އަބީޖާން، އައިވަރީ ކޯސްޓް (ޖޫން 4) - އައިވަރީ ކޯސްޓްގެ ރައްޔިތުންނަށް އެކި ގޮތްގޮތުން އެހީވުމަށް ޑިޑިއޭ ޑްރޮގްބާ ޗެރިޓީ އަށް ކުރާ މަސައްކަތްތަކުގެ އަގުވަޒަން ކުރުމުގެ ގޮތުން އެ ގައުމުގެ ޔުނިވާސިޓީ އަކުން އިސްނަގައިގެން ޑްރޮގްބާ އަށް އޮނަރަރީ ޑިގްރީއެއް ދީފި އެވެ.
ކުރިން ޗެލްސީ އަށް ކުޅެ ބޮޑު މަގުބޫލުކަމެއް ހޯދި އުމުރުން 43 އަހަރުގެ ޑްރޮގްބާ އަށް ޑިގްރީއެއް ދިނީ އައިވަރީ ކޯސްޓުގެ ޔުނިވާސިޓީއެއްގެ އިސްނެގުމާ އެކު އެފްރިކާގެ ގިނަ ގައުމުތަކެއްގެ ޔުނިވާސިޓީތައް އެކުވެގެން އުފައްދާފައިވާ ޖަމިއްޔާއެއް ކަމަށްވާ ރުސްޓާގެ ފަރާތުންނެވެ.
އައިވަރީ ކޯސްޓް ގައުމީ ޓީމަށް 2002-2014 އަށް 105 މެޗުން 65 ގޯލް ޖަހައިދީފައިވާ ޑްރޮގްބާ ވަނީ 2015 ވަނަ އަހަރު އެ ޓީމަށް އެފްރިކަން ކަޕް އޮފް ނޭޝަންސް ކާމިޔާބުކޮށްދީފަ އެވެ. ޑްރޮގްބާ ވަނީ އޭނާ އެންމެ މޮޅަށް ކުޅުނު ޗެލްސީގައި ހުރެ އިނގިރޭސި ޕްރިމިއާ ލީގު ހަތަރު ފަހަރު އަދި ޗެމްޕިއަންސް ލީގު އެއް ފަހަރު ކާމިޔާބުކޮށްފަ އެވެ.
އައިވަރީ ކޯސްޓަށް އެންމެ ގިނަ ގޯލު ޖަހައިދިން ކުޅުންތެރިޔަކީ ޑްރޮގްބާ.
އައިވަރީ ކޯސްޓް ގޮވައިގެން ތިން ވޯލްޑް ކަޕެއްގައި ކުޅުނު ޑްރޮގްބާ ވަނީ އެ ގައުމުގެ މުޖުތަމައުގެ ހަމަޖެހުމަށް ވެސް ގިނަ ކަންތައްތަކެއް ކޮށްފަ އެވެ. އެގޮތުން 2005 ވަނަ އަހަރު ވޯލްޑް ކަޕް ކޮލިފައިންގެ މެޗަކަށް ފަހު ޑްރޮގްބާ ވަނީ ޓީވީ ކެމެރާތައް އައިވަރީ ކޯސްޓުގެ ޗޭންޖިން ރޫމަށް ގެންގޮސްގެން ހާއްސަ އިންޓަވިއުއެއް ދީ ސޫދާނާ ދެކޮޅަށް ކުރާ ހަނގުރާމަ ހުއްޓާލަން އެދިފަ އެވެ. އޭގެ ދުވަސް ކޮޅެއް ފަހުން އެ ހަނގުރާމަ ހުއްޓާލިއިރު، ޑްރޮގްބާ އަށް ގިނަ ބަޔަކު ތައުރީފުކުރި އެވެ.
ޔުނައިޓެޑް ނޭޝަންސް (ޔޫއެން) ޑިވެލޮޕްމަންޓް ޕްރޮގްރާމްގެ ގުޑްވިލް އެމްބަސަޑަރަކަށް ޑްރޮގްބާ ހަމަޖެއްސީ 2007 ވަނަ އަހަރު އެވެ. އަދި 2009 ވަނަ އަހަރު ޑްރޮގްބާ ވަނީ ޕެޕްސީގެ އިޝްތިހާރުތައް ކުޅެގެން އޭނާ އަށް ލިބުނު ތިން މިލިއަން ޑޮލަރުން އަމިއްލަ ގައުމުގައި ހޮސްޕިޓަލެއް އަޅައިފަ އެވެ. އެ ހޮސްޕިޓަލް ވަނީ ކޮވިޑް-19ގެ ކަންތައްތައް ކުރަން އައިވަރީ ކޯސްޓް ސަރުކާރަށް ވަގުތީ ގޮތުން ދޫކޮށްލައިފަ އެވެ.
ފުޓްބޯޅަ އަށް ޑްރޮގްބާ ކޮށްދިން ހިދުމަތްތަކުގެ އަގުވަޒަންކުރުމުގެ ގޮތުން ޔުއެފާ ރައީސް އަލެކްސަންޑަ ކެފެރިން ވަނީ މިދިޔަ އަހަރު ޑްރޮގްބާ އަށް ޔުއެފާގެ ޕްރެޒިޑެންޓްސް އެވޯޑް ދީފަ އެވެ. ކެފެރިން ވިދާޅުވީ ޑްރޮގްބާ އަކީ އެފްރިކާގެ ވަރުގަދަ ފުޓްބޯޅަ ކުޅުންތެރިން ކަމަށްވާ ސެމުއެލް އެޓޫ އާއި ޖޯޖް ވެއާ ފަދަ މަގުބޫލު ސަހުސިއްޔަތެއް ކަމަށެވެ.
ޑްރޮގްބާ އަންނަނީ އައިވަރީ ކޯސްޓްގެ ފުޓްބޯޅަ ފެޑެރޭޝަންގެ އިންތިހާބުގައި ވާދަކުރަމުންނެވެ. މިދިޔަ އަހަރު ބާއްވަން ނިންމި އިންތިހާބުގައި ޑްރޮގްބާގެ ކެންޑިޑެސީ ބަލައިނުގަންނަން އިލެކްޓޯރަލް ކޮމިޓީން ނިންމި މައްސަލަ ހޫނުވެ، ފީފާ އިން ނިންމީ އިންތިހާބު ސަސްޕެންޑްކުރާށެވެ. އަދި ފީފާ އިން ވަނީ މި އަހަރުގެ ނިޔަލަށް އާ އިންތިހާބެއް ބޭއްވުމަށް މެންޑޭޓެއް ދީ ނޯމަލައިޒިން ކޮމިޓީއަކާ އައިވަރީ ކޯސްޓް ފުޓްބޯޅަ ފެޑެރޭޝަން ހިންގުން ހަވާލުކޮށްފަ އެވެ.
