ވޮޝިންޓަން، އެމެރިކާ (ޖޫން 22) - ތާލިބާނުން ހޯދަމުންދާ ކުރިއެރުންތަކާ ގުޅިގެން އެމެރިކާ ސިފައިން އަފްގާނިސްތާނުން ފޭބުން މަޑުޖައްސާލަން ޖެހިދާނެ ކަމަށް ޕެންޓަގަންގެ ތަރުޖަމާނު ޖޯން ކާބީ ވިދާޅުވެއްޖެ އެވެ.
އެމެރިކާގެ ރައީސް ޖޯ ބައިޑެން ނިންމަވާފައިވަނީ ސެޕްޓެމްބަރު 11 ގެ ކުރިން ހުރިހާ ސިފައިން އަނބުރާ ގައުމަށް ގެންދިޔުމަށެވެ. ކާބީ ވިދާޅުވީ އެ ސުންގަޑި އެގޮތަށް އޮތް ނަމަވެސް، ޝަރުތުތަކާއެކު މަސައްކަތް މަޑުޖައްސާލަން ޖެހުން އެކަށީގެންވާ ކަމަށެވެ.
"ތާލިބާނުން ހަމަލާ އިތުރުކޮށް، ޑިސްޓްރިކްޓުތައް ހިފައި، ހަމަނުޖެހުން ބޮޑުވާ ވަރަކަށް އަފްގާނިސްތާނުގެ ހާލަތު ދަނީ ބަދަލުވަމުން،" ކާބީ ވިދާޅުވި އެވެ.
އޭނާ ވިދާޅުވީ އަފްގާނިސްތާނުން އެމެރިކާ ސިފައިން ފޭބުމާ ގުޅޭ ނިންމުންތައް ނިންމަނީ "ރިއަލް ޓައިމްގައި" ކަމަށާއި ހާލަތު ބަދަލުވާ ވަރަކަށް ނިންމުންތަކަށް ބަދަލު އަންނާނެ ކަމަށެވެ.
މިދިޔަ ހަފްތާގައި ޕެންޓަގަންގެ އޮފިޝަލުން ބުނީ އަފްގާނިސްތާނުގައި ތިބި ސިފައިން އަނބުރާ ގެންދިޔުމުގެ މަސައްކަތުގެ ދެބައިކޮށްފައި އެއްބައި މިހާރު އެއްކޮށް ނިމިފައިވާ ކަމަށެވެ.
ސިފައިން އަނބުރާ ގައުމަށް ގެނައުމަށް ބައިޑެން އަމުރު ކުރެއްވިއިރު، 2،500 ސިފައިންނާއި އެމެރިކާގެ ރައްޔިތުންގެ ތެރެއިން 16،000 ކޮންޓްރެކްޓަރުން އަފްގާނިސްތާނުގައި އުޅެމުން ދިޔަ އެވެ.
މުހިއްމު މަރުކަޒުތަކެއް އަފްގާން ސިފައިންނާ ހަވާލުކޮށްފައި ވާއިރު، ގިނަ އަދަދެއްގެ މުދާ ވެސް މިހާރު ވަނީ އަނބުރާ އެމެރިކާއަށް ފޮނުވާފަ އެވެ.
މި މަސައްކަތް ކުރިއަށް ދާއިރު ވެސް އެމެރިކާ ސިފައިން ދަނީ ތާލިބާނުންނާ ދެކޮޅަށް އަފްގާން ސިފައިންނަށް އެއްބާރުލުން ދެމުން ކަމަށް ކާބީ ފާހަގަކުރެއްވި އެވެ.
