ބީނޯސް އޭރީސް (މެއި 20) – އާޖެންޓީނާގެ ކްލަބް ރިވާ ޕްލޭޓްގެ 20 ކުޅުންތެރިން ކޮވިޑަށް ޕޮޒިޓިވްވެ އެ ކްލަބަށް ދިމާވެފައިވާ އެެހެނިހެން އަނިޔާގެ މައްސަލަތަކާ ހުރެ ބަދަލު ކުޅުންތެރިއަކު ނެތި، މިޑްފީލްޑަރު އެންޒޯ ޕެރޭޒް ގޯލަށް ލައިގެން ކުޅުނު މެޗުން މޮޅުވެއްޖެ އެވެ.
ދެކުނު އެމެރިކާގެ ކްލަބް ފުޓްބޯޅަ މުބާރާތް ކަމަށްވާ ކޮޕާ ލިބެޓެޑޯރެސްގެ ގްރޫޕް ސްޓޭޖުގައި ރޭ ކުޅުނު މެޗުން ރިވަ ޕްލޭޓް މި އުނދަގޫ ހާލަތުގައި ކޮލަމްބިއާގެ ސަންޓާ ފޭއި އަތުން މޮޅުވީ 2-1 އިންނެވެ. މެޗުގެ މޮޅު ކުޅުންތެރިއަކީ ކޮންމެވެސް ވަރެއްގެ އަނިޔާއެއްގައި ހުރެ ރޭ ރިވަ ޕްލޭޓްގެ ގޯލު ބެލެހެއްޓި މިޑްފީލްޑަރު އެންޒޯ ޕެރޭޒް އެވެ. މެޗުގައި ރިވާ ޕްލޭޓުގެ ތިބީ ބެންޗާ އެކު ޖުމްލަ އެއްކޮށް 11 ކުޅުންތެރިންނެވެ.
ކޮވިޑް-19 ގެ ނުރައްކާ އާޖެންޓީނާ އަށް ބޮޑުވެ، ރިވާ ޕްލޭޓްގެ ކުޅުންތެރިންތައް ޕޮޒިޓިވްވިއިރު އެ ޓީމުގެ ހަތަރު ގޯލްކީިޕަރުންގެ ވެސް އޭގެ ހިމެނެ އެވެ. ރިވަޕްލޭޓުން ފަސް ވަަނަ ކީޕަރެއް އިމަޖެންސީ ކުޅުންތެރިއެއްގެ ގޮތުގައި ލިސްޓުގައި ޖަހަން އެދުނު ނަމަވެސް ދެކުނު އެމެރިކާގެ ފުޓްބޯޅަ ފެޑެރޭޝަން ކޮންމެބޯލް އިން އެ ފުރުސަތު އެ ޓީމަށް ނުދިނެވެ.
އެހެންވެ ކުޅުންތެރިންގެ މެދުގައި މަޝްވަރާ ކުރުމަށް ފަހު ރޭގެ މެޗުގައި ރިވާ ޕްލޭޓްގެ ގޯލު ބެލެހެއްޓީ މިޑްފީލްޑަރު އެންޒޯ ޕެރޭޒް އެވެ. އެއީ އޭނާ އިސްނަގައިގެން އެ ކަމަށް އެދުމުންނެވެ. އިސްކޮޅުން ފަސް ފޫޓް 10 އިންޗި ހުންނަ އެންޒޯ ޕެރޭޒް ރޭގެ މެޗުގައި ކުޅުނީ ފަލަމަސްގަނޑަށް ލިބިފައިވާ އަނިޔާއިން އެއްކޮށް ރަނގަޅުނުވެ ހުރެ އެވެ. އޭނާ ހުރި ގޯލަށް މާ ގިނަ ހަމަލާތަކެއް ފޮނުވާނުލެވުނެވެ.
އުމުރުން 35 އަހަރުގެ އެންޒޯ ޕެރޭޒް ވަނީ އާޖެންޓީނާ ގައުމީ ޓީމަށް 26 މެޗު ކުޅެދީފަ އެވެ. އޭނާ ރިވަ ޕްލޭޓާ ގުޅުނީ 2017 ވަނަ އަހަރު އެވެ. ޔޫރަޕްގައި އޭނާ ވަނީ ސްޕެއިނުގެ ވެލެންސިއާ އަށާއި ޕޯޗުގަލްގެ ބެންފީކާ އަށް ކުޅެފަ އެވެ.
ރޭގެ މެޗުން މޮޅުވެ ރިވާ ޕްލޭޓް އޮތީ ފަސް މެޗުން ނުވަ ޕޮއިންޓާ އެކު ގްރޫޕްގެ އެއް ވަނައިގަ އެވެ. ރޭގެ މޮޅާ އެކު މުބާރާތުގެ އަނެއް ބުރަށްދާން ރިވާ ޕްލޭޓަށް ލިބުނީ މުހިއްމު ޕޮއިންޓްތަކެކެވެ.
