ބާސެލޯނާ (މެއި 31) - ބާސެލޯނާ އަކީ ދުނިޔޭގެ އެންމެ މޮޅު ކްލަބް ކަމަށް އެ ޓީމަށް ދެ އަހަރުގެ އެއްބަސްވުމެއްގެ ދަށުން މިއަދު ބަދަލުވި އާޖެންޓީނާގެ ފޯވާޑް ސާޖިއޯ އަގުއޭރޯ ބުނެފި އެވެ.
އަގުއޭރޯ ވަނީ އިނގިރޭސި ޗެމްޕިއަން މެންޗެސްޓާ ސިޓީ އަށް 10 އަހަރު ވަންދެން ކުޅެފަ އެވެ. ބާސެލޯނާ އަށް ކުޅެން ބޭނުންވާތީ އުމުރުން 32 އަހަރުގެ އަގުއޭރޯ ސިޓީ ދޫކޮށްލީ ހިލޭ ޓްރާންސްފާއެއްގަ އެވެ.
ބާސެލޯނާގެ ރައީސް ކަމާ ދެ ވަނަ ފަހަރަށް ޖޮއާން ލަޕޯޓާ ހަވާލުވުމަށް ފަހު ރަސްމީކޮށް އެ ޓީމާ ގުޅުނު ފުރަތަމަ ކުޅުންތެރިޔަކީ އަގުއޭރޯ އެވެ. އަގުއޭރޯ ބުނީ ބާސެލޯނާގެ ހުށަހެޅުން ލިބުމާ އެކު ދެ ވަނަ ވިސްނުމަކަށް ނުގޮސް ވަގުތުން އެ ކްލަބަށް އަންނަން ބޭނުންވި ކަމަށެވެ.
"އަހަރެމެން އެންމެނަށް އެނގޭ ބާސެލޯނާ އަކީ ދުނިޔޭގެ އެންމެ މޮޅު ކްލަބް ކަން. އަހަރެންގެ ނަޒަރުގައި މި ޓީމާ ގުޅެން ނިންމުމަކީ އަހަރެން ނިންމި ވަރަށް ރަނގަޅު ނިންމުމެއް. އަހަރެންގެ ކެރިއަރުގައި ކުރިއަށް ފިޔަވަޅެއް މި އެޅުނީ. އުއްމީދަކީ ބާސެލޯނާގައި ގިނަ ކާމިޔާބީތަކެއް ހޯދުން،" އަގުއޭރޯ ބުންޏެވެ.
އެތުލެޓިކޯ މެޑްރިޑް ދޫކޮށް 2011 ވަނަ އަހަރު ސިޓީ އަށް ބަދަލުވި އަގުއޭރޯ މި ސީޒަނުގައި ގިނަ މެޗުތަކުގައި ކުޅެފައިވަނީ ބަދަލު ކުޅުންތެރިއެއްގެ ގޮތުގަ އެވެ. އޭނާ ސިޓީ އަށް ކުޅުނު އެންމެ ފަހު މެޗަކީ ހޮނިހިރު ދުވަހުގެރޭ ޗެމްޕިއަންސް ލީގުގެ ފައިނަލްގައި ޗެލްސީ އަތުން ސިޓީ ބަލިވި މެޗެވެ. އެ މެޗުގައި ވެސް އަގުއޭރޯ ކުޅެން އެރީ ބަދަލު ކުޅުންތެރިއެއްގެ ގޮތުގަ އެެވެ.
އަގުއޭރޯ ބާސެލޯނާގެ ކުޅުންތެރިއެއްގެ ގޮތުގައި މީޑިއާ އަށް ތައާރަފްކުރުމުގެ ތެރެއިން.
ސިޓީއާ އެކު އަގުއޭރޯ ވަނީ ބޮޑު 15 މުބާރާތް ކާމިޔާބުކޮށްފަ އެވެ. ސިޓީއާ އެކު ފަސް ފަހަރު ޕްރިމިއާ ލީގު ކާމިޔާބުކޮށްފައިވާ އަގުއޭރޯ އަކީ އެ ކްލަބްގެ ތާރީހުގައި އެންމެ ގިނަ ގޯލު ޖެހި ކުޅުންތެރިޔާ އެވެ. އޭނާ ވަނީ އެ ޓީމަށް 260 ގޯލު ކާމިޔާބުކޮށްދީފަ އެވެ. އަގުއޭރޯ އަކީ ޕްރިމިއާ ލީގުގެ ތާރީހުގައި އެއް ޓީމަކަށް އެންމެ ގިނަ ގޯލު ޖެހި ކުޅުންތެރިޔާ އެވެ. އޭނާ އެ ރެކޯޑް ހެދީ ޕްރިމިއާ ލީގުގައި 184 ގޯލު ޖަހައިގެންނެވެ.
ބާސެލޯނާއާ އެކު އަގުއޭރޯ ސޮއިކުރި އެއްބަސްވުމުގެ މުއްދަތު ހަމަނުވަނިސް އޭނާ ގަންނަން އެހެން ކްލަބަކުން ބޭނުންނަމަ 100 މިލިއަން ޔޫރޯ ހަރަދުކުރަން ޖެހޭނެ އެވެ.
މީގެ ކުރިން އާޖެންޓީނާގެ ޓައިކް ސްޕޯޓްސް އިން ރިޕޯޓްކުރި ގޮތުގައި އަގުއޭރޯ ބާސެލޯނާ އަށް ގެނައުމުގައި ލިއޮނަލް މެސީގެ ދައުރު ބޮޑެވެ. ބާސެލޯނާއާ އެކު މެސީ ހަދާފައިވާ ކޮންޓްރެކްޓް ޖޫން މަހުގެ ނިޔަލަށް ހަމަވާނެ އެވެ. އެކަމަކު ބާސެލޯނާގެ ރައީސް ލަޕޯޓާ ވަނީ މެސީ އެ ކްލަބްގައި މަޑުކުރާނެ ކަމުގެ ޔަގީންކަން އެބައޮތް ކަމަށް ވިދާޅުވެފަ އެވެ.
ބާސެލޯނާ އިން ވަނީ ސިޓީގެ ސްޕެއިން ޑިފެންޑަރު އެރިކް ގާސިއާ ވެސް ހިލޭ ޓްރާންސްފާއެއްގައި ގެންނަން ހުރިހާ ކަމެއް ނިންމައިފަ އެވެ. އަދި ލިވަޕޫލަށް ކުޅުނު ނެދަލެންޑްސްގެ މިޑްފީލްޑަރު ޖިއޮޖީނިއޯ ވައިނަލްޑަމް އާއި ލިޔޯންގެ ފޯވާޑް މެމްފިސް ޑިޕާއި އަދި އޭސީ މިލާންގެ ގޯލްކީޕަރު ޖިއަންލުއީޖީ ޑޮންނަރުންމާ ވެސް ހިލޭ ޓްރާންސްފާއެއްގައި ބާސެލޯނާ އަށް ބަދަލުވާން އަންނަނީ ވާހަކަ ދައްކަމުންނެެވެ.
