ކާފިއު ގަޑިތަކުގައި ވެސް ބޭރަށް ނުކުމެވޭ އަދަދު ލިމިޓުކުރަން އަންނަ ބުދަ ދުވަހުން ފެށިގެން ކޮންމެ ގެއަކަށް ދެ ފާސް ދޫކުރާ ގޮތަށް މިއަދު ހަމަޖައްސާފައިވާއިރު، އެ ފާސް ހޯދަން ގިނަ ބަޔަކު އެއްފަހަރާ މަސައްކަތް ކުރަން ފެށުމުން ފުލުހުންގެ ޕޯޓަލަށް ބުރޫއަރައިފި އެވެ.

ކޮވިޑް-19ގެ ހާލަތު އިންތިހާއަށް ގޯސްވެ، ޕޮޒިޓިވްވާ މީހުންގެ ނަންބަރުތައް އަދިވެސް ކޮންޓްރޯލް ކުރެވިފައިނުވާއިރު، މިހާރު ހަވީރު 4:00 އިން ފަތިހު 4:00އަށް އިއުލާނުކޮށްފައިވާ އެގަޑި ބުދަ ދުވަހުން ފެށިގެން ކާފިއު ގަޑި ހަތަރު ގަޑިއިރަށް އިތުރުން ހެނދުނު 8:00 އާ ހަމައަށް ދަންމާލާފައިވެ އެވެ.

ކުރިއާ ހިލާފަށް ކާފިއު ގަޑީގައި ވެސް ކޮންމެ ގެއަކުން ބޭރަށް ނުކުމެވޭ އަދަދު ވެސް ލިމިޓު ކުރަން ނިންމާފައިވާ ކަމަށެވެ.

އެގޮތުން، އެ ގަޑީގައި ކޮންމެ ގޭބީސީއަކަށް ދެ ފާސް ލިބޭއިރު، ކާފިއު ނޫން ގަޑިތަކުގައި ވެސް ބޭރަށް ނުކުމެވޭނީ އެ ފާސް އޮންނަ ފަރާތްތަކަށް އެކަނި ކަމަށާއި އެ ގަޑީގައި ފާސް ނެތް މީހަކު ބޭރަށް ނުކުތުން ވަނީ މަނާކޮށްފަ އެވެ.

މިރޭ 8:00 އިން ފެށިގެން އެ ފުލުހުންގެ ޕޯޓަލް މެދުވެރިކޮށް ފާހަށް އެދުމުގެ ފުރުސަތު ހުޅުވާލެވިފައިވާއިރު، ޕޯޓަލް މަސައްކަތް ނުކުރާ ކަމުގެ ޝަކުވާތައް ދަނީ ކުރަމުންނެވެ.

ބުދަ ދުވަހުން ފެށިގެން ހަރުކަށި ކުރާ ފިޔަވަޅުތައް

• ހަވީރު 4:00 އިން ހެނދުނު 8:00 އަށް ކާފިއު.
• ކާފިއު ނޫން ގަޑިތަކުގައި ވެސް ބޭރަށް ނުކުމެވޭނީ ފާސް އޮންނަ މީހުން.
• ކޮންމެ ގޭބީސީއަކަށް ދޫކުރެވޭނީ ދެ ދަންފަޅިއަކަށް ބަހާލައިގެން ދެ ފާސް.
• ކާފިއު ގަޑިތަކުގައި ޑެލިވަރީ ފިޔަވައި އެހެން ހިދުމަތެއް ދިނުން މަނާ.
• ޑެލިވަރީ ހިދުމަތް ދެވޭނީ ހެނދުނު 6:00 އިން ދަންވަރު 12:00 އަށް
• ކޮންސްޓްރަކްޝަން ސައިޓުތަކުގައި މަސައްކަތް ކުރުން ދެ ހަފްތާއަށް ހުއްޓާލުން.
• ފާސް ނެތް މީހަކަށް ކަސްރަތު ކުރަން ބޭރަށް ނުކުތުން މަނާ.
• ހުއްދަ ދޭ އަމިއްލަ އޮފީސްތައް ފިޔަވައި އެހެން ތަންތަން ބަންދުކުރުން.

އެކަމާ ގުޅިގެން ފުލުހުން ބުނީ އެއް ވަގުތެއްގައި ގިނަ ބަޔަކު ޕޯޓަލަށް ވަނުމުގެ ސަބަބުން ދަތިތަކެއް ކުރިމަތިވަމުންދާ ކަމަށެވެ.

އެ ހިދުމަތް ދިނުމުގައި ލަސްތަކެއް ދިމާވަމުންދާތީ ރައްޔިތުންގެ ކެތްތެރިކަމާއި އެއްބާރުލުމަށް ފުލުހުން ވަނީ އެދިފަ އެވެ.

މިރޭ ދޫކުރަން ފެށި ފާސް ވަނީ ވަކި ގަޑިތަކަކަށް ބަހާލާފައި އެވެ.

އަދި އެ ފާސް ދޫކޮށްފައި އޮންނާނީ ވަކި މީހަކަށް ކަމަށާއި އެ ފާސް ދޫކޮށްފައިވާ ފަރާތް ނޫން ފަރާތަކަށް އެ ފާހުގައި ބޭރަށް ނުކުތުން މަނާވާނެ ކަމަށް ފުލުހުން ވަނީ ބުނެފަ އެވެ.

އަދި ކާފިއު ހިންގާފައިވާ ގަޑިތަކުގައި އެ ފާސް ބޭނުންނުކުރެވޭނެ ކަމަށް ފުލުހުން މިއަދު ބުންޏެވެ.

މިގޮތުން، އެއް ފާސް ދޫކުރެވިފައި އޮންނާނީ ހެނދުނު 8:00 އިން މެންދުރު 12:00 އާ ހަމައަށް އަދި ދެވަނަ ފާސް އޮންނާނީ މެންދުރު 12:00 އިން ހަވީރު 4:00 އަށް ކަމަށެވެ.

މާލޭގެ ގެއަކަށް ދޫކޮށްފައިވާ ފާހެއް ބޭނުންކޮށްގެން ހުޅުމާލެއަށް ނުވަތަ ވިލިމާލެއަށް ދަތުރު ނުކުރެވުނު ނަމަވެސް، ވިލިމާލެއަށް ދޫކޮށްފައިވާ ފާހެއްގައި މާލެ އައުމަށް ހުރަހެއް ނެތެވެ.