ރައްޔިތުންގެ މަޖިލީހުގެ ޖަލްސާތައް އޮންލައިންކޮށް ކުރިއަށް ގެންދަން ނިންމައިފި އެވެ.
މަޖިލީހުގެ އިދާރާއިން މިއަދު ބުނީ އޮންލައިންކޮށް ޖަލްސާތައް ކުރިއަށް ގެންދަން ފަށާނީ މާދަމާއިން ފެށިގެން ކަމަށެވެ. އޮންލައިންކޮށް ޖަލްސާތައް ކުރިއަށް ގެންދަން ބޭނުންވާ އިންތިޒާމުތައް މަޖިލީހުން މިހާރު އަންނަނީ ހަމަޖައްސަމުންނެވެ.
އެގޮތަށް ނިންމި ސަބަބެއް ކަމަށް މަޖިލީހުން ބުނީ، ކޮވިޑްގައި ޕޮޒިޓިވްވާ މީހުންގެ އަދަދު އިތުރުވަމުންދާ ދަނޑިވަޅުގައި އެޗްޕީއޭގެ ގައިޑްލައިނާ އެއްގޮތަށް ޖަލްސާތައް ކުރިއަށް ގެންދިއުން ކަމަށެވެ.
ރައްޔިތުންގެ މަޖިލީހުގެ މި ދައުރުގެ ޖަލްސާތައް މަޖިލީހުގެ އިދާރާގައި ކުރިއަށް ގެންދަނީ ސަލާމަތީ ކަންކަން ވެސް ވަރުގަދަކޮށްގެންނެވެ.
އެގޮތުން، މަޖިލިސް ކުރިއަށްދާ ވަގުތު މަޖިލިސް ހިމެނޭ ސަރަހައްދު ބަންދުކޮށް، ފުލުހުންނާއި ސިފައިން ހަރަކާތްތެރިވެ އެވެ. މިގޮތަށް އަމަލު ކުރަމުން ދަނީ މަޖިލީހުގެ ރައީސް، ރައީސް މުހައްމަދު ނަޝީދަށް ދިން ހަމަލާއަށްފަހު މަޖިލީހަށް ވެސް ނުރައްކަލުގެ އިންޒާރެއް ލިބިފައިވާތީ އެވެ.
މާލޭގައި ކޮވިޑް އެންމެ ފުރަތަމަ ފެތުރެން ފެށުމާއެކު ވެސް މަޖިލީހުގެ ޖަލްސާތައް އޮންލައިންކޮށް ކުރިއަށް ގެންދިޔަ އެވެ. ނަމަވެސް، ޖަލްސާތަކުގައި އެންމެ ރަނގަޅަށް ބަހުސްކޮށް މަސައްކަތް ނުކުރެއްވޭ ކަމަށް ވިޑާޅުވެ މަޖިލީހުގެ ރައީސް ނިންމެވީ މާސްކު އަޅައިގެން ޖަލްސާތައް ބޭއްވުމަށެވެ.
އޭގެފަހުން މިއަދާ ހަމައަށް ޖަލްސާތައް އެގޮތުގައި ކުރިއަށް ގެންދިޔަ ނަމަވެސް، މެންބަރުން ވާހަކަ ދައްކަވާއިރު މާސްކު ބޭނުމެއް ނުކުރެ އެވެ.
