ގްލާސްގޯ، ސްކޮޓްލެންޑް (ޖޫން 14) - ޔޫރޯ ފުޓްބޯޅަ މުބާރާތުގައި މިރޭ ޕެޓްރިކް ޝިކް ޖެހި މޮޅު ދެ ގޯލާ އެކު ޗެކް ރިޕަބްލިކުން 2-0 އިން ސްކޮޓްލެންޑް ބަލިކޮށްފި އެވެ.
މިއީ 1998 ވަނަ އަހަރުގެ ވޯލްޑް ކަޕަށް ފަހު މިދިޔަ 23 އަހަރު ތެރޭ ބޮޑު މުބާރާތެއްގައި ސްކޮޓްލެންޑް ކުޅުނު ފުރަތަމަ މެޗެވެ. މި މެޗުގެ ކުރިން ސްކޮޓްލެންޑާ ދެކޮޅަށް ޗެކް ރިޕަބްލިކް ކުޅުނު ތިން މެޗުން ވެސް ވީ ބައްޔެވެ. އެކަމަކު މި މެޗުން ލިބުނު މޮޅާ އެކު ޗެކް ރިޕަބްލިކަށް ބޮޑު އުފަލެއް ލިބޭނެ އެވެ.
ސްކޮޓްލެންޑްގެ ސްޓޭޑިއަމް ހެމްޕްޑެން ޕާކުގައި 12،000 ސަޕޯޓަރުން ކުރިމަތީގައި ކުޅުނު މި މެޗު ފަށައިގެން ފުރަތަމަ މިނިޓުން ފެށިގެން ވެސް ދެ ޓީމުން ދިޔައީ ކުރިއަށް ޖެހިގެން ކުޅެން މަސައްކަތް ކުރަމުންނެވެ. އެކަމަކު ފުރަތަމަ މެޗުގެ ނުރައްކާތެރި ޝޮޓް ފޮނުވާލީ ޗެކް ރިޕަބްލިކް އިންނެވެ. މެޗުގެ 15 ވަނަ މިނިޓްގައި އޭރިއާބޭރުން ޗެކް ރިޕަބްލިކްގެ ޝިކް ޖެހި ބޯޅަ ސްކޮޓްލެންޑް ކީޕަރު ޑޭވިޑް މާޝަލް ވަނީ މަތަކޮށްފަ އެވެ. އޭގެ ތިން މިނިޓް ފަހުން ސްކޮޓްލެންޑްގެ ކެޕްޓަން އެންޑީ ރޮބަޓްސަން ނަގައިދިން ހުރަހަކުން ލީންޑަން ޑައިކްސް ޖެހި ބޯޅަ ދިޔައީ އަރިމަތިން ބޭރުންނެވެ.
އޭގެ ފަހުން ރޮބަޓްސަން ޖެހި ބޯޅައެެއް ޗެކް ރިޕަބްލިކްގެ ގޯލްކީޕަރު ތޯމަސް ވަސްލިޗް ވަނީ މަތަކޮށްފަ އެވެ.
ޗެކް ރިޕަބްލިކުން އަލުން މަޑުމަޑުން މެޗުގެ ތެރެއަށް އައިސް ފުރަތަމަ ހާފު ނިމުމުގެ ކުރިން ލީޑުނެގި އެވެ. މެޗުގެ 42 ވަނަ މިނިޓްގައި މި ގޯލު ޖެހީ ޝިކް އެވެ. އަރިމަތިން ވްލަޑިމީރް ސޯފާލް ނަގައިދިން ހުރަހަކުން އުމުރުން 25 އަހަރުގެ ޝިކް މި ގޯލު ޖެހީ ބޮލުންނެވެ. މިއީ ބަޔާ ލެވަކޫސަން އަށް ކުޅޭ ޝިކް ގައުމީ ޓީމަށް ޖަހައިދިން 12 ވަަނަ ގޯލެވެ.
