މި ފަހަރަކީ ޔޫރޯގައި ޕޮލެންޑްގެ ހަތަރު ވަނަ ފެނިލުމެވެ. އެންމެ ފުރަތަމަ އެ ޓީމުން ޔޫރޯގައި ވާދަކުރީ 2008 ވަނަ އަހަރު ސްވިޒަލެންޑާއި އޮސްޓްރިއާގައި ބޭއްވި މުބާރާތުގަ އެވެ. އޭގެ ފަހުން ބޭއްވި ދެ މުބާރާތުގައި ވެސް އެ ޓީމު ވާދަކޮށްފައިވެ އެވެ. ޔޫރޯގައި ޕޮލެންޑްގެ އެންމެ ރަނގަޅު ނަތީޖާ އަކީ އެންމެ ފަހުން 2016 ވަނަ އަހަރު ބޭއްވި މުބާރާތުގެ ކުއާޓާ ފައިނަލުގައި ވާދަކުރުމެވެ. އެ ޓީމު ކުއާޓާގައި ޕެނަލްޓީ ޖަހައިގެން ބަލިވީ ޗެމްޕިއަންކަން ހޯދި ޕޯޗުގަލް އަތުންނެވެ.
ޕޮލެންޑް މި ފަހަރުގެ ޔޫރޯ އިން ފުރުސަތު ހޯދީ ކޮލިފައިން ގްރޫޕްގެ އެއް ވަނަ ޓީމުގެ ގޮތުގަ އެވެ. ޕޮލެންޑް ކުޅުނު 10 މެޗުގެ ތެރެއިން އަށް މެޗުން މޮޅުވިއިރު، އެއް މެޗުން އެއްވަރު އަދި އަނެއް މެޗުން ވަނީ ބަލިވެފަ އެވެ. އެއްވަރުވީ ލަޓްވިއާއާ އެވެ.. އަދި ބަލިވީ ރަށުންބޭރުގައި ސްލޮވީނިއާ އަތުންނެވެ. މި ފަހަރު ޔޫރޯގައި ޕޮލެންޑް އޮތް ގްރޫޕްގެ ގޮތުން ގްރޫޕް ސްޓޭޖު ފަހަނައަޅައި ދިއުން ވެގެންދާނީ ވަރަށް ބޮޑު ޗެލެންޖަކަށެވެ.
ޕޮލެންޑް ޓީމުގެ ތަރިއަކީ އެ ޓީމުގެ ފޯވާޑް އަދި މިދިޔަ އަހަރު ފީފާ އިން ހޮވި އެންމެ މޮޅު ކުޅުންތެރިޔާ ރޮބަޓް ލެވަންޑޯސްކީ އެވެ. ލެވަންޑޯސްކީ ވަނީ ކޮލިފައިންގައި ހަ ގޯލު ޖަހައިފަ އެވެ. އަދި މި ފަހަރުގެ ޔޫރޯ އަށް އޭނާ ކުރިމަތިލާނީ ލަނޑު ޖެހުމުގެ ބޮޑު ރެކޯޑެއް މުގުރާލައި ޔޫރަޕްގެ ރަން ބޫޓާ އެކު އެވެ. އެހެންކަމުން ލެވަންޑޯސްކީ މި ފަހަރު ޔޫރޯގައި މުހިއްމު ދައުރެއް އަދާކުރާނެ ކަމަށް ބެލެވެ އެވެ. ދެން އެ ޓީމުން ފާހަގަކޮށްލެވޭ ކުޅުންތެރިންނަކީ ބްރައިޓަންގެ ޔެކުބް މޯޑާ އާއި ނަޕޯލީ އަށް ކުޅޭ ޕިއޮޓްރޭ ޒިއެންލިންސްކީ އަދި މާސޭގެ ފޯވާޑް އަކައުންޑެއުޝް މިލިކް ހިމެނެ އެވެ.
ޕޮލެންޑްގެ ކޯޗު ސޯސާ.
