ހިޔާ މަޝްރޫއުގެ ފްލެޓް ލިބޭ މީހުންގެ ފައިނަލް ލިސްޓުހައުސިން މިނިސްޓްރީން ހިއްސާކޮށްފައިވީ ނަމަވެސް ކޮވިޑުގެ ސަބަބުން ހުއްޓިފައި އޮތް ގުރުއަތުލުން އަލުން ފެށޭނެ ދުވަހެއް ނޭނގޭ ކަމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ން މިއަދު ބުނެފި އެވެ.
އެޗްޑީސީން ހިޔާ ފްލެޓްތަކުގެ ގުރުނެގުން ހުއްޓާލީ ހައުސިން މިނިސްޓްރީން ބައެއް ކެޓަގަރީތަކުން ފައިނަލް ލިސްޓު ނުލިބިގެންނެވެ. ހިޔާ ފްލެޓް ލިބޭ މީހުންގެ ފައިނަލް ލިސްޓު މިހާރި ފޮނުވާފައި އޮތް ނަމަވެސް ރާއްޖޭގެ ކޮވިޑުގެ ހާލަތާ ގުޅިގެން އެޗްޑީސީން އޮތީ ހިޔާ މަޝްރޫއުގެ ގުރުނެގުން މެދުކަނޑާލައިފަ އެވެ.
ހިޔާ ފްލެޓްތަކުގެ ގުރުއަތު ނެގުމާ ގުޅޭ ގޮތުން އެޗްޑީސީގެ މީޑިއާ އޮފިޝަލް އައިޝަތު ހަސްނާ "އަދަދު"އަށް ވިދާޅުވީ، ގުރުއަތުލުން އަލަން ފަށާނެ ތާރީހެއް އަދި ކަނޑައަޅާފައި ނުވާ ކަމަށެވެ. ކޮވިޑާ ގުޅިގެން ބަލަން ޖެހޭ ކަންކަން ބެލުމަށް ފަހު ގުރުނެގުން ފަށާނެ ތާރީހެއް އެޗްޑީސީން އިއުލާނުކުރާނެ ކަމަށް އޭނާ ބުންޏެވެ.
މި ފްލެޓްތަކުގެ ގުރުއަތުލުން އެންމެ ފަހުން ބޭއްވީ މި މަހުގެ 4 ވަނަ ދުވެހެވެ. އެހާތަނަށް މިނިސްޓްރީން ފޯރުކޮށްދިން ލިސްޓުތަކުގައި އޮތް މީހުންގެ ގުރުނެގުން ނިންމާލާފައިވާ ކަމަށް އެޗްޑީސީން ބުންޏެވެ.
ދައުލަތުގެ މީޑިއާގެ ޔެސް ޓީވީން ވަގުތުން ދުރަށް ދެއްކި ގުރުނެގުމުގެ އިވެންޓު ކުރިއަށް ދިޔައީ، އެ މީހަކަށް ފްލެޓް ލިބޭ ޓަވަރާއި، ފަންގިފިލާ އަދި އެޕާޓްމަންޓް ނަމްބަރު ފެންނަ ގޮތަށެވެ.
އެޗްޑީސީން ކުރިން ބުނެފައި ވަނީ ހަފުތާއެއްގެ ތެރޭގައި ގުރުއަތުލުން ނިންމާލެވޭނެ ކަަމަށެވެ. އެކަމަކު މިހާތަނަށް ދިން ތާރީހްތަކަށް ފްލެޓަށް ނުވަދެވި ދިގުލައިގެން ދިޔަ ގޮތަށް ގުރުއަތު ނިންމަން ބުނި މުއްދަތުގައި ވެސް އެކަން ނުވުމުން ގިނަ ބަޔަކު ދަނީ ހިތްހަމަނުޖެހުންފާޅުކުރަމުންނެވެ.
މި މަޝްރޫއުގެ ދަށުން ހުޅުމާލެ ދެވަނަ ފިޔަވައްސަށް 6720 އަށް ވުރެ ގިނަ އާއިލާ ބަދަލުވާ އިރު، ފިނިޝިން މަސައްކަތާއި އެޕާޓްމަންޓުގެ އެހެނިހެން މަސައްކަތްތައްކޮށް ނިންމުމަށް ފަހު އެޕާޓްމަންޓުގައި ދިރިއުޅެން ފަށަން ވެސް ދުވަސްތަކެއް ނަގާނެ ކަމަށް ބެލެވެ އެވެ.
އެޗްޑީސީގެ އަމާޒަކީ އަންނަ މަހުގެ ތެރޭގައި ފްލެޓް ލިބޭ އެންމެންނާ އެކު އެގްރީމަންޓު ކުރުމަށް ފަހު، ތަޅުދަނޑިތައް ހަވާލުކުރުމަށެވެ.
