މެންޗެސްޓާ (ޖޫން 6) - ބޮރޫޝިއާ ޑޯޓްމަންޑްގެ އިނގިރޭސި ވިންގް ޖޭޑަން ސަންޗޯ ހޯދަން މެންޗެސްޓާ ޔުނައިޓެޑުން ކުރާ މަސައްކަތް އަނެއްކާ ވެސް ފަށާފައިވާ ކަމަށް މީޑިއާ ރިޕޯޓްތައް ބުނެފި އެވެ.
މިދިޔަ އަހަރު ޔުނައިޓެޑުން ސަންޗޯ ހޯދަން ތިން ބިޑެއް ކުރި ނަމަވެސް ޑޯޓްމަންޑުން ބޭނުންވާ އަގު ދޭން ދެކޮޅު ހަދާތީ އެ ޑީލް ކުރިއަށް ނުދިޔަ އެވެ.
ސަންޗޯ ގަންނަން ޔުނައިޓެޑުން މިދިޔަ އަހަރު ކުރި ފަހު ބިޑަކީ 117 މިލިއަން ޑޮލަރުގެ ބިޑެކެވެ. ޑޯޓްމަންޑުން ވަނީ އެ ހުށަހެޅުން ވެސް އަނބުރާ ފޮނުވާލައިފަ އެވެ. ޑޯޓްމަންޑުން ޔުނައިޓެޑަށް އަންގާފައިވަނީ 135 މިލިއަން ޑޮލަރު ނޫން އަގަކަށް ސަންޗޯ ނުވިއްކޭނެ ކަމަށެވެ. އަދި އެ ޑީލްގެ އަގުތައް ދައްކަން ޖެހޭނީ ވެސް ފުރަތަމަ 100 މިލިއަން ޑޮލަރު ދޭ ގޮތަށް ކަމަށެވެ. ރިޕޯޓްތައް ބުނާގޮތުން ޔުނައިޓެޑުން ކުރި ފަހު ބިޑްގައި ވެސް ފުރަތަމަ ދައްކަން ހިމަނާފައި އޮތީ 70 މިލިއަން ޑޮލަރެވެ.
ޖަރުމަނުގެ މީޑިއާ ރިޕޯޓްތައް ބުނާގޮތުން މި ފަހަރު ޑޯޓްމަންޑުން ސަންޗޯ ވިއްކާލަން ކިޔާ އަގު ވަނީ ކުޑަކޮށްފަ އެވެ. މި ފަހަރު ޑޯޓްމަންޑްގެ ބޭނުންވަނީ 110 މިލިއަން ޑޮލަރަށް ސަންޗޯ ވިއްކާލާށެވެ. އެއީ ފުރަތަމަ 85 މިލިއަން ޑޮލަރު ދޭގޮތަށެވެ. އަދި ބާކީ ބައި ދެ އަހަރަށް ބަހާލައިގެން ދޭ ގޮތަށެވެ. މި ގޮތަށް ޑީލް ކުރިއަށް ގޮސްފިނަމަ ޔުނައިޓެޑުން މި ފަހަރު ސަންޗޯ ގަންނާނީ މީގެ އެއް އަހަރު ކުރިން ޑޯޓްމަންޑް ކީ އަގަށް ވުރެ 25 މިލިއަން ޑޮލަރު އަގުހެޔޮކޮށެވެ.
އިންގްލެންޑްގެ ޕްރެކްޓިހެއްގެ ތެރެއިން ސަންޗޯ ބޯޅަ ހިފައިގެން.
އުމުރުން 20 އަހަރުގެ ސަންޗޯ އަންނަ ސީޒަނުގައި ފެންނާނީ އިނގިރޭސި ޕްރިމިއާ ލީގުން ކަމަށް އޭނާގެ ގާތް ފަރާތްތަކާ ހަވާލާދީ އިނގިރޭސި މީޑިއާތަކުން ވަނީ ރިޕޯޓްކޮށްފަ އެވެ.
އިންޑިއާގައި 2017 ވަނަ އަހަރު ބޭއްވި 17 އަހަރުން ދަށުގެ ވޯލްޑް ކަޕް ކާމިޔާބުކުރި އިންގްލެންޑް ޓީމުގައި ހިމެނޭ ސަންޗޯ ޑޯޓްމަންޑަށް ބަދަލުވީ އެ މުބާރާތަށް ފަހު އެވެ. ޖަރުމަނުގެ ގަދަބާރު ޑޯޓްމަންޑުން ސަންޗޯ ގަތީ 2017 ވަނަ އަހަރު މެންޗެސްޓާ ސިޓީން 10 މިލިއަން ޑޮލަރު ދައްކައިފަ އެވެ. މުޅި ޑީލް އެއްކޮށް ނިމުނުއިރު، ޑޯޓްމަންޑުން ދެއްކި ފީ ވަނީ 14 މިލިއަން ޑޮލަރަށް އަރައިފަ އެވެ.
ޓްރާންސްފާ މާކެޓްގެ އެހެން ހަަބަރުތަކަށް ބަލާއިރު ނޯވިޗް ސިޓީގެ އާޖެންޓީނާ މިޑްފީލްޑަރު އެމީ ބުއެންޑީއާ ހޯދުމުގެ ރޭހުގައި އާސެނަލް ފަހަތައް ޖައްސާލައި އެސްޓަން ވިލާ ވަނީ ކުރިހޯދައިފަ އެވެ. އެސްޓަން ވިލާ އިން ބުއެންޑީއާ ގެންނާނީ އެ ކްލަބްގެ އެންމެ އަގުބޮޑު ކުޅުންތެރިޔާ ގޮތުގައި ކަމަށް ރިޕޯޓްތައް ބުނެ އެވެ. ލިވަޕޫލުން އަންނަނީ އޮސްޓްރިއާގެ އާރްބީ ސަލްޒްބާގަށް ކުޅޭ ފޯވާޑް ޕެޓްސަން ޑަކާ ހޯދަން މަޝްވަރާކުރަމުންނެވެ.