ކޯޗު: ޕައޮލޯ ސޯސާ
އެންމެ ފުރަތަމަ ޝެޑިއުލްކުރި ގޮތަށް މިދިޔަ އަހަރު ޔޫރޯ ބޭއްވިނަމަ އެ ޓީމުގެ ބެންޗުން ފެންނާނީ ޖާޒީ ބްރެޒެޝެކް އެވެ. އެކަމަކު މި އަހަރު ޖެނުއަރީ މަހު ޕޯޗުގަލްގެ ކުރީގެ ކުޅުންތެރިޔާ ޕައޮލޯ ސޯސާ ވަނީ ޕޮލެންޑްގެ ކޯޗުކަމާ ހަވާލުވެފަ އެވެ.. އޭނާ ވަނީ ކޯޗިންގެ މަސައްކަތް އެކި ގައުމުތަކުގައި ކޮށްފަ އެވެ. އޭގެ ތެރޭގައި އިންގްލެންޑް، ހަންގޭރީ، އިޒްރޭލް، ސްވިޒަލެންޑް ، އިޓަލީ، ފްރާންސް އަދި ޗައިނާހިމެނެ އެވެ.
ސްކޮޑު
ކީޕަރުން: ލޫކަސް ފަބިއާންސްކީ (ވެސްޓް ހޭމް)، ވޮޒްޝިއޭ ޝެޒްނީ (ޔުވެންޓަސް)، ލޫކަސް ސްކޮރުޕްސްކީ (ބޮލޯނިއާ)
ޑިފެންޑަރުން: ޔެން ބެޑްނަރެކް (ސައުތެމްޓަން)، ބާޓޯޒް ބެރެޒިންސްކީ (ސަމްޑޯރިއާ)، ޕަވެލް ޑަވިޑޯޒިޗް (ވެރޯނާ)، ކަމިލް ގްލިކް (ބެނެވެންޓޯ)، މިކަލް ހެލިކް (ބާންސްލީ)، ތޯމަސް ކެޑްޒިއޯރާ (ޑިނަމޯ ކިއޭވް)، ކަމިލް ޕިއަޓޯސްކީ (ރަކޯ ޗެޒެސްޓޮޗޯވާ)، ޓީމޮޓިއުޒް ޕުޗާޒް (ލެޗް ޕޮޒްނަން)، މަސިއެ ރީބަސް (ލޮކޮމޯޓިވް މޮސްކޯ)
މިޑްފީލްޑަރުން: ޒެމީސްލޯ ފްރެންކޯސްކީ (ޝިކާގޯ ފަޔާ)، ކަމީލް ޖޯޒްވިއާކް (ޑާބީ)، މަޓެއުޝް ކްލިޗް (ލީޑްސް ޔުނައިޓެޑް)، ކެޝްޕާ ކޮޒްލޯވްސްކީ ( ޕޮގޯން ޝެޒްޝިން)، ގްރެގޯރް ކްރިކޯވިއަކް (ލޮކޮމޯޓިވް މޮސްކޯ)، ކަރޯލް ލިނެއްޓީ (ޓޮރީނޯ)، ޔަކޫބް މޯޑާ (ބްރައިޓަން)، ޕްރްޒެމީސްލޯ ޕަލަޗެޓާ (ނޯވިޗް ސިޓީ)، ޕިއޮޓްރޭ ޒިއެލިންސްކީ (ނަޕޯލީ)
ފޯވާޑުން: ރޮބަޓް ލެވަންޑޯސްކީ (ބަޔާން މިއުނިކް)، ޑޭވިޑް ކޯނަކީ (ފޯޗިއުނާ ޑޫސެލްޑޯފް)، އަކަންޑިއުޝް މިލްކް (މާސޭ)، ކަރޯލް ސްވިޑާސްކީ (ޕީއޭއޯކޭ)، ޔަކުބް ޝްވިއެޒޯކް (ޕީއޭސްޓް ގްލިވީޝް)
