ހަލުވިކަމާ އެކު ރާއްޖޭގައި ފެތުރެމުން އަންނަ ކޮވިޑް-19 ދެ ވަނަ ފަހަރަށް ވެސް ބައެއް މީހުންނަށް ޖެހެމުންދާތީ އެކަމަށް ސަމާލުވުމަށް އައިޖީއެމްއެޗުގެ އެތެރެހަށީގެ ޑރ. މުހައްމަދު އަލީ ގޮވާލައްވައިފި އެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ)ގެ ހިސާބުތަކުން ދައްކާ ގޮތުގައި ރާއްޖޭގައި މިހާރު ވެސް ކޮވިޑް-19 އަށް ކޮންމެ ދުވަހަކު ވެސް 1000 އަށް ވުރެ ގިނަ މީހުން ޕޮޒިޓިވްވެ އެވެ. އޭގެ ތެރެއިން 252 މީހަކަށް ފަރުވާދެނީ އެނދުމަތިކޮށްގެނެވެ. އަދި މިހާރު ވެސް އެ ބައްޔަށް ޕޮޒިޓިވް 24،818 މީހުން ރާއްޖޭގައި އެބަ ތިއްބެވެ.
ކޮވިޑް ފަރުވާ ޓީމުގައި އިސްކޮށް އުޅުއްވާ ޑޮކްޓަރުންގެ ތެރޭގައި ހިމެނިވަޑައިގަންނަވާ ޑރ. މުހައްމަދު އަލީ "އަދަދު"އަށް ވިދާޅުވީ ނަންބަރުތައް ނޭނގުނު ނަމަވެސް ރާއްޖޭގައި ވެސް "ދެ ފަހަރަށް ޕޮޒިޓިވްވާ މީހުން އެބަ ފެނޭ" ކަމަށެވެ.
"ގިނަވަމުންނޭ ނޭނގެ ބުނާކަށް އެކަމަކު ރާއްޖެއިން ވެސް ދެ ފަހަރަށް ޕޮޒިޓިވްވާ މީހުން އެބަ ފެނޭ،" ޑރ. މުހައްމަދު ވިދާޅުވި އެވެ.
ޑރ. މުހައްމަދު އަލީ ވިދާޅުވި ގޮތުގައި ދެ ފަހަރަށް ޕޮޒިޓިވްވާ ސަބަބު ސީދާ ދަނެގަނެވިފައެއް ނުވެ އެވެ. ނަމަވެސް ލަފާ ކުރެއްވެނީ ދެ ވަނަ ފަހަރަށް މީހާ ބަލި ވަނީ ކޮވިޑް-19 ގެ އާ ވޭރިއަންޓެއްގެ ސަބަބުން ކަމަށްވެދާނެ ކަމަށް އޭނާ ވިދާޅުވި އެވެ.
"ބޮޑަށް ހީވަނީ އާ ވޭރިއެންޓެއް އުޅޭތީހެން. އެކަމަކު އަދި އިންވެސްޓިގޭޝަންތަކުގެ ނަތީޖާ ރިޕޯޓުތައް ނުލިބޭތީ ޔަގީންކަމާ އެކު ބުނާކަށް ނޭނގޭ،" ޑރ. މުހައްމަދު ވިދާޅުވި އެވެ. "މޮސްޓް ލައިކްލީ ކޯސްއަކީ އެއީ."
ކޮވިޑު އެއް ފަހަރު ޖެހި ރަނގަޅުވި ނަމަވެސް ރައްކާތެރިކަމުގެ ފިޔަވަޅުތައް ހަނދާންނައްތާނުލުމަށް އޭނާ އިރުޝާދު ދެއްވި އެވެ.
"ރަނގަޅުވި ކަމުގައިވި ނަމަވެސް ޕްރިކޯޝަންތައް ނަގަންޖެހޭނެ. ބައެއް މީހުންނަށް ފަރުވަ ކުޑަކޮށްލެވޭ ރަނގަޅުވީމަ ދެން ނުޖެހޭނެއޭ ހިތައްއަރާ. އެކަމަކު އަތް ދޮވުމާއި މާސް އެޅުން ފަދަ ކަންކަން ދޫކޮށްލައިގެންނުވާނެ،" އޭނާ ވިދާޅުވި އެވެ.
ކޮވިޑް-19 ގެ އާ ވޭރިއަންޓެއް ރާއްޖޭގައި އުޅެމުންދާ ކަމަށް ޑޮކްޓަރުން ވަނީ ބުނެފަ އެވެ. އެހެން ބުނެފައި ވަނީ މި ފަހުން ބަލި ފެތުރޭ މިންވަރު އިތުރުވުމާއި ބަލީގައި ބޮޑުވަރުވާ މީހުންގެ ފުއްޕާމެއަށް ކޮށްފައިވާ އަސަރު އިތުރުވަމުންދާތީ އެވެ.
އޭގެ އިތުރުން ކުރިއާހިލާފަށް މާބަނޑު މީހުންނަށް ކޮވިޑްޖެހި ބަލިބޮޑުވާ މިންވަރު ވެސް އިތުރުވަމުންދާ ކަމުގެ ކަންބޮޑުވުންތައް ޑޮކްޓަރުން އޮތީ މީގެ ކުރިން ދީފަ އެވެ.
ކޮވިޑުގެ ހަތަރު ވަނަ ރާޅައާ އެކު ހާލަތު ގޯސްވެފައި އޮތް އިރު އެންމެ ގިނަ ބަޔަކު މަރުވީ މި މަސް ތެރޭގަ އެވެ. މި މަހުުގެ މަރުތަކާ އެކު މި ބަލީގައި ރާއްޖެ އިން މަރުވި ޖުމްލަ އަދަދު ވަނީ 157 އަށް އަރައިފަ އެވެ.
