ވޮޝިންޓަން، އެމެރިކާ (ޖޫން 19) - ޗައިނާގެ ސަރަހައްދެއްގެ ގޮތުގައި ދައުވާ ކުރާ ޓައިވާނަށް ކޮވިޑް ވެކްސިނުގެ 2.5 މިލިއަން ޑޯޒް ފޮނުވާފައިވާ ކަމަށް އެމެރިކާއިން އިއުލާނުކޮށްފި އެވެ.
އެމެރިކާ އާއި ޗައިނާގެ ގުޅުން ހީނަރުވެފައި ވަނިކޮށް، މި މަހު ކުރީކޮށް އެމެރިކާގެ ސެނެޓް މެމްބަރުން ވަނީ ޓައިވާނަށް ވަޑައިގެން، ވެކްސިން ހަދިޔާ ކުރައްވާނެ ކަމަށް ވިދާޅުވެފަ އެވެ.
ސްޓޭޓް ޑިޕާޓްމަންޓުގެ ތަރުޖަމާނު ނެޑް ޕްރައިސް ކުރެއްވި ޓްވީޓެއްގައި ވިދާޅުވީ 2.5 މިލިއަން ވެކްސިން ޑޯޒް މިހާރު ވަނީ ޓައިވާން ދިޔުމުގެ މަގުމަތީގައި ކަމަށެވެ.
އެމެރިކާއިން ފޮނުވާފައިވާ ޑޯޒުގެ އަދަދަކީ ސެނެޓުގެ މެމްބަރުން ޓައިވާނަށް ކުރެއްވި ދަތުރުގައި އިއުލާނު ކުރެއްވި ވަރަށް ވުރެ ތިން ގުނަ އިތުރު އަދަދެކެވެ.
އަމިއްލަ ދައުލަތެއްގެ ގޮތުގައި ދެކި، ޗައިނާއާ ވަކި ވެރިކަމެއް ހިންގާ ޓައިވާނުން ޗައިނާއަށް ތުހުމަތުކޮށްފައި ވަނީ ވެކްސިން ޕްރޮގްރާމަށް ހުރަސް އަޅާ ކަމަށެވެ.
ބައިނަލްއަގްވާމީ މުޖުތަމައުގައި ޓައިވާނަށް އެންމެ އެއްބާރުލުންދޭ ގައުމަކީ އެމެރިކާ އެވެ. ނަމަވެސް އެމެރިކާ އާއި ޓައިވާނާ ދެމެދު ވެސް ފުރިހަމަ ޑިޕްލޮމެޓިކް ގުޅުމެއް ނޯވެ އެވެ.
ދާދި ފަހަކާ ޖެހެންދެން ޓައިވާނުގައި ކޮވިޑް އޮތީ ކޮންޓްރޯލްކޮށްފަ އެވެ. ނަމަވެސް އެއާލައިން ޕައިލެޓުންގެ ފަރާތުން ބަލި އެތެރެވެ، މިހާރު ކޭސްތައް ވަނީ އިތުރުވެފަ އެވެ.
އެމެރިކާއަށް ޝުކުރު އަދާކުރައްވާ ކުރެއްވި ޓްވީޓެއްގައި ޓައިވާނުގެ ރައީސް ސައި ސިންގް ވެން ވިދާޅުވީ މިއީ ޓައިވާނު ރައްކާތެރިކަމާއި ދުޅަހެޔޮ ސިއްހަތެއްގައި ބޭއްވުމަށް މުހިއްމު ވެކްސިން ކަމަށެވެ.
