މއ. މޯނިން ވިއުގޭގައި ބުރާސްފަތި ދުވަހު ހިނގި އަލިފާނުގެ ހާދިސާގައި ގެއްލުންވި އާއިލާތަކަށް ދައުލަތުން އެހީތެރިވުމުގެ ގޮތުން އެސެސްމަންޓެއް މާދަމާ ހަދަން ފަށާނެ ކަމަށް ނެޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން މިއަދު ބުނެފި އެވެ.
ހަތަރު ބުރިއަށް ހަދާފައިވާ މުޅި އިމާރާތް އެ ހާދިސާގައި ވަނީ ބޭނުން ނުކުރެވޭ ވަރަށް އަނދައިފަ އެވެ. އެކަމަކު އެއްވެސް މީހަކަށް އަނިޔާއެއް ނުވެ އެވެ.
ނިދާފައި ތިއްބައި ރޯވެ ހިނގި އެ ހާދިސާގައި، އެ ގޭގެ ފަސް އެ ޕާޓްމަންޓެއްގައި ދިރިއުޅޭ 32 މީހެއްގެ ގެދޮރު ގެއްލި ހާލުގައި ޖެހުނެވެ. އެންޑީއެމްއޭ އިން އެ ދުވަހު ވަނީ އެ މީހުން ގެސްޓް ހައުސްތަކަށް ބަދަލުކޮށް ޒަރޫރީ ބޭނުންތައް ފުއްދައިދޭން ފަށައިފަ އެވެ.
އެންޑީއެމްއޭގެ ސީއީއޯ ހިސާން ހަސަން، "އަދަދު" އަށް ވިދާޅުވި ގޮތުގައި އެ އިމާރާތަށް ލިބިފައިވާ ގެއްލުންތަކުގެ އެސެސްމަންޓް ހަދާނީ ޕްލޭނިން މިނިސްޓްރީ އާއި އެމްއެންޑީއެފުންނެވެ. އަދި އެ ގޭގައި ދިރިއުޅުނު މީހުންގެ ހިފާގެންގުޅޭ ތަކެއްޗަށް ލިބުނު ގެއްލުންތައް ބަލާނެ ކަމަށް އޭނާ ވިދާޅުވި އެވެ.
"އެ ގެ އެވަނީ ދިރިނޫޅެވޭ ވަރަށް ހަލާކުވެފައި. އެސެސްމަންޓަށް ފަހު ކަނޑައަޅާނީ ދޭނީ ކިހާވަރެއްގެ އެހީއެއްކަން. އޭރަށް ސާފުވާނެ ލިބުނު ގެއްލުން،" ހިސާން ވިދާޅުވި އެވެ.
އޭނާ ވިދާޅުވީ އެ ގޭގައި ދިރިއުޅުނު 32 މީހުން ވަގުތީ ގޮތުން ތިބީ ގެސްޓް ހައުސްތަކުގައި ކަމަށެވެ. އެ މީހުން އެ ތަންތަނުގައި ތިބޭނެ މުއްދަތަކާއި އެ މީހުންނާ ދޭތެރޭ ދެން އަމަލު ކުރާނެ ގޮތެއް ވެސް ނިންމާނީ އެސެސްމަންޓްތަކަށް ފަހުގައި ކަމަށް ވިދާޅުވި އެވެ.
ގެދޮރު ގެއްލުނު މީހުންނަށް ވަގުތީ ބޯހިޔާވަހިކަމުގެ އިތުރުން ކެއިންބުއިމާއި އަންނައުނުގެ އިތުރުން އެހެން ޒަރޫރީ ތަކެތިވެސް އެންޑީއެމްއޭން އަންނަނީ ފޯރުކޮށްދެމުންނެވެ.
އެ ގޭގައި އަލިފާން ރޯވާން ދިމާވި ސީދާ ސަބަބެއް އަދި ސާފެއް ނުވެ އެވެ. އެކަންކަން ބަލަމުން އަންނަ ކަމަށް ސިފައިން ބުނެ އެވެ.
އެ އަލިފާނުގެ ހާދިސާގައި ލިބުނު ގެއްލުން މިލިއަނުން މައްޗަށް ދާނެ ކަމަށް އެ ގޭގައި ދިރިއުޅޭ މީހުން ބުނެ އެވެ. އަލިފާނުގެ ހާދިސާ ހިނގުމާ އެކު އެމްއެންޑީއެފްއަށް އެންގި ނަމަވެސް ސިފައިން ދިޔަލެއް ލަސްވުމުގެ ޝަކުވާ ގޭގެ މީހުން ކުރެ އެވެ.
