ށ. ޅައިމަގު ސްކޫލްގައި ކިޔަވައިދޭ އިންޑިއާ ޓީޗަރަކު އިޒްރޭލަށް ތާއިދުކުރި ކަމަށް ބުނެ ރައްޔިތުން ނުރުހުން ފާޅުކުރުމުން، އެ ޓީޗަރު ރަށުން ބާލަން ޖެހިއްޖެ އެވެ.
ފުލުހުންގެ މީޑިއާ އޮފިޝަލް ވިދާޅުވި ގޮތުގައި ބިދޭސީ ޓީޗަރަކާމެދު ޅައިމަގު ރައްޔިތުން ހިތްހަމަނުޖެހުން ފާޅުކޮށް، އެ ރަށުން ބާލަން ގޮވާލަމުން ދިޔައީ ކަމަށެވެ.
"އެކަމާ ގުޅިގެން ޓީޗަރުގެ ރައްކާތެރިކަމަށްޓަކައި ފުލުހުންގެ ބެލުމުގެ ދަށުން ރޭ އެ ރަށުން އެ ޓީޗަރު ބާލާފައިވޭ،" ފުލުހުންގެ މީޑިއާ އޮފިޝަލް ވިދާޅުވި އެވެ.
އިޒްރޭލަށް ސަޕޯޓް ކުރާ ކަމަށް ފޭސްބުކްގައި ލިޔުނު ހދ. ހަނިމާދޫ ސްކޫލްގެ އިނގިރޭސި ކިޔަވައިދޭ އިންޑިއާ ޓީޗަރަކާމެދު އެ ރަށުގެ ރައްޔިތުން ވެސް މިދިޔަ ބުރާސްފަތި ދުވަހު ނުރުހުން ފާޅުކޮށްފައިވެ އެވެ.
އެކަމާ ގުޅިގެން ހަނިމާދޫ ސްކޫލުން ވަނީ އޭނާ ވަޒީފާއިން ވަކިކޮށް އަނބުރާ ގައުމަށް ފޮނުވާލާފަ އެވެ. އެ ޓީޗަރާމެދު އެގޮތަށް ކަންތައް ކުރީ އޭނާއަށް ކުރިމަތިވެދާނެ ނުރައްކަލަކުން ސަލާމަތްވާން އޮތް ގޮތަކީ ވެސް އެއީ ކަމުގައިވާތީ ކަމަށް ސްކޫލުން ބުނެފައިވެ އެވެ.
އިޒްރޭލުން ފަލަސްތީނުގެ ގާޒާއަށް ދެމުން ގެންދިޔަ ހަމަލާތަކާ ގުޅިގެން ފަލަސްތީނާއެކު ތިބިކަން ހާމަކޮށް އިޒްރޭލާ ދެކޮޅަށް ގިނަ ރަށްރަށުގައި ވަނީ ހަރަކާތްތައް ހިނގާފަ އެވެ. އެގޮތުން ސްކޫލްތަކުގެ ދަރިވަރުންނާއި ޓީޗަރުން ގުޅިގެން ހަރަކާތްތައް ކުރިއަށް ގެންގޮސްފައިވެ އެވެ.
މިފަދަ ބައެއް ހަރަކާތްތަކުގައި ބިދޭސީ ޓީޗަރު ވެސް ބައިވެރިވެފައިވެ އެވެ.
