ސްކޮޓްލެންޑް އެންމެ ފަހުން ޔޫރޯގައި ކުޅުނީ 25 އަހަރު ކުރިން 1996 ވަނަ އަހަރު އިންގްލެންޑުން ޔޫރޯ ހޯސްޓްކުރި ފަހަރު އެވެ. މިއީ ސްކޮޓްލެންޑުން ޔޫރޯގައި ވާދަކުރާ ތިން ވަނަ ފަހަރެވެ. ކުރިން ދެ ފަހަރު ވެސް އެ ޓީމަށް މުބާރާތް ނިމުނީ ގްރޫޕް ސްޓޭޖުންނެވެ. ސްކޮޓްލެންޑް ޔޫރޯ އަށް ކޮލިފައިވީ ޕްލޭއޮފް ކުޅެގެންނެވެ. ޕްލޭއޮފްގެ ފުރަތަމަ މެޗުގައި އިޒްރޭލުގެ މައްޗަށް ކުރިހޯދިއިރު، ފަހު މެޗުން ވަނީ ސާބިއާ ބަލިކޮށްފަ އެވެ.
މި ފަހަރުގެ ޔޫރޯގައި ސްކޮޓްލެންޑް އޮތް ގްރޫޕްގެ ގޮތުން އެންެމެ ފޯރިގަދަވާނެ ކަމަށް ބެލެވެނީ އިންގްލެންޑާ ދެކޮޅަށް ކުޅޭ މެޗެވެ. އެއީ މި ދެ ޓީމަކީ ގްރޭޓް ބްރިޓިއަންގެ ނަމުގައި އެކުގައި އޮލިމްޕިކްސްގައި ވާދަކުރާ ކުޅުންތެރިން ވެސް ހިމެނޭ ދެ ޓީމަށް ވެފައި ފުޓްބޯޅައިގެ އިތުރުން އެކި ގޮތްގޮތުން ވެސް ވާދަވެރި ދެ ގައުމަށް ވާތީ އެވެ. ސްކޮޓްލެންޑުން މީގެ ކުރިން އިންގްލެންޑާ ދެކޮޅަށް ކުޅުނު މެޗުތައް ވެސް ނިމުނީ ވަރަށް ފޯރިގަދަކޮށް ގޮހެވެ.
ސްކޮޓްލެންޑް ޓީމުގައި ހިމެނޭ ފާހަގަކޮށްލެވޭ ގިނަ ކުޅުންތެރިން ކުޅެނީ އިނގިރޭސި ޕްރިމިއާ ލީގުގަ އެވެ. އޭގެ ތެރޭގައި ސްކޮޓްލެންޑްގެ ކެޕްޓަން ލިވަޕޫލްގެ ވާތު ބެކް އެންޑީ ރޮބަޓްސަން އާއި އެސްޓަން ވިލާގެ މިޑްފީލްޑަރު ޖޯން މެގިން އަދި ދާދި ފަހުން އޮސްޓްރޭލިއާގެ ރަށްވެހިކަން ދޫކޮށް ސްކޮޓްލެންޑަށް ކުޅެން ނިންމި ލައިންޑޮން ޑައިކްސް ހިމެނެ އެވެ.
ސްކޮޓްލެންޑްގެ ކޯޗު ސްޓީވް ކްލާކް
ކޯޗު: ސްޓީވް ކްލާކް
މަޝްހޫރު ގިނަ ޓީމުތަކުގެ އެސިސްޓަންޓް ކޯޗެއްގެ މަގާމު ފުރި ކޯޗު ސްޓީވް ކްލާކް ސްކޮޓްލެންޑްގެ ކޯޗުކަމާ ހަވާލުވީ 2019 ވަނަ އަހަރުގެ މެއި މަހުގަ އެވެ. ކްލާކް ކޯޗިން ކެރިއަރު ފެށީ 1998 ވަަނަ އަހަރު. ނިއުކާސަލް ޔުނައިޓެޑްގައި ރޫޑް ގުލިޓްގެ އެސިސްޓަންޓް ކޯޗެއްގެ ގޮތުގަ އެވެ. ފަހުން އެސިސްޓަންޓެއްގެ ގޮތުގައި ލިވަޕޫލާއި ޗެލްސީގައި ވެސް މަސައްކަތްކުރި ކްލާކަކީ އިނގިރޭސި ފުޓްބޯޅަ އަށް ފަރިތަ ކޯޗެކެވެ.
ސްކޮޑު
ކީޕަރުން: ކްރެއިގް ގޯޑަން (ހާޓް)، ޑޭވިޑް މާޝަލް (ޑާބީ)، ޖޯން މެކްލޯފްލިން (ރޭންޖާސް)
ޑިފެންޑަރުން: ލިއަމް ކޫޕާ (ލީޑްސް ޔުނައިޓެޑް)، ޑެކްލަން ގެލަގާ (މަދަވޯލް)، ގްރޭންޓް ހަންލޭ (ނޯވިޗް ސިޓީ)، ޖެކް ހެންޑްރީ (ސެލްޓިކް)، ސްކޮޓް މެކްކެނާ (ނޮޓިންހަމް ފޮރެސްޓް)، ސްޓެފަން އޯޑޮނެލް (މަދަވޯލް)، ނޭތަން ޕެޓާސަން (ރޭންޖާސް)، އެންޑީ ރޮބަޓްސަން (ލިވަޕޫލް)، ގްރެގް ޓޭލާ (ސެލްޓިކް)، ކިއެރަން ޓިއާނީ (އާސެނަލް)
މިޑްފީލްޑަރުން: ސްޓުއާޓް އާމްސްޓްރޯންގް (ސައުތެމްޓަން)، ރިޔާން ކްރިސްޓީ (ސެލްޓިކް)، ޖޯން ފްލެކް (ޝެފީލްޑް ޔުނައިޓެޑް)، ބިލީ ގިލްމޯ (ޗެލްސީ)، ޖޯން މެކްގިން (އެސްޓަން ވިލާ)، ކަލުމް މެކްގްރެގޯ (ސެލްޓިކް)، ސްކޮޓް މެކްޓޮމިނޭއި (މެންޗެސްޓާ ޔުނައިޓެޑް)، ޑޭވިޑް ޓާންބުލް (ސެލްޓިކް)
ފޯވާޑުން: ޗޭ އެޑަމްސް (ސައުތެމްޓަން)، ލީންޑަން ޑައިކްސް (ކިއުޕީއާރް)، ޖޭމްސް ފޮރެސްޓް (ސެލްޓިކް)، ރަޔާން ފްރޭޒާ (ނިއުކާސަލް ޔުނައިޓެޑް)، ކެވިން ނިސްބެޓް (ހިބާނިއަން)
