މި މަހު ރާއްޖޭގައި ކުރިއަށް ގެންދަން ނިންމައި ފަހު ވަގުތު ފަސްކުރަން ނިންމި އޭއެފްސީ ކަޕްގެ ދެކުނު އޭޝިއާގެ ޕްލޭއޮފާއި ގްރޫޕް ސްޓޭޖު މެޗުތައް ޖޫން (އަންނަ މަހު) ފަހު ކޮޅު ފަށާ ގޮތަށް އޭއެފްސީން ނިންމާފައިވާ ކަމަށް މީޑިއާ ރިޕޯޓްތައް ބުނެފި އެވެ.
އިންޑިއާ އާއި ބްންގްލަދޭޝްގެ ބައެއް މީޑިއާތަކުން ރިޕޯޓްކުރާގޮތުގައި އޭއެފްސީ ކަޕްގެ ދެކުނު އޭޝިއާގެ ޕްލޭއޮފްގައި ރާއްޖޭގެ އީގަލްސް އާއި އިންޑިއާގެ ބެންގަލޫރު ކުޅޭ މެޗު ތާވަލުކޮށްފައިވަނީ ޖޫން 27 ވަނަ ދުވަހަށެވެ. އޭގެ ފަހުން ގްރޫޕް ސްޓޭޖުގެ މެޗުތައް ކުޅޭނީ ޖޫން 30، ޖުލައި 3 އަދި ޖުލައި 6 ގަ އެވެ. އޭއެފްސީ ކަޕްގެ ގްރޫޕް ސްޓޭޖުގައި މި ވަގުތު އޮތީ ރާއްޖޭގެ މާޒިޔާ އާއި އިންޑިއާގެ އޭޓީކޭ މޯހަން ބަގާން އާއި ބަންގްލަދޭޝްގެ ބަޝުންދުރާ ކިންގްސް އެވެ.
އޭއެފްސީ ކަޕްގެ މެޗުތައް މިދިޔަ އަހަރާއި މި އަހަރު ސެންޓަރަލައިޒްކޮށް ކުޅެން ބިޑްކުރަން ހުޅުވާލި ފުރުސަތުގައި ރާއްޖޭން ވަނީ ދެ ފަހަރު ވެސް ބިޑް ކާމިޔާބުކޮށްފަ އެވެ. މިދިޔަ ފަހަރު ރާއްޖޭން އެކަނި ބިޑްކުރިއިރު، މި އަހަރު ރާއްޖޭން ބިޑް ކާމިޔާބުކުރީ އިންޑިއާއާ ވާދަކޮށެވެ.
ރިޕޯޓްތައް ބުނާގޮތުން މިހާތަނަށް ރާއްޖޭގައި ކުޅެން ނިންމި މެޗުތައް ހޯސްޓްކުރާނެ ތަނެއް ފައިނަލް އަދި ނުކުރެ އެވެ. އަދި ފުރުސަތު ބޮޑީ އަލުން ބިޑަށް ހުޅުވާލުމުގެ އެވެ. އަލުން ބިޑަށް ހުޅުވާލައިފިނަމަ ބަންގްލަދޭޝާއި އިންޑިއާ އިން ބިޑްކުރާނެ ކަމަށް ބެލެވެ އެވެ. އިންޑިއާ އިން ވަނީ ކޮވިޑް-19ގެ ހާލަތު ނުރައްކާވެފައި އޮއްވައި ވެސް ހާއްސަ ޕްރޮޓޮކޯލްގެ ތެރެއިން ގޯއާގައި އޭއެފްސީ ޗެމްޕިއަންސް ލީގުގެ ގްރޫޕެއްގެ މެޗުތައް ހޯސްޓްކޮށްފަ އެވެ.
ރާއްޖޭގައި އޭއެފްސީ ކަޕްގެ މެޗުތައް ކުޅެން ރޭވިފައި އޮއްވައި ފަހު ވަގުތު ފަސްކުރަން ޖެހުނީ މާލެ އައި ބެންގަލޫރު ޓީމުގެ ދެ ކުޅުންތެރިއަކާއި އޮފިޝަލަކު ޕްރޮޓޮކޯލާ ހިލާފުވެ މަގުމައްޗަށް ނުކުތުމުންނެވެ. ޕްރޮޓޮކޯލްގައިވާ ގޮތުން ކުޅުންތެރިންނަށް ބޭރަށް ނުކުމެވޭނީ މެޗާއި ޓްރެއިނިން އަށް އެކަންޏެވެ. އެކަމަކު ބެންގަލޫރު ޓީމުން ވަނީ ބޭރަށް ނުކުމެ ޕްރޮޓޮކޯލް މުގުރާލައިފަ އެވެ. އެ މައްސަލައިގައި ހިތްހަމަނުޖެހިގެން ޔޫތު މިނިސްޓަރު އަހުމަދު މަހުލޫފް ޓްވީޓެއް މެދުވެރިކޮށް ވަނީ ބެންގަލޫރު ރާއްޖޭން ދިއުމަށް އެދިފަ އެވެ.
