ބާސެލޯނާ (މެއި 14) - މެންޗެސްޓާ ސިޓީގެ ފޯވާޑް ސާޖިއޯ އަގުއޭރޯ އަށް ބާސެލޯނާ އިން ލިބިފައިވާ ހުށަހެޅުން ގަބޫލުކޮށް އޭނާ އެ ޓީމަށް ބަދަލުވާން އެއްބަސްވެފައިވާ ކަމަށް އާޖެންޓީނާގެ މީޑިއާ ރިޕޯޓްތައް ބުނެފި އެވެ.
އާޖެންޓީނާގެ ފުޓްބޯޅައިގެ ހަބަރު ގެނެސްދޭ ޓައިކް ސްޕޯޓްސް އިން ރިޕޯޓްކުރާގޮތުގައި މިއަދު ސްޕެއިނުގައި ބޭއްވި މަޝްވަރާތަކަށް ފަހު އަގުއޭރޯ ބާސެލޯނާއާ އެކު ދެ އަހަރުގެ އެއްބަސްވުމެއްގައި ސޮއިކުރާނެ އެވެ. އަދި އެކަން އިއުލާނުކުރާނީ މި މަހު 29 ވަނަ ދުވަހު ސިޓީ ކުޅޭ ޗެމްޕިއަންސް ލީގު ފައިނަލް މެޗަށް ފަހު އެވެ.
އުމުރުން 32 އަހަރުގެ އަގުއޭރޯ ދިހަ އަހަރަށް ފަހު ސިޓީ ދޫކޮށްލާނީ ހިލޭ ޓްރާންސްފާއެއްގަ އެވެ. އަގުއޭރޯ ބާސެލޯނާ އަށް ބަދަލުވަނީ ސިޓީން ލިބޭ ވަރަށް ވުރެ ކުޑަ މުސާރަ އަކަށެވެ. ކުޑަ މުސާރަ އަކަށް އޭނާ ބާސެލޯނާ އަށް ބަދަލުވާން ނިންމީ ކްލަބް ލެވަލްގައި ބާސެލޯނާގެ ކެޕްޓަން ލިއޮނަލް މެސީއާ އެއް ޓީމަށް ކުޅެން ބޭނުންވާތީ ކަަމަށް ޓައިކް ސްޕޯޓްސް އިން ރިޕޯޓްކުރެ އެވެ. އަގުއޭރޯ ވަނީ މެސީއާ އެކު އާޖެންޓީނާ ގައުމީ ޓީމަށް ކުޅެފަ އެވެ.
މި ސީޒަނަށް ފަހު މެސީ ބާސެލޯނާއާ އެކު ހަދާފައިވާ އެއްބަސްވުން ހަމަވާނެ އެވެ. އެކަމަކު އަގުއޭރޯ ގެންނަން ސިޓީން މަސައްކަތްކުރާ އެއް ސަބަބަކީ މެސީ އެ ކްލަބްގައި މަޑުކުރުވުން ކަމަށް ސްޕެއިނުގެ މީޑިއާ ރިޕޯޓްތައް ބުނެ އެވެ.
އަގުއޭރޯ ބާސެލޯނާ އަށް ބަދަލުވެއްޖެނަމަ އޭނާ ވެގެންދާނީ ކުރިއަށް އޮތް ޓްރާންސްފާ މާކެޓްގެ ތެރޭގައި ސިޓީ ދޫކޮށް ބާސެލޯނާއާ ގުޅޭ ދެ ވަނަ ކުޅުންތެރިޔާ އަށެވެ. ސިޓީ އަށް ކުޅޭ އުމުރުން 20 އަހަރުގެ ސްޕެއިން ޑިފެންޑަރު އެރިކް ގާސިއާ ވެސް ވަނީ ކޮންޓްރެކްޓް ހަމަވުމުން މި ފަހަރު ބާސެލޯނާ އަށް ބަދަލުވާން ނިންމައިފަ އެވެ.
އެތުލެޓިކޯ މެޑްރިޑް ދޫކޮށް 2011 ވަނަ އަހަރު ސިޓީ އަށް ބަދަލުވި އަގުއޭރޯ ފަހަކަށް އައިސް ގިނަ މެޗުތަކުގައި ކުޅެފައިވަނީ ބަދަލު ކުޅުންތެރިއެއްގެ ގޮތުގަ އެވެ. ސިޓީއާ އެކު ފަސް ފަހަރު ޕްރިމިއާ ލީގު ކާމިޔާބުކޮށްފައިވާ އަގުއޭރޯ އަކީ އެ ކްލަބްގެ ތާރީހުގައި އެންމެ ގިނަ ގޯލު ޖެހި ކުޅުންތެރިޔާ އެވެ. އޭނާ ވަނީ އެ ޓީމަށް 257 ގޯލު ކާމިޔާބުކޮށްދީފަ އެވެ.
އަގުއޭރޯގެ ސޮއި ލިބިއްޖެނަމަ ބާސެލޯނާ އިން ލިޔޯނަށް ކުޅެމުން އަންނަ ނެދަލެންޑްސްގެ ފޯވާޑް މެމްފިސް ޑިޕާއި ހޯދަން ކުރާ މަސައްކަތް ދޫކޮށްލާނެ އެވެ. ޑިޕާއި ވެސް ލިޔޯނާ އެކު ހުރީ މި ސީޒަނުގެ ނިޔަލަށް ހަދާފައިވާ ކޮންޓްރެކްޓެއްގަ އެވެ.
