ދިވެހި ކުންފުންޏަކުން ރާއްޖޭގައި ހިންގާ އެންމެ ބޮޑު ހައުސިން މަޝްރޫއުގައި ހިމެނޭ 1،000 ފްލެޓް ދެ އަހަރުގެ ތެރޭގައި ނިންމަން އަމާޒު ހިފާފައިވާ ކަމަށް ހައުސިން މިނިސްޓަރު މުހައްމަދު އަސްލަމް މިއަދު ވިދާޅުވެއްޖެ އެވެ.
އެ ހައުސިން ޔުނިޓުތައް އަޅަނީ އެޕޯލޯ ހޯލްޑިންގްސް ޕްރައިވެޓް ލިމިޓެޑުންނެވެ. އެ ޕްރޮޖެކްޓު އެޕޯލޯއާ ހަވާލު ކުރީ ސަރުކާރުން ހިންގަން ބޭނުންވާ ހައުސިން ޕްރޮޖެކްޓުތައް ޑިވެލޮޕް ކުރުމަށް އަމިއްލަ ފަރާތްތައް މިދިޔަ އަހަރު ހުޅުވާލި ފުރުސަތުގަ އެވެ.
މިއަދު ބިންގާއެޅި 100 ހައުސިން ޔުނިޓުގެ ތެރޭގައި ހިމެނޭނީ ކައުންސިލް ހައުސިން އާއި އެފޯޑަބަލް ހައުސިން އަދި މިޑްލް އިންކަމް ހައުސިން އެވެ. އަދި ހިމެނޭނީ ދެ ކޮޓަރި އާއި ތިން ކޮޓަރީގެ އެޕާޓްމަންޓުތަކެކެވެ.
އެ ހައުސިން ޔުނިޓު އަޅާ ޓަވަރުގެ ބިންގާ އެޅުމަށް މިއަދު ބޭއްވި ރަސްމިއްޔާތުގައި ވާހަކަ ދައްކަވަމުން ހައުސިން މިނިސްޓަރު މުހައްމަދު އަސްލަމް ވިދާޅުވީ ސަރުކާރުގެ އަމާޒަކީ ދެ އަހަރު ދުވަހުގެ ތެރޭގައި އެ ޓަވަރުގެ މަސައްކަތް ނިންމައި މީހުންނަށް އެތަނުގައި ދިރިއުޅެވޭނެ ގޮތް ހެދުން ކަމަށެވެ.
މީގެ ކުރިން ސަރުކާރުން ހިންގާފައިވާ ހައުސިން ޕްރޮޖެކްޓުތައް ހިންގާފައި ވަނީ ކޮންޓްރެކްޓަރު އެއްވެސް ބާވަތެއްގެ ރިސްކެއް ނެގުމަކާނުލައި، ސަރުކާރުގެ ލޯނާއި ސޮވްރިން ގެރެންޓީގެ ފަހަތުގައި ކަމަށް މިނިސްޓަރު ވިދާޅުވި އެވެ. ނަމަވެސް މި ޕްރޮޖެކްޓުން ސަރުކާރުން ނަގަންޖެހޭ ރިސްކެއް ނޯންނާނެ ކަމަށް އޭނާ ވިދާޅުވި އެވެ.
"އަޅުގަނޑު މިއަދު އެންމެ އުފާވަނީ މާލޭގައި ދިރިއުޅޭ ރައްޔިތުންނަށް ދިމާވެފައިވާ ބޯހިޔާވަހިކަމުގެ މައްސަލަ ހައްލުކޮށްދެއްވުމަށް 100 ޕަސެންޓް ދިވެހި ކުންފުންޏަކުން މިވަރުގެ ކަމަކަށް ކުރިމަތިލެއްވީމަ،" އަސްލަމް ވިދާޅުވި އެވެ.