ރާއްޖޭގައި ކުޅެން ނިންމާފައި އޮތީ ހާއްސަ ހުއްދައެއްގެ ދަށުންނެވެ. ޕްލޭއޮފް މެޗު ކުޅެން ރޭވީ މި މަހު 11 ގަ އެވެ. އަދި ގްރޫޕް ސްޓޭޖު މެޗުތައް 14-20 އަށެވެ.
ސަރުކާރުން މި ދަނޑިވަޅުގައި ރާއްޖޭގައި ދެން އޭއެފްސީ ކަޕްގެ މެޗުތައް ހޯސްޓްކުރަން ބޭނުންނުވާތީ އެފްއޭއެމުން ވަނީ އެކަން އޭއެފްސީ އަށް އަންގައިފަ އެވެ. އެފްއޭއެމުން އޭއެފްސީ އަށް މުބާރާތުގެ މެޗުތައް މި ވަގުތު8 ހޯސްޓް ނުކުރެވޭނެކަން އެންގިއިރު، ގިނަ ޓީމުތަކާއި އޮފިޝަލުން މެޗުތަކަށް ބޮޑު ހަރަދުތަކެއް ކޮށްފައިވާތީ އެހާ އަވަހަށް މުބާރާތުގެ ކަންތައްތައް އެފްއޭއެމުން ނިންމުމުން އޭއެފްސީން އެކަމާ ހިތްހަމަނުޖެހުނެވެ. އެހެންވެ އެފްއޭއެމްގެ މައްސަލައެއް އޭއެފްސީ ޑިސިޕްލިނަރީ ކޮމިޓީން އަންނަނީ ބަލަމުންނެވެ. ޕްރޮޓޮކޯލާ ހިލާފުވި ކުޅުންތެރިން އެނބުރި ގައުމަށް ފޮނުވާލާފައި މުބާރާތް ކުރިއަށް ގެންދިއުމަކީ އޭއެފްސީން ގެންގުޅުނު ވިސްނުމެކެވެ.
ބެންގަލޫރުން ފަހުން މައާފަށް އެދުމަށް ފަހު ވަނީ ބޭރަށް ނުކުތް ކުޅުންތެރިންނާއި އޮފިޝަލަށް ފިޔަވަޅު އަޅާނެ ކަމަށް ބުނެފަ އެވެ. ބޭރަށް ނުކުތް ދެ ކުޅުންތެރިންނަކީ ބެންގަލޫރަށް ކުޅޭ އޮސްޓްރޭލިއާގެ މިޑްފީލްޑަރު އެރިކް ޕާޓަލޫ އާއި ސްޕެއިނުގެ ޑިފެންޑަރު ހުއާނަން އެވެ. އޭއެފްސީން ބެންގަލޫރާ މެދު ވެސް ފިޔަވަޅެއް އަޅާނެ އެވެ.
އެފްއޭއެމްގެ ރައީސް ބައްސާމް އަދީލް ޖަލީލް ރާއްޖެ ޓީވީ "ކުޅިވަރު ފައިލް" ޕްރޮގްރާމްގައި ވާހަކަ ދައްކަަވަމުން ވިދާޅުވީ އޭއެފްސީން ރާއްޖެއާ މެދު އަޅާ ފިޔަވަޅެއް އަޅާނީ އެފްއޭއެމަށް ކަމަށެވެ. އެ ގޮތުން މާޒީގައި ކަން ހިިނގާފައިވާ ގޮތަށް ބަލާއިރު، ބެލެވެނީ ރާއްޖެ އަށް އަންނާނީ ޖޫރިމަނާއެއް ނޫނީ ވަކި މުއްދަތަކަށް އޭއެފްސީ ކަޕްގެ މެޗުތައް ހޯސްޓްކުރުމުގެ ފުރުސަތު ނުދިނުން ކަން ބައްސާމް ފާހަގަކުރެއްވި އެވެ. އެކަމަކު މިއީ ކޮވިޑް-19ގެ ސަަބަބުން ހާއްސަ ހާލަތަކަށްވާތީ އޭއެފްސީން އަދަބެއް ނުދިނުމުގެ ފުރުސަތެއް ވެސް އޮތް ކަމަށް ބައްސާމް ވަނީ ވިދާޅުވެފަ އެވެ.
