ރަހީނުކޮށްގެން ގެންގުޅުމަށްފަހު، މަރާލައި މޫދަށް އެއްލާލި ކުއްޖާގެ ޕޯސްޓްމޯޓަމް ހަދަން ފުލުހުން ނިންމައިފި އެވެ.
ކުއްޖާގެ ޕޯސްޓްމޯޓަމް ހެދުމަށް އޭނާގެ ހަށިގަނޑު ބޭރަށް ފޮނުވާނެ ވަކި އިރެއް ފުލުހުން ނުބުނެ އެވެ.
އެ ކުއްޖާގެ ހަށިގަނޑު ފުލުހުން ހޯދާފައިވަނީ ހުޅުމާލޭ ދެވަނަ ފިޔަވަހީގެ މޫދުގައި އޮއްވަ އެވެ. އެ ހަށިގަނޑު މިހާރު އައިޖީއެމްއެޗްގައި އޮތްއިރު އޭނާއަށް އަނިޔާކޮށްފައިވާ ކަމުގެ ނިޝާންތައް ހަށިގަނޑުގައި ހުރި ކަމަށް އެނގިފައިވެ އެވެ.
ފުލުހުންގެ މީޑިއާ އޮފިޝަލް ވިދާޅުވި ގޮތުގައި، ކުއްޖާ މަރާލާފައި އޮތްވައި ފެނުނީ އެ ކުއްޖާ ރަހީނުކޮށްފައިވާ ކަމަށް މިދިޔަ އާދީއްތަ ދުވަހު ރިޕޯޓްކުރުމާ ގުޅިގެން އެ ކުއްޖާ ހޯދަމުން ދަނިކޮށް ކަމަށެވެ.
އެ މައްސަލައިގެ ތުހުމަތަށް 17 އަހަރުގެ ދިވެހި ފިރިހެން ކުއްޖެއްގެ އިތުރުން 27 އަހަރުގެ ދިވެހި ފިރިހެނަކު ވަނީ ހައްޔަރުކޮށްފަ އެވެ.
