ބެކްކޮކް، ތައިލޭންޑް (ޖޫން 22) - ފަތުރުވެރިންގެ މެދުގައި މަގްބޫލު ފުކެޓަށް ކަރަންޓީނު ކުރުމެއް ނެތި ދަތުރު ކުރެވޭނެ ގޮތް ހަދަން ނިންމައިފި އެވެ.
ކޮވިޑާ ގުޅިގެން ތައިލޭންޑުން ވަނީ އެ ގައުމަށް އެތެރެވުމުގައި ހަރުކަށި ފިޔަވަޅުތަކެއް އަޅާފަ އެވެ. އޭގެ ސަބަބުން 1997 ވަނަ އަހަރަށް ފަހު އިގްތިސާދަށް ގެއްލުން ނުވާ މިންވަރަށް ވަނީ ގެއްލުންވެފަ އެވެ.
ތައިލޭންޑުގެ އިގްތިސާދަށް މުހިއްމު ފަތުރުވެރިކަމުގެ ސިނާއަތް އަލުން ފެށުމުގެ ވިސްނުމުގެ ތެރެއިން މިދިޔަ މާޗް މަހު "ފުކެޓް ސޭންޑްބޮކްސް" ގެ ވާހަކަ ސަރުކާރުން ދައްކަން ފެށި އެވެ.
އެ ސްކީމަކީ ވެކްސިން ފުރިހަމަކޮށްފައިވާ ފަތުރުވެރިންނަށް ދެ ހަފްތާ ކަރަންޓީނުގައި މަޑު ކުރުމެއް ނެތި ފުކެޓަށް ދަތުރު ކުރެވޭނެ ގޮތް މަގުފަހިވާ ސްކީމެކެވެ.
ނަމަވެސް މިދިޔަ އޭޕްރިލް މަހު ކޮވިޑުގެ ތިން ވަނަ ރާޅެއް އައުމާ ގުޅިގެން އެ ސްކީމް ތަންފީޒު ކުރުން މަޑުޖައްސާލަން މަޖުބޫރުވި އެވެ.
އެކަމަކު ކަމާ ބެހޭ އިދާރާތަކުން މިދިޔަ ހުކުރު ދުވަހު ބުނީ ޖުލައި އެއް ވަނަ ދުވަހުން ފެށިގެން ސޭންޑްބޮކްސް ސްކީމް ތަންފީޒު ކުރަމުން ދާނެ ކަމަށެވެ.
ފުކެޓްގެ އިތުރުން ތައިލޭންޑަށް ދާ ފަތުރުވެރިންގެ މެދުގައި މަގްބޫލު އެހެން ސަރަހައްދުތަކަށް ވެސް އެ ސްކީމުގެ ދަށުން ޒިޔާރަތް ކުރެވޭނެ އެވެ. އޭގެ ތެރޭގައި ކޮ ސަމުއި އާއި ކޮ ފަނަގަން އާއި ކޮ ޓާއޯ ހިމެނެ އެވެ.
ކަރަންޓީނާ ނުލާ ފަތުރުވެރިންނަށް އެ ތަންތަނަށް ދެވޭނީ ކޮވިޑް ކޭސްތައް މަދުކޮށް ހިފެހެއްޓޭ ނަމަ އެވެ. އެގޮތުން ފުކެޓްގައި ހަފްތާއަކު 90 ކޭސްއަށް ވުރެ ގިނައިން ފެންނަ ނަމަ ސްކީމް މެދުކަނޑާލާނެ އެވެ.
ތައިލޭންޑުގެ އާމްދަނީގެ 20 ޕަސެންޓު ހޯދަނީ ފަތުރުވެރިކަމުންނެވެ. ފަތުރުވެރިކަމަށް އައި ހީނަރުކަމުގެ އަސަރު ވަނީ އެހެން ދާއިރާތަކަށް ވެސް ވަރަށް ބޮޑަށް ކޮށްފަ އެވެ.
