ރައްޔިތުންގެ މަޖިލީހުގެ އިދާރާގައި ކަރަންޓު މައްސަލައެއް ދިމާވެގެން މިއަދަށް ތާވަލުކޮށްފައިވާ މަޖިލީހުގެ ޖަލްސާ ކެންސަލް ކުރަން ޖެހިއްޖެ އެވެ.
ކޮވިޑް-19 އާ ގުޅިގެން މަޖިލީހުގެ ޖަލްސާތައް މިހާރު ކުރިއަށް ގެންދަނީ އޮންލައިންކޮށެވެ.
މިއަދުގެ ޖަލްސާ ހެނދުނު 10:00 އަށް ތާވަލުކޮށްފައިވަނިކޮށް، މަޖިލީހުގެ މީޑިޔާ އެންޑް ކޮމިޔުނިކޭޝަންސް ޑިރެކްޓަރު ހަސަން ޒިޔާއު "އަދަދު"އަށް ވިދާޅުވީ ދިމާވި ޓެކްނިކަލް މައްސަލައަކާ ގުޅިގެން މިއަދުގެ ޖަލްސާ ކެންސަލްކޮށްފައިވާ ކަމަށެވެ.
އަދި އެ މައްސަލަ ހައްލުކުރުމަށް މަސައްކަތް ކުރެވެމުންދާ ކަމަށް ވެސް އޭނާ ވިދާޅުވި އެވެ.
ދިމާވެގެން އުޅޭ ޓެކްނިކަލް މައްސަލަ ޒިޔާއު ސާފުކޮށް ނުދެއްވި ނަމަވެސް، "އަދަދު"އަށް އެނގިފައިވާ ގޮތުގައި ޖަލްސާ ކެންސަލް ކުރަންޖެހުނީ މަޖިލީހުގެ އިދާރާގައި ކަރަންޓު މައްސަލަ އެއް ދިމާވެގެންނެވެ.
އަދި އެ މައްސަލަ ހައްލުކުރަން ސްޓެލްކޯއިން ވެސް މިހާރު ހަރަކާތްތެރިވަމުންދާ ކަން އެނގިފައިވެ އެވެ.
ޒިޔާއު އިތުރަށް ވިދާޅުވީ މަޖިލީހުގެ ޖަލްސާ ކެންސަލް ކުރި ނަމަވެސް، އެހެން މަސައްކަތްތައް ކުރިއަށްދާނެ ކަމަށެވެ.
އެގޮތުން، މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު އަވަހާރަކޮށްލަން ދިން ޓެރަރިސްޓު ހަމަލާއާ ގުޅިގެން މަޖިލީހުން ހިންގަމުންދާ ޕާލިމަންޓަރީ އިންކުޔަރީއާ ގުޅޭ ނޫސްވެރިންގެ ބައްދަލުވުމެއް މިއަދު މެނދުރު 12:00 ގައި ތާވަލުކޮށްފައިވާއިރު، އެ ބައްދަލުވުން އޮންނާނެ ކަމަށް ޒިޔާއު ވިދާޅުވި އެވެ.
