މާލެ ސަރަހައްދުގެ އިތުރުން އަތޮޅު ތެރޭގައި ވެސް ކޮވިޑް-19 އިންތިހާއަށް ފެތުރިފައިވާއިރު، މާދަމާ އިން ފެށިގެން އަތޮޅު ތެރޭގައި ވެސް ބަލި ފެތުރުން ކޮންޓްރޯލް ކުރަން އަޅާފައިވާ ފިޔަވަޅުތައް އިތުރަށް ވަރުގަދަ ކުރަން ނިންމައިފި އެވެ.

މޮނީޓަރިންގެ ހާލަތުގައި މިވަގުތު 74 ރަށެއް އޮތްއިރު، އިތުރު ފިޔަވަޅުތައް އަޅަން ނިންމާފައިވަނީ އެ ރަށްރަށުގަ އެވެ. އޭގެ ތެރެއިން ބައެއް ރަށްރަށުގައި މިހާރު ވެސް ކާފިއު ހިންގަމުން ދިޔަ ނަމަވެސް، މާދަމާއިން ފެށިގެން ހުރިހާ ރަށެއްގައި ކާފިއު ހިންގަން ފަށާނެ އެވެ.

އެގޮތުން، އެޗްޕީއޭއިން މިއަދު ނެރުނު އެންގުމުގައިވާ ގޮތުން މޮނީޓަރިންގެ ހާލަތަށް ލާފައިވާ ކޮންމެ ރަށެއްގައި ވެސް ރޭގަނޑު 9:00 ން ފެށިގެން ފަތިހު 4:00 އަށް، އެއްގަމު އުޅަނދުފަހަރު ދުއްވުމާއި، މަގުމައްޗާއި އާންމު ތަންތަނަށް މީހުން ނުކުތުން މަނާވާނެ އެވެ.

ނަމަވެސް، ރަށުގައި ބަލިފެތުރުމުގެ ހާލަތަށް ބަލައި އެ ފިޔަވަޅު އަޅައިފައިވާ ވަގުތަށް ބަދަލުގެނެވޭނެ ކަމަށް އެންގުމުގައިވެ އެވެ. އެގޮތުން، އައްޑޫ ސިޓީ، ފުވައްމުލައް ސިޓީ، ލ. ގަން، ގދ. ތިނަދޫ، ގއ. ދާންދޫ، އއ. މާމިގިލި، ފ. ނިލަންދޫ އަދި ފީއަލީގައި ކާފިއުގެ ވަގުތު ވަނީ އިތުރުކޮށްފަ އެވެ.

އެއީ، ހަވީރު 4:00 ން ފެށިގެން ފަތިހު 4:00 އާ ހަމައަށެވެ. މި ރަށްރަށަކީ މާލެ ފިޔަވައި ދެން ކޮވިޑްގެ ހާލަތު އެންމެ ގޯސް ރަށްރަށެވެ.

ކާފިއު ހިންގުމުގެ އިތުރުން މޮނީޓަރިންގެ ހާލަތަށް ގެނެވޭ ރަށްތަކުގައި އިތުރު ފިޔަވަޅުތައް އަޅަން ވެސް ވަނީ ނިންމައިފަ އެވެ.

އެގޮތުން، އެފަދަ ރަށްރަށުގައި އެއް ފަހަރާ ތިން މީހުންނަށް ވުރެ ގިނައިން އެއްވެ ނޫޅުމާއި، ސްކޫލްތަކުގެ ކިޔެވުން އޮންލައިންކޮށް ކުރިއަށް ގެންދިޔުމުގެ އިތުރުން ކެފޭ ރެސްޓޯރަންޓްތަކުން ހަމައެކަނި ޑެލިވަރީ ހިދުމަތް ދެވޭ ގޮތަށް ވަނީ ބަދަލުކޮށްފަ އެވެ.

