ރައްޔިތުންގެ މަޖިލީހުގެ ގައްދޫ ދާއިރާގެ ކުރީގެ މެމްބަރު ޒާހިރު އާދަމް (ގައްދޫ ޒާހިރު) މިރޭ އަވަހާރަވެއްޖެ އެވެ.
ޒާހިރު އަވަހާރަވެއްޖެ ކަން އާއިލާގެ މެމްބަރަކު "އަދަދު"އަށް ކަށަވަރު ކޮށްދެއްވި އެވެ.
އެނގިފައިވާ ގޮތުގައި ޒާހިރު ކޮވިޑަށް ޕޮޒިޓިވްކަން އެނގިވަޑައިގަތީ މިދިޔަ އަންގާރަ ދުވަހެވެ. ޖެހިގެން އައި ދުވަހު ދަރުމަވަންތަ ހޮސްޕިޓަލްގައި އެޑްމިޓްކޮށް ޒާހިރަށް ފަރުވާ ދިނެވެ. އިއްޔެ ގެއަށް ބަދަލުވެވަޑައިގަތް އިރު، ބަލިން މުޅިން ފަސޭހައެއް ނުވެ އެވެ.
ބަލީގައި ހައި ރިސްކް ޒާހިރު ކޮވިޑަށް ނެގެޓިވް ނުވަނީސް ގެއަށް ދޫކޮށްލި ސަބަބެއް އަދި ސާފެއް ނުވެ އެވެ. އުމުރުން ދުވަސްވެފައިވާ ޒާހިރަކީ ހަކުރު ބަލި އަދި ކިޑްނީގެ އޮޕަރޭޝަނެއް ކުރައްވާފައި ހުންނެވި ބަލީގައި ބޮޑުވަރުވާ ކެޓަގަރީގެ ބޭފުޅެއް ކަމަށް "އަދަދު"އާ މައުލޫމާތު ހިއްސާކުރެއްވި ބޭފުޅާ ވިދާޅުވި އެވެ. އެކަމަކު ޕޮޒިޓިވްވެ ފަރުވާ އަށް ހޮސްޕިޓަލަށް ވަޑައިގަތްއިރު ބަލީގެ އެއްވެސް އަލާމާތެއް އަދި އުނދަގުލެއް ވެސް ކުރިމަތިނުވާ ކަމަށް ވެ އެވެ.
ހޮސްޕިޓަލުން ގެއަށް ވަޑައިގަތުމަށް ފަހު ހާލު ސީރިއަސްވީ މިރޭ ކުއްލި ގޮތަށެވެ. އަލުން ހޮސްޕިޓަލަށް ގެންދިޔައީ 10 ޖަހަން އުޅެނިކޮށެވެ.
ޒާހިރު ފުރުއްވި މަގާމްތައް:
2009-2005 އަށް ގދ. އަތޮޅު މެމްބަރުކަން
2008-2005 އަށް ރައްޔިތުންގެ ހާއްސަ މަޖިލީހުގެ މެމްބަރުކަން
2014-2009 އަށް ގައްދޫ ދާއިރާގެ މެމްބަރުކަން
ސަތާރަވަނަ ރައްޔިތުންގެ މަޖިލީހަށް ޑީއާރުޕީ ޓިކެޓުގައި ޒާހިރު އިންތިހާބުވެވަޑައިގަތުމަށް ފަހު، 2010 ގައި އެމްޑީޕީއާ ގުޅިވަޑައިގަތެވެ. އެ ދައުރު ނިންމަވައި އަށާރަ ވަނަ ރައްޔިތުންގެ މަޖިލީހަށް ކުރިމަތިލެއްވުމަށް ފަހު ނަން އަނބުރާ ގެންދެވީ އެވެ.
މަޖިލިސް މެމްބަރުކަމަށް ފަހު މިހާތަނަށް އުޅުއްވީ އަމިއްލަ ވިޔަފާރީގަ އެވެ. ސިޔާސީ ކަންކަމުގައި ހަރަކާތްތެރިކޮށް ނޫޅުއްވަ އެވެ.
ރައްޔިތުންގެ މަޖިލީހުގައި ގައްދޫ ދާއިރާ މިހާރު ތަމްސީލް ކުރައްވަނީ ޒާހިރުގެ ދަރިކަލުން އަހްމަދު ޒާހިރެވެ.
