ކުރިއަށް އޮތް ލޯކަލް ކައުންސިލް އިންތިހާބު އެމްޑީޕީއަށް ކާމިޔާބުނުވެއްޖެ ނަމަ މި ސަރުކާރު ޖަވާބުދާރީ ކުރުމުގެ ފުރުސަތު ރައްޔިތުންނަށް ގެއްލިގެންދާނެ ކަމަށް ގަލޮޅު ދެކުނު ދާއިރާގެ މެންބަރު މީކާއިލް ނަސީމް ވިދާޅުވެއްޖެ އެވެ.
އެމްޑީޕީ އިން ރޭ ބޭއްވި ޖަގަހަ ޖަލްސާއެއްގައި ވާހަކަ ދައްކަވަމުން މީކާއިލް ވިދާޅުވީ، ރާއްޖެއަށް ތަރައްގީ ލިބޭނީ ވެރިކަން ހިންގާ ޕީއެންސީގެ ކެންޑިޑޭޓުން ހޮވައިގެން ކަމަށް ރައީސް މުހައްމަދު މުއިއްޒު ވިދާޅުވަނީ ރައްޔިތުންގެ ލޮލުގައި އަނދުން އަޅުވަން ކަމަށެވެ.
އެމްޑީޕީ އިން އެތައް ގުރުބާނީއެއް ވެގެން ރާއްޖޭގައި ގާއިމުކޮށްފައިވާ ޖަވާބުދާރީ ކުރުވުމުގެ ނިޒާމު ނެގެހެއްޓުމަށް ލިބިގެންދާ މިއީ އެންމެ ފަހުގެ ފުރުސަތު ކަމަށް ވެސް މީކާއިލް ރޭ ވިދާޅުވި އެވެ.
"އެހެންވީމާ. މި އިންތިހާބުގައި އަޅުގަނޑުމެންގެ ކެންޑިޑޭޓުންނަށް. އަޅުގަނޑުމެންގެ ކައުންސިލްތަކަށް މެޖޯރިޓީ ނުލިބިއްޖެ ނަމަ، ތިބޭފުޅުންނަށް މި ސަރުކާރު ކުރިއަށް އޮތް މުސްތަގުބަލުގައި ލިބޭނޭ ފުރުސަތު މި ދަނީ ގެއްލިގެން،" މީކާއިލް ވިދާޅުވި އެވެ.
އެ ފުރުސަތު ގެއްލިގެން ނުދާނެކަން ކަށަވަރު ކުރުމަށްޓަކައި އެމްޑީޕީގެ ހުރިހާ މެންބަރުންނާއި އިސް ވެރިން އެކުގައި ގުޅިގެން މަސައްކަތް ކުރަންޖެހޭ ކަމަށާއި މި އިންތިހާބަކީ މުހިންމު އިންތިހާބެއްގެ ގޮތުގައި ދެކެން ޖެހޭ ކަމަށް ވެސް އޭނާ ވިދާޅުވި އެވެ.
ފާހަގަކޮށްލެވޭ ގޮތުގައި، އެންމެ ފަހުން ބޭއްވި ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބުގައި އެމްޑީޕީއަށް ބޮޑު ނާކާމިޔާބެއް ލިބުނު އެއް ސަބަބަކީ ޕާޓީގެ ތެރޭގައި އުފެދިފައި އޮތް ބައިބައިވުމާއި ދެބަސްވުމެވެ.
ރޭގެ ޖަލްސާގައި ވާހަކަދައްކަވަމުން މީކާއިލް އިތުރަސް ވިދާޅުވީ ބޮޑު ދެ އިންތިހާބު އެއްކޮށްލަން ރައްޔިތުންގެ ފެންނަ ނުފެންނަ ވޯޓެއް ނަގަން ސަރުކާރުން މަސައްކަތް ކުރަމުންދާ ކަމަށެވެ.
އެގޮތުން، މިހާރު މަޖިލީހުގައި އޮތް ބިލު ފާސްކޮށް ލޯކަލް ކައުންސިލް އިންތިހާބާއެކު އެ ވޯޓު ނަގަން ސަރުކާރުން ނިންމާފައިވާ ކަމަށް ވިދާޅުވެ މީކާއިލް ވަނީ އެކަމަށް އެމްޑީޕީ އަދި ރައްޔިތުން ފާރަވެރިވުމަށް ގޮވާލައިފަ އެވެ.
