ކުރީގެ ރައީސް އަބްދުﷲ ޔާމީންގެ މައްޗަށް އުފުލާފައިވާ މަނީ ލޯންޑަރިން ކުށުގެ ދައުވާ އާއި ރިޝްވަތު ގަބޫލު ކުރުމުގެ ކުށުގެ ދައުވާގެ ޝަރީއަތް، ހަލުވިކަމާއެކު ފެތުރެމުންދާ ކޮވިޑް-19 ގެ ހާލަތު ރަނގަޅު ވަންދެން ފަސްކޮށްދޭން އޭނާގެ ގާނޫނީ ވަކީލުން މިއަދު އެދެފި އެވެ.
އެ ދެ މައްސަލައިގެ ޝަރީއަތް މާދަމާ 9:30 ގައި ކްރިމިިނަލް ކޯޓުގައި ބޭއްވުމަށް އޭޕްރީލް މަހުގެ 27 ވަނަ ދުވަހު ވަނީ ޝެޑިއުލް ކޮށްފަ އެވެ. ޝަރީއަތް ބޭއްވުމަށް ނިންމާފައިވަނީ ގޭ ބަންދުގައި މިހާރު ހުރި ޔާމީން ކޯޓަށް ހާޒިރު ކޮށްގެންނެވެ.
ރައީސް ޔާމީންގެ ގާނޫނީ ޓީމުން ނެރުނު ބަޔާނެއްގައި ބުނީ ކޮވިޑުގެ މި ނުރައްކާތެރި ހާލަތުގައި އެމަނިކުފާނު ކޯޓަށް ހާޒިރު ކުރާނަމަ އެއީ ސިއްހަތު ނުރައްކަލަކަށް ހުށަހެޅޭނެ ކަމެއް ކަމަށެވެ. އަދި އެއީ ގާނޫނު އަސާސީގެ 21 ވަނަ މާއްދާއިން ކަށަވަރުކޮށް ދީފައިވާ ދިރިހުރުމުގެ ހައްގާއި އަމިއްލަ މިނިވަންކަމާއި ނަފްސު ރައްކާތެރި ކުރުމުގެ ހައްގަށް ހުރަސް އެޅޭ ކަމެއް ކަމަށް ވެސް ބަޔާނުގައިވެ އެވެ.
އެހެންކަމުން ކޮވިޑުގެ ހާލަތު ރަނގަޅު ވަންދެން އަޑުއެހުންތައް ފަސްކޮށް ދިނުމަށް ކްރިމިނަލް ކޯޓުގައި އެދިފައިވާނެ ކަމަށް ފަސް ވަކީލުން ނެރުނު ބަޔާނުގައިވެ އެވެ.
މާދަމާއަށް ޝެޑިއުލް ކޮށްފައިވާ ދެ ދައުވާ އުފުލާފައިވަނީ ރިސޯޓެއްގެ ގޮތުގައި ތަރައްގީ ކުރުމަށްޓަކައި ރ. ފުއްގިރި ކުއްޔަށް ދޫކުރުމުގެ މައްސަލައަކާ ގުޅިގެންނެވެ. ޕްރޮސިކިއުޓާ ޖެނެރަލްގެ އޮފީހުން ބުނީ، ޔާމީން ވަނީ ނުފޫޒު ބޭނުންކޮށްގެން މއ.ކުރިކީލަހިޔާ އަހުމަދު ކްރިކް ރިޒާ މެދުވެރިކޮށް ރިޝްވަގުތެގޮތުގައި 1،117،000 ޑޮލަރު ހޯދައި ސަން ކޮންސްޓްރަކްޝަން އެންޑް އިންޖިނިއަރިން އާއި ސަން އިންވެސްޓްމެންޓް ބޭނުންކޮށްގެން އެ ފައިސާ ލޯންޑާކުރުމަށްޓަކައި ބޭނުން ކޮށްފައި ކަމަށެވެ.
ޔާމީންގެ އިތުރުން އެ މައްސަލާގައި ރިޒާއަށާއި ސަން ކޮންސްޓްރަކްޝަން އެންޑް އިންޖިނިއަރިން ކުންފުންޏާއި ސަން އިންވެސްޓްމަންޓް ކުންފުންޏަށް ވެސް ވަނީ ދައުވާ ކޮށްފަ އެވެ. ރިޒާގެ މައްޗަށް ކޮށްފައިވަނީ ރިޝްވަތު ދިނުމުގައި މެދިވެރިއަކަށްވުމުގެ ކުށުގެ ދައުވާ އާއި މަނީ ލޯންޑްރިން ކުށުގެ ދައުވާ އެވެ. ސަންގެ ދެ ކުންފުނީގެ މައްޗަށް އުފުލާފައިވަނީ މަނީ ލޯންޑްރިންގެ ކުށުގެ ދައުވާ އެވެ.
ރިސޯޓެއް ގޮތަށް ތަރައްގީ ކުރުމަށްޓަކައި ވ. އާރަށް ބޭރު ބަޔަކަށް ވިއްކައިގެން ލިބުނު އެއް މިލިއަން ޑޮލަރު (15.3 މިލިއަން ރުފިޔާ) ޔާމީންގެ ބޭންކު އެކައުންޓަކަށް ޖަމާކޮށްފައިވާ ކަމަށް ބުނާ މައްސަލައެއްގައި އޭމާގެ މައްޗަށް ޖިނާއީ ދައުވާ ކުރުމަށް ޕްރޮސެކިއުޓާ ޖެނެރަލްގެ އޮފީހަށް މިދިޔަ މަހު ފުލުހުން ވަނީ ފޮނުވައިފަ އެވެ.
އެމްއެމްޕީއާރްސީ އިން ވަގަށް ނެގި އެއް މިލިއަން ޑޮލަރު އެމަނިކުފާނުގެ އެކައުންޓަކަށް ޖަމާވި މައްސަލައެއްގައި ފަސް އަހަރުގެ ހުކުމެއް މިހާރު ވެސް ތަންފީޒު ކުރައްވަމުން ގެންދަވާ ރައީސް ޔާމީންގެ މައްޗަށް މިފަހަރު ކުރާ ތުހުމަތަކީ ރިޝްވަތު ނެންގެވުމާއި ކަޅު ފައިސާ ދޮވުމުގެ ކުށެވެ.
އާރަށް މައްސަލައިގައި ރައީސް ޔާމީންގެ މައްޗަށް ޕީޖީ ދައުވާ އުފުލައިފި ނަމަ އެ މައްސަލަ ވާނީ އޭނާގެ މައްޗަށް އުފުލާ ހަ ވަނަ ޖިނާއީ ދައުވާއަށެވެ.
ޔާމީން ގޭ ބަންދަށް މިދިޔަ މަހު ފަހުކޮޅު ބަދަލު ކުރީ ޖަލުގައި ކޮވިޑް ފެތުރޭތީ ކަމަށް ބުނެ އެވެ.
