ލަންޑަން (ޖޫން 4) - މިދިޔަ ޖެނުއަރީ މަހު ޗެލްސީގެ ކޯޗުކަމާ ހަވާލުވެ އެ ޓީމަށް ޗެމްޕިއަންސް ލީގުގެ ޗެމްޕިއަންކަން ހޯދައިދިން ޖަރުމަނުގެ ކޯޗު ތޯމަސް ޓުޗެލް އެ ކްލަބާ އެކު ހަދާފައިވާ ކޮންޓްރެކްޓް އިތުރު ދެ އަހަރަށް އާކޮށްފި އެވެ.
ޗެލްސީ އަށް ކުރިން ކުޅުނު ލަމްޕާޑް އެ ޓީމާ ހަވާލުވިތާ 18 މަސް ދުވަސް ފަހުން ވަކިކޮށް ޖެނުއަރީ މަހު ޓުޗެލް އަށް ދިނީ 18 މަސް ދުވަހުގެ ކޮންޓްރެކްޓެކެވެ. އެ އެއްބަސްވުމުގެ ފުރަތަމަ ހަ މަސް ދުވަހުގެ ތެރޭގައި ޓުޗެލް ވަނީ ޗެލްސީ އަށް ޗެމްޕިއަންސް ލީގުގެ ޗެމްޕިއަންކަމުގެ އިތުރުން އެފްއޭ ކަޕްގެ ފައިނަލުގެ ފުރުސަތާއި އިނގިރޭސި ޕްރިމިއާ ލީގުގެ ހަތަރު ވަނަ ހޯދައިދީފަ އެވެ. އެފްއޭ ކަޕް ފައިނަލުގައި ލެސްޓާ ސިޓީ އަތުން ވަނީ 1-0 އިން ބަލިވެފަ އެވެ.
ޓުޗެލް މިއަދު ޗެލްސީއާ އެކު އެއްބަސްވުން އާކުރީ 2024 ޖޫން މަހުގެ ނިޔަލަށެވެ. މެންޗެސްޓާ ސިޓީ ބަލިކޮށް މިދިޔަ ހޮނިހިރު ދުވަހު ޗެމްޕިއަންސް ލީގުގެ ތަށި އުފުލާލި މެޗަށް ފަހު ޓުޗެލް ވަނީ ޗެލްސީގެ ވެރިޔާ ރަޝިއާގެ މަހުޖަނު ރޯމަން އަބްރަމޮވިޗާ ދެެކެވުނު ވާހަކަތަކަށް ފަހު އާ ކޮންޓްރެކްޓަކާ މެދު އުއްމީދުކުރެވޭ ކަމަށް ބުނެފަ އެވެ.
"ކުރިން ވެސް ބުނިހެން މިއީ ކޮންޓްރެކްޓް އާ ކުރަން އެންމެ ރަނގަޅު ވަގުތު. އަހަރެން ބޭނުން ޗެލްސީގައި އިތުރު ކަންތައްތަކެއް ހާސިލްކުރަން. މި ކޮންޓްރެކްޓާ އެކު އެ ފުރުސަތު އެ ލިބުނީ،" ޗެލްސީގެ އާ ކޮންޓްރެކްޓްގައި ސޮއިކުރުމަށް ފަހު ޓުޗެލް ބުންޏެވެ.
ޓުޗެލްގެ ކޯޗުކަމުގައި ޗެލްސީގެ ރެކޯޑް ރަނގަޅެވެ. އޭނާގެ ކޯޗުކަމުގައި 30 މެޗު ކުޅުނުއިރު، 19 މެޗުން މޮޅުވި އެވެ. ފަސް މެޗުން ބަލިވިއިރު، ހަ މެޗުން ވަނީ އެއްވަރުވެފަ އެވެ.
އަންނަ ސީޒަނަށް ޗެލްސީ ވަރުގަދަ ކުރުމުގެ ގޮތުން އިތުރު ތިން ކުޅުންތެރިން ވަރު ބޭނުންވާނެ ކަމަށް ޓުޗެލް ވަނީ ބުނެފަ އެވެ.
ޖަރުމަނުގެ އޯގްސްބާގުން 2007 ވަނަ އަހަރު ކޯޗިން ކެރިއަރު ފެށި ޓުޗެލް ވަނީ އެއް އަހަރު ފަހުން މައިންޒާ ހަވާލުވެފަ އެވެ. ޑިފެންޑަރަކަށް ކުޅުނު ޓުޗެލް ކޯޗިން ކެރިއަރުގައި ބޮޑަށް ފާހަގަވާން ފެށީ 2015 ވަނަ އަހަރު ޑޯޓްމަންޑާ ހަވާލުވި ފަހުންނެވެ. އެ ޓީމަށް 2017 ވަނަ އަހަރު ޖަރުމަނު ކަޕް ކާމިޔާބުކޮށްދިނެވެ. ޕީއެސްޖީއާ އެއް އަހަރު ފަހުން ގުޅުމަށް ފަހު އެ ޓީމާ އެކު ހަ މުބާރާތް ކާމިޔާބުކުރި އެވެ.
މިދިޔަ އަހަރުގެ އޮގަސްޓް މަހު ޓުޗެލް ވަނީ ޕީއެސްޖީއާ އެކު ޗެމްޕިއަންސް ލީގުގެ ފައިނަލުން ބަޔާން އަތުން ބަލިވެފަ އެވެ. މި ފަހަރު ޗެލްސީއާ އެކު އެ މުބާރާތް ކާމިޔާބުކުރީ އެވެ. ޓުޗެލް މިދިޔަ ޑިސެމްބަރު މަހު ޕީއެސްޖީގެ ކޯޗުކަމުން ވަކިކުރީ ފްރެންޗް ލީގުގައި އެ ޓީމުގެ ނަތީޖާތަށް ދަށްވުމުންނެވެ.
ޗެލްސީން އެންމެ ފުރަތަމަ ޗެމްޕިއަންސް ލީގު ކާމިޔާބުކުރީ 2012 ވަނަ އަހަރު، އެ ސީޒަނުގެ މެދުތެރެއިން ޓީމާ ހަވާލުވެ ކޯޗަކަށް މަސައްކަތްކުރި އިޓަލީގެ ކޯޗު ރޮބާޓޯ ޑި މަޓެއޯގެ އިރުޝާދުގެ ދަށުންނެވެ. އެ ފަހަރު ޗެމްޕިއަންސް ލީގުގެ ކާމިޔާބީ އަށް ފަހު އެ އަހަރު ޖޫން މަހު ޑި މަޓެއޯ އަށް ދެ އަހަރުގެ އެއްބަސްވުމެއް ޗެލްސީން ދިނެވެ. އެކަަމަކު ފަހުން ނަތީޖާތައް ދަށްވެ އެ އަހަރު ނޮވެމްބަރު މަހު އޭނާ މަގާމުން ވަކިކުރީ އެވެ.
