މާލޭގައި ލަކުޑިން ޑެކު އަޅައިގެން ހަދާފައިވާ ގެއެއްގައި މިއަދު ހެނދުނު ރޯވެ ބޮޑަށް އަނދައިފި އެވެ.
އަލިފާން ރޯވީ، މއ. މޯނިން ވިއުގެ ތިން ވަނަ ފަންގިފިލާގަ އެވެ. އެމްއެންޑީއެފުން ބުނި ގޮތުގައި މި ހާދިސާ ރިޕޯޓްކޮށްފައިވަނީ ފަތިހުގެ 5:00 ހާއިރު ކަމަށާއި، އަލިފާންގަނޑު ނިއްވާލެވުނީ 6:10 ހާއިރު އެވެ.
މި ހާދިސާގައި އެއްވެސް މީހަކަށް ގެއްލުމެއް ނުލިބެ އެވެ. އެކަމަކު ހަތަރު ބުރިއަށް ނަގާފައިވާ އެ ގެއަށް ބޮޑެތި ގެއްލުންތަކެއް ވަނީ ލިބިފަ އެވެ.
މޯނިން ވިއު ގޭގައި ދިރިއުޅޭ މީހުން ވަނީ ވަގުތީ ގޮތުން، ގިޔާސުއްދީން ސްކޫލަށް ބަދަލުކޮށްފަ އެވެ. އެ ގޭގައި ގާތްގަނޑަކަށް 40 މީހުން ދިރިއުޅެ އެވެ.
އެ ގޭގެ ދެ ވަނަ ފްލޯގައި ދިރިއުޅޭ މިހަކު "އަދަދު"އަށް ބުނިގޮތުގައި އަލިފާން ރޯވީ ތިން ވަނަ ފްލޯގަ އެވެ. އެ ބައިގައި ހުރި ހުރިހާ ސާމާނެއް އަނދައި ހުލިވެފައިވާ ކަމަށް އޭނާ ވިދާޅުވި އެވެ. އޭގެ ތެރޭގައި ކޮމްޕިއުޓަރާ އެކު އިލެކްޓްރޯނިކް ސާމާނުތައް ހިމެނެ އެވެ.
"މިކަން މި ހިނގީ ކިހިނެއް ކަމެއް އަދި ނޭނގެ،" އޭނާ ބުންޏެވެ.
ޑިފެންސް މިނިސްޓަރ މާރިޔާ އަހްމަދު ދީދީ ވިދާޅުވީ "މިއީ ވަރަށް ހިތާމަވެރި ހާދިސާއެއް" ކަމަށެވެ.
އެމްއެންޑީއެފުން ބުނި ގޮތުގައި ހާދިސާގެ ރިޕޯޓް ލިބުނުތާ ދެ މިނެޓްގެ ތެރޭގައި ފަޔާ އެންޑް ރެސްކިއު ޓީމަށް އަލިފާނުގެ ހާދިސާ ހިނގި ސަރަހައްދަށް ހާޒިރުވެވުނެވެ.
ނަމަވެސް، ސިފައިން ހާޒިރުވިލެއް ލަސްވުމުގެ ސަބަބުން މާލޭ ސިޓީގެ މޭޔަރ ޑރ. މުހައްމަދު މުއިއްޒު ކަންބޮޑުވުން ފާޅުކުރެއްވެވި އެވެ.
އަލިފާންގެ ހާދިސާ ހިނގި ގޭގައި ދިރިއުޅޭ މީހުންނާ ހަވާލާ ދީ މުއިއްޒު ވިދާޅުވީ އެމްއެންޑީއެފްގެ ފަޔާ އެންޑް ރެސްކިއު ޓީމް ހާޒިރުވެވުނީ ހަލިފާނުގެ ހާދިސާ ހިނގިތާ ގާތްގަނޑަކަށް 50 މިނެޓް ފަހުން ކަމަށެވެ.
"އެ ބޭފުޅުން ވިދާޅުވާ ގޮތުން 50 އަކަށް މިނެޓް ދިޔަ އެޓެންޑް ވުމަށް. ވަރަށް ކުޑަ އަލިފާނުގެ ހާދިސާއެއް. ނަމަވެސް ފަޔާއެންޑް ރެސްކިއުއިން ގެންދިޔަ ގޮތުން މިހާ ބޮޑު ހާދިސާއެއް ހިނގައިގެން ދިޔައީ. މި ގޭގެ ރައްޔިތުންގެ ވަރަށް ބޮޑު ޝަކުވާ އެބަ ހުރި. ފަޔާ އެންޑް ރެސްކިއުއާ ބައްދަލުކުރަންޖެހޭ،" މުއިއްޒު ވިދާޅުވި އެވެ.
"ކުޑަ ގެއްލުމަކުން ހިފެހެއްޓެއް އޮތް ހާދިސާއެއް، ބޮޑުވެގެން ދިޔައީ،"
މި ހާދިސާއަށް ފަހު ހުރިހާ ކަމެއްގައި ވެސް މާލޭ ސިޓީން ވެދެވެން ހުރި ހުރިހާ އެހީތެރިކަމެއް ދޭނެ ކަމަށް މުއިއްޒު ވިދާޅުވި އެވެ.
މުއިއްޒުގެ ވާހަކައަށް ރައްދު ދެއްވައި މާރިޔާ ވިދާޅުވީ އަލިފާނުގެ ހާދިސާއަށް ފަހު ސިފައިން އަމަލުކުރި ގޮތާ ގުޅޭ ގޮތުން ޝަކުވާއެއް އުޅޭ ނަމަ، އެކަން ރަނގަޅުކުރާނެ ކަމަށެވެ.
މިހާތަނަށް މާލޭގައި ހިނގާފައިވާ އަލިފާނުގެ ހާދިސާތަކުގައި ސިފައިން އަމަލުކޮށްފައި ވަނީ ވަރަށް ރަނގަޅަށް ކަމަށާއި ހާދިސާއާ ގުޅޭ މައުލޫމާތު އިތުރަށް ދެއްވާނެ ކަމަށް މާރިޔާ ވިދާޅުވި އެވެ.