ޝިކް ބޮލުން ގޯލަށް ބޯޅަ ފޮނުވާލަނީ. -- ފޮޓޯ: އޭއެފްޕީ
ދެ ވަނަ ހާފްގެ ކުޅުން ފެށިގެން ގާތްގާތުގައި ޝިކް އާއި ވްލަޑިމީރް ޑަރީޑާ ޖެހި ދެ ބޯޅައެއް ސްކޮޓްލެންޑް ކީޕަރު މާޝަލް ވަނީ މަތަކޮށްފަ އެވެ. އޭގެ ފަހުން ނަތީޖާ ހަމަހަމަކުރަން ސްކޮޓްލެންޑްގެ ޖެކް ހެންޑްރީ ޖެހި ބޯޅައެއް ހުރަސްދަނޑިއަށް އަމާޒުވިއިރު، ފަހުން ޗެކް ރިޕަބްލިކް ކުޅުންތެރިއަކު ފައިގައި ޖެހިފައި ބައިކޮޅަށް ވަންނަން ދިޔަ ބޯޅަ ކީޕަރު ވަސްލިޗް ވަނީ ހުއްޓުވައިފަ އެވެ.
ސްކޮޓްލެންޑުން ކުރިއަށް ޖެހިގެން އެއްވަރުކުރަން މަސައްކަތްކުރަމުން ދަނިކޮށް ޗެކް ރިޕަބްލިކަށް ލިބުނު ފަޅި ފުރުސަތެއްގައި އެ ޓީމުން ދެ ވަނަ ގޯލެއް ޖެހި އެވެ. މެޗުގެ 52 ވަނަ މިނިޓްގައި މި ގޯލު ޖެހީ ޝިކް އެވެ. އޭނާ މި ގޯލު ޖެހީ ހާފްގެ މެދެއްހާ ހިސާބުންނެވެ. ސްކޮޓްލެންޑްގެ ކުޅުންތެރިއަކު ޖެހި ޝޮޓެއް ބްލޮކްވެގެން އައިސް ލިބުނީ ހާފްގެ މެދުރޮނގާ ތަންކޮޅެއް ކުރިން ޝިކް އަށެވެ. ކީޕަރު މާޝަލް ކުރިއަށް އަރައި އޮތުމުން ޝިކް ވަނީ އެ ބޯޅަ މަތިން ގޯލަށް އޮއްސާލައިފަ އެވެ. މިއީ ޔޫރޯ ތާރީހުގައި ވެސް ފާހަގަކޮށްލެވޭ ފަދަ މޮޅު ގޯލެކެވެ.
ސްކޮޓްލެންޑުން މި މެޗުގައި ލަނޑު ޖަހާނެ ގިނަ ފުރުސަތުތަކެއް ތަނަވަސްކުރި އެވެ. އެކަމަކު ގިނަ ބޯޅަތައް ހުއްޓުވީ ޗެކް ރިބަޕްލިކްގެ ގޯލުގައި މޮޅު ކުޅުމެއް ދެއްކި ވަސްލިޗް އެވެ. ޑައިކްސް އާއި މެކްޓޮމިނޭއި އަދި ޖޯން މެކްގިން ދެ ވަނަ ހާފްގައި ފޮނުވާލި ހަމަލާތައް ގޯލަކަށް ހަދައިނުލެވުނެވެ.
ހެޓްރިކް ހަދަން އޭރިއާތެރޭގައި ހުސްކޮށް ހުރެފައި ޝިކް ޖެހި ބޯޅަ އަމާޒުވީ ކީޕަރު މާޝަލް އަތަށެެވެ. މެޗު ނިމެން ހަތަރު މިނިޓަށް ވެފައި ވަނިކޮށް ޝިކް ވަނީ ބަދަލުކޮށްފަ އެެވެ. ޝިކްގެ ބަދަލުގައި ކުޅެން އެރި މިކޭލް ކާމެންޗިޗް ބޮލުން ޖެހި ބޯޅައެއް ކީޕަރު މާޝަލް ވަނީ މަތަކޮށްފަ އެވެ. މިއީ 1996 ވަަނަ އަހަރަށް ފަހު ސްކޮޓްލެންޑް އިން ޔޫރޯގައި ކުޅުނު ފުރަތަމަ މެޗެވެ.
މި ގްރޫޕްގެ ފުރަަތަމަ މެޗުން އިއްޔެ އިންގްލެންޑުން ވަނީ 1-0 އިން ކްރޮއޭޝިއާ ބަލިކޮށްފަ އެވެ.
