ގަޑާންސްކް، ޕޮލެންޑް (މެއި 27) - ޔުއެފާ ޔޫރޮޕާ ލީގުގައި ރޭ މެންޗެސްޓާ ޔުނައިޓެޑް ކޮޅަށް ގޯލު ޖެހުމަށް ފަހު ވިޔަރެއާލްގެ ސްޕެއިން ގައުމީ ޓީމު ފޯވާޑް ޖެރާޑް މޮރޭނޯ، ކޮވިޑް-19 އަށް ވެކްސިން ޖެހުމުގެ މުހިއްމުކަން ބަޔާން ކޮށްދޭން މެސެޖެއް ދީފި އެވެ.
ވިޔަރެއާލުން ޕެނަލްޓީ ޖަހައިގެން 10-11 އިން މޮޅުވި މެޗުގެ ފުރިހަަމަ ވަގުތު ހަމަވިއިރު، ދެ ޓީމު އޮތީ 1-1 އިން އެއްވަރުވެފަ އެެވެ. ރޭގެ މެޗުގައި ވިޔަރެއާލުން ލީޑުނެގީ 29 ވަނަ މިނިޓްގައި މޮރޭނޯ ޖެހި ގޯލުންނެވެ. މޮރޭނޯ މި ގޯލު ޖެހީ ޑެނީ ޕަރޭހޯ ހިލޭ ޖެހުމަކުން ނަގައިިދިން ބޯޅައެއް ގޯލުގެ ކަނަށް އަމާޒުކޮށްލައިގެންނެވެ.
ލަނޑު ޖެހުމަށް ފަހު އުފާފާޅުކުރިއިރު، އުމުރުން 29 އަހަރުގެ މޮރޭނޯ ވަނީ ކެމެރާ ކުރިމަތީގައި ވެކްސިން ޖަހާ މަންޒަރެއް އިޝާރާތުން ދައްކައިފަ އެވެ. އެއީ ކޮވިޑް-19 އަށް ވެކްސިން ޖެހުމަށް ހޭލުންތެރިކުރުމަށް ދިން މެސެޖެއް ކަމަށް މީގެ ކުރިން އޭނާ ވަނީ ސްޕެއިނުގެ މީޑިއާގައި ބުނެފަ އެެވެ.
މޮރޭނޯ ވަނީ ޔޫރޮޕާ ލީގުގެ ފައިނަލުގެ ކުރިން ސްޕެއިނުގެ ޓީވީއެއް ކަމަށްވާ މޮވިސްޓާ ޕްލަސް އަށް ދިން އިންޓަވިއުއެއްގައި ޔޫރޮޕާ ލީގުގެ ފައިނަލުގައި ލަނޑު ޖެހުމަށް ފަހު ވެކްސިންއާ ގުޅުވައިގެން ހާއްސަ ކަމެއް ކުރާނެ ކަމަށް ބުނެފަ އެވެ.
ކޮވިޑް-19ގެ އެކި ރާޅުތަކުގައި ޖެހި ސްޕެއިނުގެ ގިނަ ބަޔަކު ޕޮޒިޓިވްވިއިރު، އެތައް ހާސް މީހުން ވަނީ މަރުވެފަ އެވެ. ރިޕޯޓްތައް ބުނާގޮތުން ސްޕެއިނަކީ ޔޫރަޕްގެ ގައުމުތަކުގެ ތެރެއިން ވެކްސިން ޖަހާ މީހުންގެ ނިސްބަތް އެންމެ ރަނގަޅު އެއް ގައުމެވެ. އެކަމަކު އަދިވެސް އެ ގައުމުގައި ވެކްސިން ޖަހަން ބޭނުންނުވާ ބަޔަކު އުޅޭ ކަމަށް ސްޕެއިނުގެ ޓީވީ ރިޕޯޓްތައް ބުނެ އެވެ. ވެކްސިން ނުޖަހާ މީހުން ގިނަ ވުމަކީ ކޮވިޑް-19ގެ އިތުރު ރާޅެއް އެރިޔަނުދޭން ކުރާ މަސައްކަތަށް އޮތް ހުރަހެއް ކަމަށް ސްޕެއިނުގެ ސަރުކާރުން ދާދި ފަހުން ވެސް ބުނެފައިވެ އެވެ.
މި ސީޒަނަކީ މޮރޭނޯގެ ކެރިއަރުގައި ހާއްސަ އަހަރެކެވެ. އޭނާ ވަނީ މުޅި ސީޒަން އެއްކޮށް ހުރިހާ މުބާރާތެއްގައި 30 ގޯލު ޖަހައިފަ އެވެ. މޮރޭނޯ ވެފައިވަނީ މީގެ 10 އަހަރު ކުރިން ވިޔަރެއާލަށް ކުޅުނު އިޓަލީގެ ފޯވާޑް ޖިއުސިއްޕޭ ރޮސީ އަށް ފަހު އެއް ސީޒަނެއްގައި ވިޔަރެއާލަށް އެ އަދަދަށް ގޯލު ޖެހި ފުރަތަމަ ކުޅުންތެރިޔާ އަށެވެ.
މޮރޭނޯ އަކީ ކުރިއަށް އޮތް ޔޫރޯ ފުޓްބޯޅަ މުބާރާތުގައި ވާދަކުރާ ސްޕެއިން ޓީމުގެ މުހިއްމު ކުޅުންތެރިއެކެވެ. ކެޓަލޫނިއާ ގައުމީ ޓީމަށް ވެސް ކުޅެފައިވާ މޮރޭނޯ ސްޕެއިނަށް ކުޅެން ފެށީ 2019 ވަނަ އަހަރުގެ އޮކްޓޫބަރުގަ އެވެ. ސްޕެއިނަށް ކުޅުނު 10 މެޗުން މޮރޭނޯ ވަނީ ފަސް ގޯލު ޖަހައިފަ އެވެ.
