ތެލް އަވީވް، އިޒްރޭލް (ޖޫން 20) - އިރާނުގެ އާ ރައީސްކަމުގެ މަގާމަށް އަލްޓްރާ ކޮންޒަވޭޓިވް އިބްރާހިމް ރައިސީ އިންތިހާބުވެ ވަޑައިގެންނެވުމުން ބައިނަލްއަގްވާމީ މުޖުތަމައިން ކަންބޮޑުވާން ޖެހޭ ކަމަށް އިޒްރޭލުން ބުނެފި އެވެ.
ރައިސީ އަކީ "އަސްކަރީ ނިއުކްލިއަ ޕްރޮގްރާމް ފުޅާކުރަން" ބޭނުންވެ ވަޑައިގަންނަވާ ލީޑަރެއް ކަން ފާހަގަކޮށް، އިޒްރޭލުން ބުނީ އިންތިހާބުގެ ނަތީޖާއިން ހާމަވަނީ އިރާނުގެ "ހަގީގީ ނިޔަތް" ކަމަށެވެ.
އިޒްރޭލުގެ ފޮރިން މިނިސްޓްރީގެ ތަރުޖަމާނު ލިއޯ ހަޔަތް ކުރެއްވި ޓްވީޓެއްގައި ރައިސީ ސިފަކުރެއްވީ އިރާނުން މިހާތަނަށް އިންތިހާބު ކުރި "އެންމެ ހަރުކަށި ރައީސް" ގެ ގޮތުގަ އެވެ.
އިރާނާއި ދުނިޔޭގެ އެހެން ބާރުގަދަ ގައުމުތަކާ ދެމެދު 2015 ވަނަ އަހަރު އެކުލަވާލި ނިއުކްލިއާ އެއްބަސްވުމާ އިޒްރޭލުން ދެކޮޅެވެ. އެ އެއްބަސްވުމުގެ ދަށުން އިރާނުން ނިއުކްލިއާ ޕްރޮގްރާމުގެ ބައެއް ކަންކަން މަޑު ޖައްސާލުމުން، އަޅާފައިވާ ދަތިކުރުމުގެ ފިޔަވަޅުތަކަށް ލުއި ދޭނެ އެވެ.
އެމެރިކާގެ ކުރީގެ ރައީސް ޑޮނަލްޑް ޓްރަމްޕް 2017 ވަނަ އަހަރު އެ އެއްބަސްވުމަށް އަމަލު ކުރުން ހުއްޓާލިއިރު، އިޒްރޭލުން ދެކޭ ގޮތުގައި އެއްބަސްވުމުގެ ސަބަބުން އިރާނަށް ނާޖައިޒު ފައިދާތަކެއް ލިބި، ނިއުކްލިއާ ހަތިޔާރު އުފެއްދުމައިގެން ކުރިއަށް ދާނެ އެވެ.
ނިއުކްލިއާ ހަތިޔާރު އުފައްދަން ނޫޅޭ ކަމަށް މީގެ ކުރިން އެތައް ފަހަރެއްގެ މަތިން އިރާނުން ވަނީ ބުނެފަ އެވެ.
އަންނަ އޯގަސްޓް މަހު ރައީސްކަމުގެ މަގާމާ ރައިސީ ހަވާލުވެ ވަޑައިގަންނަވާއިރު، މި ވަގުތަކީ ނިއުކްލިއާ އެއްބަސްވުން އަލުން އިއާދަކުރަން ގައުމުތަކުން އިރާނާއެކު މަޝްވަރާ ކުރަމުންދާ ދަނޑިވަޅެކެވެ.
