މއ. މޯނިން ވިއުގޭގައި ހިނގި އަލިފާނުގެ ހާދިސާއާ ގުޅިގެން 32 މީހަކު ހާލުގައި ޖެހިފައިވުމުން އެ މީހުން ގެސްޓް ހައުސްތަކަށް ބަދަލު ކުރުމުގެ މަސައްކަތް، ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން މިއަދު ފަށައިފި އެވެ.
އަލިފާން ރޯވީ، މއ. މޯނިން ވިއުގެ ތިން ވަނަ ފަންގިފިލާގަ އެވެ. އެމްއެންޑީއެފުން ބުނި ގޮތުގައި މި ހާދިސާ ރިޕޯޓްކޮށްފައިވަނީ ފަތިހުގެ 5:00 ހާއިރު ކަމަށާއި، އަލިފާންގަނޑު ނިއްވާލެވުނީ 6:10 ހާއިރު އެވެ.
މި ހާދިސާގައި އެއްވެސް މީހަކަށް ބޮޑު އަނިޔާއެއް ލިބިފައެއް ނުވެ އެވެ. އެކަމަކު ހަތަރު ބުރިއަށް ނަގާފައިވާ އެ ގެއަށް ބޮޑެތި ގެއްލުންތަކެއް ވަނީ ލިބިފަ އެވެ.
އެންޑީއެމްއޭގެ ސީއީއޯ ހިސާން ހަސަން، "އަދަދު" އަށް ވިދާޅުވި ގޮތުގައި އެ ހާދިސާގައި ގެދޮރު ގެއްލުނީ މޯނިން ވިއުގޭގެ ފަސް އެޕާޓްމަންޓެއްގައި އުޅޭ 32 މީހުން ކަމަށާއި އޭގެ ތެރޭގައި ކުޑަކުދިންނާއި އަންހެނުންގެ އިތުރުން އުމުރުން ދުވަސްވީ މީހުން ވެސް ހިމެނޭ ކަމަށެވެ.
ގިޔާސުއްދީން ސްކޫލުގަިއ ވަގުތީ ގޮތުން ބެއިތިއްވުމަށް ފަހު މިހާރު އެ މީހުން ގެސްޓް ހައުސްތަކަށް ބަދަލު ކުރުމުގެ މަސައްކަތް ފަށާފައިވާ ކަމަށް ހިސާން ވިދާޅުވި އެވެ. އަދި އެ މީހުންގެ ތެރޭގައި ކޮވިޑަށް ޕޮޒިޓިވް ވެފައިވާ ތިން މީހުން ތިބިއިރު އެ މީހުން ފެސިލިޓީތަކަށް ބަދަލު ކުރުމުގެ މަސައްކަތް ވެސް ކުރަމުން އަންނަ ކަމަށް އޭނާ ވިދާޅުވި އެވެ.
"ވަކިގޮތެއް ހަމަޖެހެން ދެން ގެސްޓް ހައުސްތަކަށް ބަދަލު ކުރާ މީހުން ތިބޭނީ އެތަންތާގައި،" ހިސާން ވިދާޅުވި އެވެ.
އަލިފާނުގެ ހާދިސާގައި އެ ގެ ވަރަށް ބޮޑަށް އަނދާފައި: އެ ހާދިސާގައި 32 މީހެއްގެ ގެދޮރު ގެއްލުނު-- ފޮޓޯ: ހުސައިން ޝަޔާހް/ އަދަދު
ހިސާން ވިދާޅުވީ އެ މީހުންގެ ކެއުމާއި ޒަރޫރީ ބޭނުންވާ ތަކެތިވެސް އެންޑީއެމްއޭއިން ފޯރުކޮށްދެމުން އަންނަ ކަމަށެވެ.
އެ ގޭގައި އަލިފާން ރޯވާން ދިމާވި ސީދާ ސަބަބެއް އަދި ސާފެއް ނުވެ އެވެ. އެކަންކަން ބަލަމުން އަންނަ ކަމަށް ސިފައިން ބުނެ އެވެ.
