ހަރުކަށި ފިކުރުގެ ވިސްނުން ފެތުރުމުގައި އިސްކޮށް އުޅޭ ކަމުގެ ތުހުމަތަށް މިރޭ ފުލުހުން ހައްޔަރުކޮށްފައިވަނީ އއ. ހިމަންދޫގައި ހިންގި ހަމަނުޖެހުމާ ގުޅިގެން ޖަލަށްލީ، އަބްދުﷲ އަލީ މަނިކުކަން "އަދަދު"އަށް އެނގިއްޖެ އެވެ.
ފުލުހުން މިރޭ މާލޭގައި ހިންގި އޮޕަރޭޝަނެއް ފަހު ބުނެފައިވަނީ ހައްޔަރުކޮށްފައިވަނީ ހަރުކަށި ފިކުރު ފެތުރުމުގައި އިސްކޮށް އުޅޭ މީހެއް ކަމަށް ތުހުމަތުވާ 43 އަހަރުގެ މީހެއް ކަމަށެވެ. އެމީހާގެ ތަފްސީލެއް ނުދެ އެވެ. ނަމަވެސް، "އަދަދު"އަށް ކަށަވަރު ކުރެވިފައިވާ ގޮތުގައި އެއީ ހއ. މޮޅަދޫއަށް ނިސްބަތްވާ އަބްދުﷲ އަލީ މަނިކެވެ.
އަލީ މަނިކު ހިމަންދޫ މައްސަލާގައި ހައްޔަރުކޮށްގެން ކޯޓަށް ގެންދަނީ: އެ މައްސަލާގައި ފަސް މީހެއްގެ މައްޗަށް 10 އަހަރުގެ ޖަލު ހުކުމް އައި
އޭނާއަކީ ޕާކިސްތާނުން ކިޔައިވައިގެން އައި މީހެކެވެ. އޭގެ ފަހުން އޭނާ ވަނީ ހަރުކަށި ފިކުރު ފެތުރުމުގައި އިސްކޮށް ހަރަކާތްތެރިވެފަ އެވެ.
އެގޮތުގެ މަތިން 2007 ވަނަ އަހަރު އޭނާ އިސްކޮށް ހުރެ، އއ. ހިމަންދޫގައި ސަލާމަތީ ބާރުތަކާ ކުރިމަތިލި އެވެ. އެ މައްސަލާގައި އޭނާ ހައްޔަރުކޮށް އުފުލި ދައުވާ ސާބިތުވެ 10 އަހަރަށް ޖަލަށްލި އެވެ.
ނަމަވެސް، ޖަލުން އޭނާ ފިލައިގެން ގދ. ތިނަދޫގައި އުޅުނެވެ. ތިނަދޫގައި ހުއްޓާ އޭނާ އަތުލައިގަނެގެން ގެނައި މަގުމަތީ ނަމާދުކޮށްލަން ދިން ފުރުސަތުގައި ކަނޑަަށް ފުންމާލައިގެން އަނެއްކާވެސް ފިލި އެވެ.
އޭގެ އެއް އަހަރު ފަހުން އޭނާ އަނެއްކާވެސް ހައްޔަރުކުރީ ސިފަ ބަދަލުކޮށްގެން ތިލަފުށީގައި އުޅެމުންދަނިކޮށެވެ. އޭނާ މިހާރު ދޫވެފައިހުރީ ޖަލު ހުކުމް ތަންފީޒުކޮށް ނިމިގެންނެވެ.
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް އަމާޒުކޮށް ދިން ހަމަލާއަށްފަހު، ފުލުހުން ގެންދަނީ ހަރުކަށި ފިކުރާ ދެކޮޅަށް ބޮޑު އޮޕަރޭޝަނެއް ހިންގަމުންނެވެ. ސިފައިން ދަނީ މާލޭ ތެރޭގެ ސަލާމަތީ ކަންކަން ބަލަހައްޓަމުންނެވެ.
ރައީސް ނަޝީދުގެ ގެކޮޅު ކައިރީގައި އައިއީޑީއެއް ގޮއްވާލައިގެން ދިން ހަމަލާ ވެސް ހަރުކަށި ފިކުރާ ގުޅޭއިރު މިހާތަނަށް ހައްޔަރުކުރި ތިން މީހުންގެ ހަރުކަށި ފިކުރުގެ ވިސްނުންތައް ހުރި ކަމަށް ފުލުހުން ވަނީ ބުނެފަ އެވެ.
އައްޑޫ ސިޓީގައި ވެސް ފުލުހުން އޮޕަރޭޝަނެއް ހިންގައި އައިއެސް ޖަމާއަތާ ގުޅުން އޮތް ހަތް މީހަކު ހައްޔަރުކޮށް ވަނީ ބަންދު ޖަހާފަ އެވެ. އޭގެ ފަހުން ކ. ގުރައިދޫއާ އިންވެގެން އޮންނަ ކުޑަ ފަޅު ރަށެއް ކަމަށްވާ ޅޮސްފުށި ވެސް ފުލުހުން ވަނީ ބަލާފާސްކޮށްފަ އެވެ.
މި އޮޕަރޭޝަންތަކާ ގުޅޭ ތަފްސީލީ މައުލޫމާތެއް ފުލުހުން ހާމައެއް ނުކުރެ އެވެ.
ނަމަވެސް، ކޮމިޝަނާ އޮފް ޕޮލިސް މުހައްމަދު ހަމީދު ވަނީ ރައީސް ނަޝީދުގެ ހަމަލާއާ ގުޅުން އޮތް އެންމެ ހައްޔަރުކޮށް، އެކަމަށް ފަންޑުކުރި މީހުންނާއި އަޑީގައި ތިބި މީހުން ވެސް ހޯދައި، އިންސާފުގެ ކުރިމައްޗަށް ގެންނާނެ ކަމުގެ ޔަގީންކަން ދެއްވާފަ އެވެ.
