ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު އަވަހާރަކޮށްލަން ޓެރަރިސްޓު ހަމަލާ ދިން އިރު، އެމަނިކުފާނަށް ދެމުންދިޔަ ސެކިޔުރިޓީ ބްރީޗްވި ގޮތުގެ ތަހުގީގެއް ރައްޔިތުންގެ މަޖިލީހުން ކުރަން މިއަދު ފާސްކޮށްފި އެވެ.
ރައީސް ނަޝީދަށް ދިން ހަމަލާއާގުޅޭ ހާއްސަ މައްސަލަ ދިރާސާ ކުރުމަށްފަހު މަޖިލީހުގެ ސަލާމަތީ ހިދުމަތްތަކާބެހޭ (241) ކޮމިޓީން ނިންމީ ހަމަލާދިން އިރު ރައީސް ނަޝީދަށް ދެމުންދިޔަ ސެކިޔުރިޓީ ބްރީޗުވި ގޮތުގެ އިންކުޔަރީއެއް، ބޭރުގެ މާހިރުންގެ އެހީތެރިކަމާއެކު އެންމެ ފުޅާމިނެއްގައި ހެދުމަށެވެ.
އެ ރިޕޯޓު ކޮމިޓީން ނިންމި ގޮތަށް ފާސްކޮށްފައިވަނީ މިއަދުގެ ޖަލްސާގައި އެ ވޯޓުގައި ބައިވެރިވެވަޑައިގެންނެވި 42 މެމްބަރުންގެ އިއްތިފާގުންނެވެ.
އެ ރިޕޯޓު ފާސްވުމާއެކު ރިޔާސަތުގައި އިންނެވި މަޖިލީހުގެ ނައިބު ރައީސް އަދި ގަލޮޅު އުތުރު ދާއިރާގެ މެމްބަރު އީވާ އަބްދުﷲ ވިދާޅުވީ އެ އިންކުޔަރީ ކުރިއަށް ގެންދިއުމަށްޓަކައި މަޖިލީހުގެ ތަޅުމުން ނިންމަންޖެހޭ ކަންކަން ނިންމުމަށްޓަކައި މިރޭ 8:30 ގައި މަޖިލީހުގެ ޖަލްސާއެއް ތާވަލުކުރައްވާނެ ކަމަށެވެ.
އަޑީގައި ތިބި މީހުން ހޯދަންޖެހޭ
އެ ރިޕޯޓުގެ ބަހުސް ކުރިއަށް ދިޔަ އިރު އެ ބަހުސްގައި ވާހަކަ ދެއްކެވި އެމްޑީޕީގެ ގިނަ މެމްބަރުން ވެސް ހިމެނޭ ގޮތަށް ވަނީ އެ ހަމަލާއާ ގުޅިގެން ސަލާމަތީ ހިދުމަތްތަކަށް ފާޑުކިޔުން އަމާޒުކޮށްފަ އެވެ.
މާފަންނު މެދު ދާއިރާގެ މެމްބަރު އިބްރާހިމް ރަޝީދު ވިދާޅުވީ ރައީސް ނަޝީދަށް ސެކިޔުރިޓީ ދިން ކަމަށް ގަބޫލު ނުކުރައްވާ ކަމަށެވެ.
މިގޮތުން، ޓެކްނޮލޮޖީގެ ޒަމާނެއްގައި ރިމޯޓް ޑެޓަނޭޓަރެއް ބޭނުންކޮށްގެން ބޮމުގެ ހަމަލާ ދިން އިރު، ސިގްނަލް ޖޭމަރެއް ވެސް ބޭނުންކޮށްފައިނުވާ ކަން އޭނާ ފާހަގަ ކުރެއްވި އެވެ.
ކޮމިޓީ ރިޕޯޓުގެ އިތުރުން އެ ހަމަލާއާ ގުޅިގެން އޭގެ ކުރިން ރިޔާސަތުން ހުށަހެޅި މައްސަލަ މަސްހުނިވެގެން ކުރިއަށް ދިޔަ ބަހުސްގައި ހާއްސަކޮށް އެމްޑީޕީގެ ގިނަ މެމްބަރުން ވަނީ ހަމަލާ ދިން މީހުންގެ އިތުރުން އެކަމުގެ އަޑީގައި ތިބި މީހުން ހޯދަން ގޮވާލައިފަ އެވެ.
ރައީސް ނަޝީދުގެ ފުރާނަ ސަލާމަތްކުރަން އޭޑީކޭ ހޮސްޕިޓަލުގެ ޑޮކްޓަރުންގެ ހާއްސަ ޓީމަކުން ގިނަ ސާޖަރީތައް ކުރުމަށްފަހު އެމަނިކުފާނު މިހާރު ވަނީ އިތުރު ފަރުވާއަށް ޖަރުމަނަށް ގެންދެވިފަ އެވެ.
ނަޝީދަށް ދިން ހަމަލާއާ ގުޅިގެން މިހާތަނަށް ތިން މީހަކު ވަނީ ހައްޔަރު ކޮށްފަ އެވެ. އެއީ ބޮންގޮއްވާލުމުގައި އަމަލީގޮތުން ބައިވެރިވި ކަމަށް ތުހުމަތު ކުރެވޭ އަދުހަމް އަހުމަދުގެ އިތުރުން، މއ. ފޭރުގެ މުޖާޒް އަހްމަދު 21، އާއި ގއ. ކޮނޑޭ، ފޮޅޭމާ، ތަހުމީން އަހްމަދު، 32 އެވެ.
އެ ތިން މީހުންނަކީ ވެސް ހަރުކަށި ފިކުރާ ގުޅުންއޮތް މީހުން ކަމަށް ބެލެވޭކަމަށް ފުލުހުން ބުނެފައިވެ އެވެ.
