ސީލައިފް ފްލެޓްތަކުގެ މައްސަލާގައި ހިޔާނާތްތެރިވިކަމުގެ ދައުވާ އުފުލާފައިވާ އެ ކުންފުނީގެ އެމްޑީ އަހުމަދު މޫސާ މުހައްމަދު (އަންމަޓީ) ބަންދުން ދޫކޮށްލުމަށް ކުރިމިނަލް ކޯޓުން ނެރުނު އަމުރު އިސްތިއުނާފުކުރުމަށް ޕްރޮސިކިއުޓާ ޖެނަރަލްގެ އޮފީހުން ނިންމައިފި އެވެ.
އެ އޮފީހުގެ މީޑިއާ އޮފިޝަލް، ޕަބްލިކް ޕްރޮސިކިއުޓާ އަހުމަދު ޝަފީއު ވިދާޅުވި ގޮތުގައި އަންމަޓީ ބަންދުން ދޫކޮށްލުމަށް ކްރިމިނަލް ކޯޓުން ނިންމި ނިންމުމާމެދު އެ އޮފީހުން ހިތްހަމަ ނުޖެހޭތީ، އެ ނިންމުން ހައިކޯޓުގައި އިސްތިއުނާފު ކުރުމަށް ނިންމާފައިވާ ކަމަށެވެ.
އެޗްޑީސީ އާއި ސީލައިފް ގްލޯބަލް އިންކް ޕްރައިވެޓް ލިމިޓެޑާ ދެމެދު 2015ގައި ވެފައިވާ އެއްބަސްވުމެއްގެ ދަށުން ހުޅުމާލޭގައި 3000 ހައުސިން ޔުނިޓް އެޅުމަށް، ހަވާލުކުރި އެވެ. ނަމަވެސް، އެއްބަސްވުމުގައިވާ މުއްދަތުގައި ހައުސިން ޔުނިޓްތައް އެޅުމުގެ އަމަލީ މަސައްކަތް ފުރިހަމަނުކޮށް، މަކަރާއި ހީލަތުން އެކި މީހުން އަތުން ބޮޑެތި އަދަދުތަކުން ފައިސާ ނަގައި، އެ ފައިސާއަށް ހިޔާނާތްތެރިވެފައިވާ ކަަމުގެ ތުހުމަތު އަންމަޓީގެ މައްޗަށް ވަނީ ކޮށްފަ އެވެ.
އެ ތުހުމަތުގައި އޭނާ ހޯދުމަށް ރެޑް ނޯޓިސް ވެސް ނެރެފައިވަނިކޮށް އޭނާ ހައްޔަރުކުރީ ލަންކާގައި ފިލައިގެން އުޅެނިކޮށެވެ.
ސީލައިފްގެ ފްލެޓްތައް ފައިސާ ނެގުމަށްފަހު ހަވާލުނުކުރި މައްސަލާގައި ޕްރޮސިކިއުޓާ ޖެނަރަލްގެ އޮފީހުން ވަނީ އަންމަޓީގެ މައްޗަށް ހިޔާނާތުގެ 42 ދައުވާއެއް އުފުލައިފަ އެވެ. އެއީ، އޭނާ ހިޔާނާތްތެރިވި ކޮންމެ މީހެއްގެ މައްސަލަ ވަކިންނެވެ.
ލަންކާއިން އަންމަޓީ ގެނައި ފަހުން އޭނާ ހުރީ ބަންދުގަ އެވެ. ތަހުގީގު މަރުހަލާގައި ބަންދުގައި ހުރިއިރު، ދައުވާ އުފުލުމަށްފަހު ވެސް އޭނާގެ ބަންދަށް މުއްދަތު ޖަހަމުން ދިޔަ އެވެ.
މިއަދު އަންމަޓީގެ ބަންދު ރިވިއު ކުރުމަށް ބޭއްވި މަޖިލީހުގައި ދައުލަތުގެ ވަކީލް އެދިވަޑައިގެންނެވީ އަންމަޓީ ޝަރީއަތް ނިމެންދެން ބަންދުކުރުމަށެވެ. އެއީ، ހެއްކަށް ނުފޫޒު ފޯރުވާނެ ކަމާއި މުޖުތަމައުއަށް ނުރައްކާވާ ކަމުގެ އިހުތިމާލު އޮތުމުންނެވެ.
އަދި، ޝަރީއަތަށް އޭނާ ހާޒިރުނުވެދާނެ ކަމާއި ފިލައިދާނެ ކަމުގެ ބިރު ވެސް އޮތުމުން ކަމަށް ވަކީލް ވިދާޅުވި އެވެ. ނަމަވެސް، އޭނާ ހެއްކަށް ނުފޫޒު ފޯރުވަން މަސައްކަތް ނުކުރާ ކަމާއި ފިލައިދާނެ ކަމަށް ކުރާ ތުހުމަތުތައް ގޯސް ކަމަށް އަންމަޓީގެ ވަކީލް ވިދާޅުވި އެވެ.
ނަމަވެސް، އަންމަޓީ ވަނީ އޭނާ ފިލައިގެން ނުދާނެ ކަމުގެ ޔަގީންކަން ވެސް ގާޒީއަށް ދެއްވާފަ އެވެ. އަދި، ބުނީ އޭނާ ރާއްޖެ އައީ އަމިއްލަ އިހުތިޔާރުގައި ބޭނުންވެގެން ކަމަށާއި ރާއްޖެ ނައިސް ވެސް އުޅެވެން އޮތް ކަމަށެވެ. ނަމަވެސް، ބޭނުންވީ މައްސަލާގެ އިންސާފާ ހަމައަށް ދިޔުމަށް ކަމަށް ވިދާޅުވި އެވެ.
އޭނާގެ ބަލި ހާލަތު ވެސް ހުރި ގޮތުން، ޝަރުތުތަކަކާއެކު ނަމަވެސް އޭނާ ބަންދަށް ލުއި ދިނުމަށް ތަކުރާރުކޮށް އެދެމުން ދިޔަ އެވެ.
މައްސަލަ ބައްލަވާ ގާޒީ ހަސަން ސައީދު ނިންމެވީ، މި މައްސަލައަކީ އޭނާ ބަންދުގައި ބަހައްޓައިގެން ކުރިއަށް ގެންދަން ޖެހޭ މައްސަލައެއް ނޫން ކަމަށެވެ. ނަމަވެސް، އަންމަޓީ ޖަލު ބަންދުން ދޫކޮށްލީ މާލޭން ބޭރަށް ނުދެވޭ ގޮތަށާއި ޝަރީއަތަށް ހާޒިރުވުމަށް ޝަރުތުކޮށްފަ އެވެ.
