެ ތެރޭގައި ހުންނަ ހަތިމުތަކުގެ އެތެރޭގައި މަސްތުވާތަކެތި ފޮރުވައި، އެތަންތަނުގެ ތެރޭގައި ނޭއްގާނީ އެތައް ކަމެއް ކުރަމުންދާ ކަމަށެވެ.
ކޮވިޑުގެ އުނދަގޫ ހާލަތު ނަމަވެސް، މިސްކިތްތަކުގެ ކަންކަން ބެލެހެއްޓުމުގައި މިހާރަށް ވުރެ ހަރުދަނާ އުސޫލެއް ސަރުކާރުން ގާއިމުކުރަންޖެހޭ ކަމަށް އޭނާ ވިދާޅުވި އެވެ.
އިތުރަށް ވިދާޅުވީ މުޖުތަމައުގެ ތެރޭގައި އެފަދަ މައްސަލަތައް ހައްލުނުކުރޭވެނަމަ، އަންނަން އޮތް ޖީލުތަކާ ހަމައަށް އިސްލާމްދީން ދަމަހައްޓަން ދަތިވާނެ ކަމަށެވެ. އެހެންކަމުން ކަމާގުޅޭ ހުރިހާ މުއައްސަސާތަކެއް ގުޅިގެން މި މައްސަލައަށް އަވަސް ހައްލެއް ހޯދަން އޭނާ ގޮވާލެއްވި އެވެ.
އެ ބަހުސްގައި ވާހަކަ ދައްކަވަމުން އައްޑޫ މީދޫ ދާއިރާގެ މެމްބަރު ރޮޒެއިނާ އާދަމް ވިދާޅުވީ ރޭގެ ވަގުތެއްގައި ވެސް ހުޅުމާލޭގެ މިސްކިތެއްގެ ތެރޭގައި ބަޔަކު މާރާމާރީ ހިންގާ ވީޑިއޯއެއް އާއްމުވެފައިވާއިރު، އެކަން މިހާރުން މިހާރަށް ހުއްޓުވެންޖެހޭ ކަމަށެވެ.
އޭނާ ވިދާޅުވި ގޮތުގައި މިފަދަ މައްސަލަތަކުގައި ސިޔާސީ ޕާޓީތަކުގެ މެދުގައި އޮންނަ ހިޔާލު ތަފާތުވުންތަކާއި ވާދަވެރިކަން އެއް ފަރާތްކޮށް، ގައުމީ ކަމެއްގެ ގޮތުގައި ދެކުން މުހިއްމު ކަމަށެވެ.
"ގައުމީ އެއްވެސް ކަމެއް މިހާރު ނޯވޭ. ސަރުކާރުން ކުރާ ކަމެއް ވެއްޖެއްޔާ އިދިކޮޅު ފަރާތްތަކަށް ރަނގަޅެއް ނުވޭ. އަދި އެހެން ބަޔަކު ކުރާ ކަމެއް ވިއްޔާ އަޅުގަނޑުމެންނަށް ކަމަކުނުދޭ،" ރޮޒެއިނާ ވިދާޅުވި އެވެ.
އެ ހިޔާލުތަފާތުވުންތަކުގެ ތެރެއިން އެކަމުގެ ނާޖާއިޒު ފައިދާ ނަގައި، ގައުމު ހަލަބޮލިކޮށްލުމުގެ ފުރުސަތު ލިބޭކަމަށް އޭނާ ވިދާޅުވި އެވެ.
ކުޑަހުވަދޫ ދާއިރާގެ މެމްބަރު އަހުމަދު އާމިރު ވިދާޅުވީ ސައްތައިންސައްތަ މުސްލިމު ގައުމެއްގައި މިފަދަ ކަންކަން ހިނގުމަކީ ވަރަށް ސީރިއަސް މައްސަލައެއް ކަމަށެވެ.
