ރައްޔިތުންގެ މަޖިލީހުގެ ގައްދޫ ދާއިރާގެ ކުރީގެ މެމްބަރު ޒާހިރު އާދަމް (ގައްދޫ ޒާހިރު) ރޭ އަވަހާރަވުމާ ގުޅިގެން މަޖިލީހުގައި މިއަދު އެއް މިނެޓުގެ ސުކޫތެއް ގެނެސްފި އެވެ.
މިއަދުގެ ޖަލްސާ ފައްޓަވަމުން ރިޔާސަތުގައި އިންނެވި މަޖިލީހުގެ ނައިބު ރައީސް އީވާ އަބްދުﷲ ވިދާޅުވީ ޒާހިރަކީ ގިނަ އަހަރުތަކެއް ވަންދެން މަޖިލީހަށް ހިދުމަތް ކުރެއްވި ބޭފުޅެއް ކަމަށެވެ.
މިގޮތުން، ގދ. އަތޮޅު މެމްބަރުކަމާއި ރައްޔިތުންގެ ހާއްސަ މަޖިލީހުގެ މެމްބަރުކަމުގެ އިތުރުން، ގައްދޫ ދާއިރާގެ މެމްބަރުކަން ކުރެއްވި ކަން އީވާ ފާހަގަކުރެއްވި އެވެ. އެއާއެކު ޒާހިރުގެ ހަނދާނުގައި މެމްބަރުން ވަނީ ކޮޅަށް ތެދުވެވަޑައިގެން އެއް މިނެއްޓުގެ ސުކޫތެއް ގެނެސްފަ އެވެ.
އެނގިފައިވާ ގޮތުގައި ޒާހިރު ކޮވިޑަށް ޕޮޒިޓިވްކަން އެނގިވަޑައިގަތީ މިދިޔަ އަންގާރަ ދުވަހެވެ. ޖެހިގެން އައި ދުވަހު ދަރުމަވަންތަ ހޮސްޕިޓަލްގައި އެޑްމިޓްކޮށް ޒާހިރަށް ފަރުވާ ދިނެވެ. އިއްޔެ ގެއަށް ބަދަލުވެވަޑައިގަތް އިރު، ބަލިން މުޅިން ފަސޭހައެއް ނުވެ އެވެ.
ބަލީގައި ހައި ރިސްކް ޒާހިރު ކޮވިޑަށް ނެގެޓިވް ނުވަނީސް ގެއަށް ދޫކޮށްލި ސަބަބެއް އަދި ސާފެއް ނުވެ އެވެ.
އުމުރުން ދުވަސްވެފައިވާ ޒާހިރަކީ ހަކުރު ބަލި އަދި ކިޑްނީގެ އޮޕަރޭޝަނެއް ކުރައްވާފައި ހުންނެވި ބަލީގައި ބޮޑުވަރުވާ ކެޓަގަރީގެ ބޭފުޅެއް ކަމަށް "އަދަދު"އާ މައުލޫމާތު ހިއްސާކުރެއްވި ބޭފުޅާ ވިދާޅުވި އެވެ. އެކަމަކު ޕޮޒިޓިވްވެ ފަރުވާ އަށް ހޮސްޕިޓަލަށް ވަޑައިގަތްއިރު ބަލީގެ އެއްވެސް އަލާމާތެއް އަދި އުނދަގުލެއް ވެސް ކުރިމަތިނުވާ ކަމަށް ވެ އެވެ.
ހޮސްޕިޓަލުން ގެއަށް ވަޑައިގަތުމަށް ފަހު ހާލު ސީރިއަސްވީ މިރޭ ކުއްލި ގޮތަށެވެ. އަލުން ހޮސްޕިޓަލަށް ގެންދިޔައީ 10 ޖަހަން އުޅެނިކޮށެވެ.
ސަތާރަވަނަ ރައްޔިތުންގެ މަޖިލީހަށް ޑީއާރުޕީ ޓިކެޓުގައި ޒާހިރު އިންތިހާބުވެވަޑައިގަތުމަށް ފަހު، 2010 ގައި އެމްޑީޕީއާ ގުޅިވަޑައިގަތެވެ. އެ ދައުރު ނިންމަވައި އަށާރަ ވަނަ ރައްޔިތުންގެ މަޖިލީހަށް ކުރިމަތިލެއްވުމަށް ފަހު ނަން އަނބުރާ ގެންދެވީ އެވެ.
މަޖިލިސް މެމްބަރުކަމަށް ފަހު މިހާތަނަށް އުޅުއްވީ އަމިއްލަ ވިޔަފާރީގަ އެވެ. ސިޔާސީ ކަންކަމުގައި ހަރަކާތްތެރިކޮށް ނޫޅުއްވަ އެވެ.
ރައްޔިތުންގެ މަޖިލީހުގައި ގައްދޫ ދާއިރާ މިހާރު ތަމްސީލް ކުރައްވަނީ ޒާހިރުގެ ދަރިކަލުން އަހްމަދު ޒާހިރެވެ.
