ހަރުކަށި ފިކުރު ފަތުރައި، މީހުންގެ ލޭ ހުއްދަ ކަމަށް ގޮވުން އާއްމުވެފައިވާތީ، އެފަދަ ފަރާތްތަކާ މެދު އަވަސް ފިޔަވަޅު އެޅުމަށް ސަރުކާރަށް ގޮވާލައި ރައްޔިތުންގެ މަޖިލީހަށް ކުއްލި މައްސަލައެއް މިއަދު ހުށަހަޅައިފި އެވެ.
ގަލޮޅު ދެކުނު ދާއިރާގެ އެމްޑީޕީ މެމްބަރު މީކާއިލް އަހުމަދު ނަސީމް ހުށަހެޅުއްވި މައްސަލާގައި ބުނެފައިވަނީ މިފަހަކަށް އައިސް ސޯޝަލް މީޑިއާ ޕްލެޓްފޯމްތަކުގައި ވަކިވަކި ފަރުދުންނާ މެދު ނަފްރަތު އުފައްދައި އެމީހުންގެ ލޭ ހުއްދަކުރުމަށް ގޮވާލައި އެ މީހުންނަކީ މުސްލިމުން ނޫން ކަމަށް ބުނެ ތަފާތު ލޭބަލްތައް އެޅުވުން އާންމުވެފައިވާ ކަމަށެވެ.
މިގޮތުން، މަޖިލީހުގެ އުނގޫފާރު ދާއިރާގެ މެމްބަރު މުހައްމަދު ވަހީދު، ގިސާސް ހިފުމާ ބެހޭ ގޮތުން ދެއްކެވި ވާހަކައަކާ ގުޅިގެން އޭނާ އަކީ މަރާލަން ޖެހޭ މީހެއް ކަމަށް ބުނެ ފޭސްބުކްގައި ލިޔުނު ޕޯސްޓެއްގެ މައްސަލަ މީކާއިލް ފާހަގަކުރައްވާފައިވެ އެވެ.
އޭގެ އިތުރުން މަޖިލީހުގެ އިއްޔެގެ ޖަލްސާއެއް ޓީވީ ޗެނަލްއަކުން ލައިވް ސްޓްރީމްކުރަމުން ދަނިކޮށް ކޮމެންޓް ސެކްޝަންގައި މަޖިލީހަކީ ގޮއްވާލަން ޖެހޭ ތަނެއް ކަމަށް ބުނެ ކޮމެންޓެއް ކުރިކަން ވެސް އެ މައްސަލާގައި ފާހަގަކޮށްފައިވެ އެވެ.
އެހެންކަމުން ވަކި ވަކި ފަރުދުންނާ މެދު ނަފްރަތު އުފައްދައި ލޭ އޮހޮރުވުން މިހާ އާންމުކަމަކަށް ވެފައިވާތީ އެފަދަ ކަންކަމަށް އަރައިގަންނަ މީހުންނަށް ފިޔަވަޅު އެޅުން އަވަސްކުރުމަށް މީކާއިލް އެދިވަޑައިގެންނެވި އެވެ.
މީކާއިލް ހުށަހެޅުއްވި މައްސަލަ މަޖިލީހަށް ބަލައިގަނެ ބަހުސް ކުރެވެމުންދާއިރު، ގިނަ މެމްބަރުން ވިދާޅުވީ ޑރ. އަފްރާޝީމް އަލީ އާއި، ޔާމީން ރަޝީދު މަރާލުމާއި އަދި މި ފަހުން މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު ހަމަލާދީފައިވަނީ ވެސް "ލާދިނީ" ޓެގު އަޅުވައި، އެ ބޭފުޅުންނާ މެދު ނަފްރަތު އުފައްދައިގެން ކަމަށެވެ.
އަދި އެ ގޮތަށް ޓެގުތައް އަޅުވައި، އެކި ޕްލެޓުފޯމުތަކުގައި ނަފްރަތު އުފައްދައި، ލޭ ހުއްދަ ކަމަށް ގޮވާލާ ގޮވާލުންތައް ހުއްޓުވަންޖެހޭ ކަމަށް ވިދާޅުވި އެވެ.
ނަފުރަތު އުފެއްދުން ގާނޫނީ ކުށަކަށް ހެދުމަށް ނިންމައި ބިލެއް އެޓާނީ ޖެނެރަލް އޮފީހުން ވަނީ އިއްޔެ ރައީސް އޮފީހަށް ފޮނުވައިފަ އެވެ.
