ބާސެލޯނާ (މެއި 22) - އަންނަ މަހުގެ ނިޔަލަށް ބާސެލޯނާގެ ކޮންޓްރެކްޓްގައި ހުރި ލިއޮނަލް މެސީ، ސްޕެނިޝް ލީގުގެ ފަހު މެޗުގައި މިރޭ ނުކުޅެ ޗުއްޓީ އަކަށް ދާން ނިންމައިފި އެވެ.
ސްޕެއިނުގެ މީޑިއާ ރިޕޯޓްތައް ބުނާގޮތުން އުމުރުން 33 އަހަރުގެ މެސީ، މިރޭ ބާސެލޯނާ އިން ސްޕެނިޝް ލީގުގައި މި ސީޒަނުގައި ކުޅޭ ފަހު މެޗުގައި އެއިބާއާ ދެކޮޅަށް ކުޅޭ ޓީމުގައި ބައިވެރިނުވަން އެދުނީ އަމިއްލަ އަށެވެ. އެއީ އަންނަ މަހު އާޖެންޓީނާގައި ބާއްވަން ތާވަލުުކޮށްފައިވާ ކޮޕަ އެމެރިކާ އަށް ތައްޔާރުވުމުގެ ގޮތުންނާއި މުސްތަގުބަލާ މެދު ގޮތެއް ނިންމުމުގެ ކުރިން އަރާމްކޮށްލުމުގެ ބޭނުމުގަ އެވެ. މެސީ މި ވަގުތު ބާސެލޯނާ ކޮންޓްރެކްޓްގައި ހުރީ އަންނަ މަހުގެ ނިޔަލަށެވެ.
ބާސެލޯނާގެ ކޯޗު ރޮނާލްޑް ކޫމަން ބުނީ ޗުއްޓީ އެއް ދިނީ ހަމައެކަނި މެސީ އަށް ނޫން ކަމަށެވެ. ސީޒަނުގައި ގިނަ މެޗުތަކެއް ކުޅުނު ކުޅުންތެރިންނަށް ގައުމީ ޓީމުގެ މުހިއްމު މުބާރާތްތަކެއް ހުރުމުން އަރާމްކުރަން ފުރުސަތު ދިނުން އެއީ ރަނގަޅު ނިންމުމެއް ކަމަށް ކޫމަން ބުންޏެވެ. އެ ގޮތުން މެސީ އާއި ޕެޑްރީ ބާސެލޯނާގެ ފަހު މެޗުގައި ބޭނުންނުކުރަން ނިންމީ ކަމަށް ކޫމަން ބުންޏެވެ.
ސްޕެއިނުގެ ބައެއް މީޑިއާ ރިޕޯޓްތައް ބުނާގޮތުން މެސީ ދެން ބާސެލޯނާ ޖޯޒީގައި ނުފެނުމުގެ ފުރުސަތެއް ވެސް އެބައޮތެެވެ. މެސީގެ ބައްޕަ ޖޯޖް މެސީ އަންނަނީ މެސީގެ މުސްތަގުބަލާ ބެހޭގޮތުން ޕީއެސްޖީ އާއި މެންޗެސްޓާ ސިޓީއާ އެކު މަޝްވަރާކުރަމުން ކަމަށް ވެސް ދެކުނު އެމެރިކާގެ ބައެއް ނޫސްތަކުން ރިޕޯޓްކޮށްފައިވެ އެވެ.
އެކަމަކު ކޫމަން ބުނީ އޭނާގެ ނަޒަރުގައި މެސީ ކުރިއަށް އޮތްތަނުގައި ވެސް ފެންނާނީ ބާސެލޯނާ އިން ކަމަށެވެ. އަދި މެސީ ނުލައި ކުޅޭ ބާސެލޯނާ ޓީމަކަށް ވަރަށް އުނދަގޫވާނެ ކަމަށް ކޫމަން ބުންޏެވެ.
"މި ސީޒަނުގައި ވެސް މެސީ ތަފާތު ދައްކައިފި. އޭނަގެ ޕްރޮފެޝަނަލިޒަމާއި ލީޑަޝިޕާ މެދު ސުވާލެއް ނެތް. މެސީ ގޮސްފިނަމަ ވަރަށް އުނދަގޫވާނެ. ޔަގީނުން ވެސް އަހަރެމެން ހޯދަން ޖެހޭނެ ސީޒަނެއްގައި 30 ގޯލު ޖަހައިދޭ ކުޅުންތެރިއަކު،" ކޫމަން ބުންޏެވެ.
ބާސެލޯނާ އަށް މި ފަަހަރު ލީގު ޗެމްޕިއަންކަމާއި ދެ ވަނަ އަށް އެރުމުގެ ފުރުސަތު މިހާރު ނެތެވެ. އެ ޓީމު ލީގުގެ ތިން ވަަނައިގައި އޮތީ 37 މެޗުން 76 ޕޮއިންޓާ އެކު އެވެ. ތިން ވަނަ ކަށަވަރުކުރަން މިރޭ ބާސެލޯނާ އިން ނަތީޖާ ނެރެން ޖެހެ އެވެ. އެއީ އެއިބާ އަތުން ބާސެލޯނާ ބަލިވެ ހަތަރު ވަނައިގައި އޮތް ސެވިއްޔާ މޮޅުވެއްޖެނަމަ އެ ޓީމަށް ތިން ވަަނަ އަށް އެރޭނެ އެވެ. ސެވިއްޔާ މި ވަގުތު ހަަތަރު ވަނައިގައި އޮތީ 37 މެޗުން 74 ޕޮއިންޓް ހޯދައިގެންނެެވެ.
ލީގުގެ އެއް ވަނައިގައި އޮތް އެތުލެޓިކޯ މެޑްރިޑަށް 37 މެޗުން 83 ޕޮއިންޓް ލިބިފައިވާއިރު، ދެ ވަނައިގައި އޮތް ރެއާލް މެޑްރިޑަށް 37 މެޗުން ވަނީ 81 ޕޮއިންޓް ލިބިފަ އެވެ. ރެއާލް މިރޭ އަމިއްލަ ދަނޑުގައި ވިޔަރެއާލާ ބައްދަލުކުރާއިރު، އެތުލެޓިކޯ ރަށުންބޭރުގައި ކުޅޭނީ ރެއާލް ވަލޮޑޮލިޑާ އެވެ.