މާދަމާ އިން ފެށިގެން އަޅަން ފަށާ ފިޔަވަޅުތައް

• ރޭގަނޑު 9:00 އިން ފަތިހު 4:00 އަށް ކާފިއު ހިންގުން.
• ޒަރޫރީ ބޭނުންތަކުގައި މެނުވީ ގެއިން ބޭރަށް ނުނިކުތުން.
• ޕާޓީތަކާއި، ޙަފްލާތަކާއި، ރަސްމިއްޔާތުތައް ބޭއްވުން ހުއްޓައިލުން.
• އެއް ގެއިން އަނެއް ގެއަށް ޒިޔާރަތް ކުރުން ހުއްޓައިލުން.
• 5 .އެއްފަހަރާ ތިން މީހުންނަށްވުރެ ގިނަމީހުން މަގުމައްޗާއި އާންމު ތަންތާނގައި އެއްވެއުޅުން ހުއްޓައިލުން.
• ސެލޫންތަކާއި، ޖިމްތާކާއި، ބޯކޮށާ ތަންތަން ބަންދުކުރުން.
• ހުރިހާ ކުޅިވަރު ހަރަކާތްތަކާއި، ކަސްރަތުގެ ހަރަކާތްތައް ހިންގުން ހުއްޓައިލުން.
• ފިހާރަތަކުން ޚިދުމަތް ދޭއިރު، އެޗްޕީއޭގެ ގައިޑްލައިނާ އެއްގޮތަށް ހިދުމަތް ދިނުން.
• ޔުނިވާސިޓީތަކާއި ކޮލެޖްތަކަށް ދަރިވަރުން ހާޒިރުވެގެން ކުލާސްތައް ކުރިޔަށް ގެންދިޔުން ހުއްޓައިލުން.
• ހޮޓާތަކާއި، ކެފޭތަކާއި، ރެސްޓޯރަންޓުތަކާއި، ކާބޯތަކެތީގެ ހިދުމަތް ދޭ ތަންތަނުން ދެމުންގެންދާ ހަމައެކަނި ޓޭކްއަވޭއާއި ޑެލިވަރީގެ ހިދުމަތަށް ބަދަލުކުރުން.

އެޗްޕީއޭއިން އާއްމުކޮށްފައިވާ ތަފާސް ހިސާބުތަކަށް ބަލާއިރު، އިއްޔެ 1،417 މީހުންނަށް އަލަށް ކޮވިޑު ޖެހިފައިވާއިރު، އޭގެ ތެރެއިން 303 ކޭހަކީ މާލެ ފިޔަވައި މީހުން ދިރިއުޅޭ އެހެން ރަށްތަކުން ޕޮޒިޓިވްވި މީހުންނެވެ.

ބަލި ޖެހޭ މީހުންގެ އިތުރުންގެ ކޮވިޑު ޖެހިގެން މަރުވާ މީހުންގެ އަދަދު ވެސް ވަނީ އިންތިހާއަށް އިތުރުވެފަ އެވެ.

މިގޮތުން އިއްޔެގެ ރެކޯޑު 13 މަރާއެކު މި މަހު އެކަނި ވެސް ކޮވިޑް ބަލީގައި މަރުވި މީހުންގެ އަދަދު ވަނީ 69 އަކަށް އަރާފަ އެވެ. ބަލީގައި ރާއްޖޭން ޖުމްލަ މަރުވި މީހުންގެ އަދަދު 142 އަކަށް އަރަ އެވެ.

މީހުން މަރުވާ މިންވަރު އިތުރުވެފައިމިވަނީ ކޮވިޑަށް ރައްކާތެރިވުމުގެ ވެކްސިން ވެސް ޖަހަން ފަށާފައިވަނިކޮށެވެ. ކޮވިޑް ވެކްސިނަކީ، ބަލީގައި ހާލު ބޮޑުވުމުން ދުރުކޮށްދޭ އެއްޗެކެވެ. ނަމަވެސް، ގިނަ ބަޔަކަށް ކޮވިޑްގެ ދެވަނަ ޑޯޒު ވެކްސިން ނެތުމުގެ ސަބަބުން ވަނީ ނުޖެހި އެވެ.

ރާއްޖޭގައި ހަތަރު ވަނަ ރާޅަކާ ހަނގުރާމަ ކުރަމުންދާއިރު، ސިއްހީ ހިދުމަތްތެރިން ބުރަކޮށް މަސައްކަތް ކުރަން ޖެހުމުގެ ކަންބޮޑުވުން ވެސް އެބަ އޮތެވެ. ކޮވިޑް ފެސިލިޓީތަކާއި އައިސީޔޫތައް ވެސް ފުރިފައިވާއިރު، އެތަންތަނުގައި ބަލި މީހުން ބެލުމަށް އިންސާނީ ވަސީލަތްތައް މަދެވެ.

އެހެންނަމަވެސް، ބަލި މީހުންގެ ފަރުވާއަށް އެއްވެސް އިހުމާލެއް ނޯންނާނެ ކަމުގެ ޔަގީންކަން އެޗްޕީއޭ އިން ދެ އެވެ.

ކޮވިޑްގެ ހާލަތު ގޯސްވަމުންދާތީ، ސަރުކާރުން ވަނީ މާލޭގައި ފިޔަވަޅުތައް ވަރަށް ބޮޑަށް ހަރުކަށި ކުރަން ނިންމާފަ އެވެ. އެގޮތުން ކާފިއުގެ ގަޑި ހަވީރު 4:00 ން ހެނދުނު 8:00 އަށް އިތުރުކޮށް އެ ނޫން ވަގުތުގައި ވެސް ހުއްދަ ނުލާ ނޫން ގޮތަކަށް ބޭރަށް ނުކުމެ ނޫޅެވޭ ގޮތަށް އަންނަ ބުދަ ދުވަހުން ފެށިގެން ހަދަން ވަނީ ނިންމާފަ އެވެ.