ފަނަރަ އަހަރު ވަންދެން ގައުމީ ވޮލީ ޓީމަށް ކުޅުނު ތަޖުރިބާކާރު ކުޅުންތެރިޔާ އަހުމަދު އަބްދުލް ކަރީމް (ލޯންގޭ) ކޮވިޑް-19 އަށް ޕޮޒިޓިވްވެއްޖެ އެވެ.
ސިފައިންގެ ވަޒީފާ އަދާކުރާ ލޯންގޭ ކޮވިޑަށް ޕޮޒިޓިވްވީ ކޮވިޑް-19ގެ އަލާމަތްތައް ފެންނާތީ ޓެސްޓް ކުރުމުންނެވެ. އޭނާ އަށް ޓެސްޓްގެ ނަތީޖާ ލިބުނީ ރޭގަ އެވެ. ލޯންގޭއާ އެކު އޭނާގެ އަންހެނުން ވެސް ވަނީ ކޮވިޑަށް ޕޮޒިޓިވްވެފަ އެވެ.
"އިންޝާﷲ ރަނގަޅުވަމުން އަންނަނީ. ގައިގައި ރިއްސުމާއި ރަހަ ނުލުމާއި ވަސް ނުުދުވުން ކަހަލަ ކަންކަން މި ހުރީ،" ލޯންގޭ، 34، "އަދަދު" އަށް ބުންޏެވެ.
ވ. ކެޔޮދު އަށް އުފަން ލޯންގޭ ވަނީ ޖޫނިއާ ޓީމަށް ކުޅުނު ދެ އަހަރާއި އެކު ޖުމްލަ 17 އަހަރު ގައުމީ ޓީމަށް ކުޅެފަ އެވެ. ލޯންގޭ ގައުމީ ޓީމަށް ކުޅުން ހުއްޓާލީ އެންމެ ފަހުން 2019 ވަަނަ އަހަރު ބޭއްވި ސެންޓްރަލް ޒޯން މުބާރާތަށް ފަހު އެވެ.
ކުޅިވަރުގެ ދާއިރާއިން ކުޅިވަރު ކުޅުމާއި މީހުން ތަމްރީންކުރުމުގެ ރޮނގުން ހިތްވަރު ދިނުމުގެ ގައުމީ އިނާމް މިދިޔަ އަހަރު ހާސިލްކުރި ލޯންގޭ އަށް އެންމެ ފުރަތަމަ ގައުމީ ޓީމުން ފުރުސަތު ލިބުނީ 2004 ވަނަ އަހަރުގެ ސާފް ގޭމްސް އިންނެވެ. އޭގެ ފަހުން އޭނާ ވަނީ މެދުކެނޑުމެއްނެތި 15 އަހަރު ގައުމީ ސީނިއާ ޓީމަށް ކުޅެފަ އެވެ. އަނިޔާވެގެން ނޫން ގޮތަކަށް އޭނާ އަަށް ގައުމީ ޓީމުން ފުރުސަތު ގެއްލިފައެއް ނުވެ އެވެ.
ކޯޗު އިބްރާހިމް ރަޝީދު (ސަތޯ)ގެ ކޯޗުކަމުގެ ދަށުން 2001 ވަނަ އަހަރު އެމްއީއެސް ވޮލީ ޓީމުން ވިދާލި ލޯންގޭ އަކީ ރާއްޖޭގެ ވޮލީގައި ގިނަ ކާމިޔާބީތެއް ހޯދައި ރަން އަކުރުން ފަވާލެވޭނެ ފެންވަރުގެ ކުޅުންތެރިޔެކެވެ. މެދުކެނޑުމެއްނެތި ގައުމީ ޓީމުގައި ހިމެނުނު ލޯންގޭ އޭނާ ކުޅުން ހުއްޓާލުމާ ގާތަށް ދިޔައިރު ޓީމުގެ ކެޕްޓަންކަން ކުރި އެވެ. މޮރިޝަސްގައި 2019 ވަނަ އަހަރު ބޭއްވި އިންޑިއަން އޯޝަން އައިލެންޑް ގޭމްސް (އައިއޯއައިޖީ)ގައި ރާއްޖޭގެ ކެޕްޓަންކަން ކުރީ ވެސް ލޯންގޭ އެވެ.
ދިގު ކެރިއަރުގައި ލޯންގޭ ވަނީ ގައުމީ ޓީމާ އެކު ދެ ރިހި މެޑަލާއި ދެ ބްރޯންޒް މެޑަލް ހޯދައިފަ އެވެ. ދިވެހި ސިފައިންގެ ކްލަބަށް ގިނަ ކާމިޔާބީތަކެއް ހޯދައިދިން ލޯންގޭ އަންނަނީ ވޮލީ ކޯޗިންގެ ތެރޭގައި ވެސް މަސައްކަތް ކުރަމުންނެވެ.
