ގްލާސްގޯ (މެއި 15) - ސްކޮޓްލެންޑް ލީގުގައި މިއަދު 4-0 އިން އެބަޑީން ބަލިކޮށް ސްޓީވެން ޖެރާޑްގެ ކޯޗުކަމުގައި ކުޅޭ ރޭންޖާސް އިން މެޗަކުން ބަލިނުވެ ލީގުގެ ޗެމްޕިއަންކަން ހޯދައިފި އެވެ.
މިއީ ސެލްޓިކާ އެކު 2016-2017 ވަނަ އަހަރުގެ ސީޒަނުގައި މެޗަކުން ބަލިވެ ބްރެންޑަން ރޮޖާސް ސްކޮޓްލެންޑްގެ ލީގު ޗެމްޕިއަންކަން ހޯދި ފަހުން ސްކޮޓިޝް ޕްރިމިއާ ލީގުގެ ތަށި މެޗަކުން ބަލިވެ އެހެން ޓީމަކުން އުފުލާލި ފުރަތަމަ ފަހަރެވެ.
އުމުރުން 40 އަހަރުގެ ޖެރާޑްގެ ކޯޗުކަމުގައި ރޭންޖާސް އިން ސްކޮޓްލެންޑްގެ ޗެމްޕިއަންކަން ހޯދިއިރު، އެ ޓީމުން އެންމެ ފަހުން ލީގު ކާމިޔާބުކުރީ 2011 ވަނަ އަހަރު އެވެ. ރޭންޖާސް އިން ލީގު ކަށަވަރުކުރީ ބާކީ ހަ މެޗު އޮއްވައި މިދިޔަ މާޗް މަހު އެވެ. ލީގު ޗެމްޕިއަންކަން ޔަގީންވި ނަމަވެސް ރޭންޖާސް އިން ވަނީ ފަހު މެޗާ ހަަމައަށް އެ ރޫހަށް ބަދަލެއް ނުގެނެސް ރަނގަޅު ކުޅުމެއް ދައްކައިފަ އެވެ.
ޖެހިޖެހިގެން 10 އަހަރު ސްކޮޓްލެންޑްގެ ޗެމްޕިއަންކަން ހޯދަން ނުކުތް ސެލްޓިކް ހުއްޓުވައި ރޭންޖާސް އިން އެއް ވަނައިގައި ލީގު ނިންމާލީ 38 މެޗުން 102 ޕޮއިންޓާ އެކު އެވެ. ދެ ވަނައިގައި އޮތް ސެލްޓިކަށް 38 މެޗުން ލިބުނީ 77 ޕޮއިންޓެވެ.
ރޭންޖާސް އިން މިރޭ ލީޑުނެގީ ފަސް ވަނަ މިނިޓްގައި އެބަޑީންގެ ޖޯ ލެވިސް އަތުން ބައިކޮޅަށް ވަން ގޯލަކުންނެވެ. މެޗުގެ 34 ވަނަ މިނިޓްގައި ކެމާ ރޫފް ވަނީ ރޭންޖާސް އަށް ލީޑުފުޅާކޮށްދީފަ އެވެ. ރޭންޖާސްގެ ތިން ވަނަ ގޯލު ޖެހީ ވެސް ރޫފް އެވެ. އޭނާ މި ގޯލު ޖެހީ 60 ވަނަ މިނިޓްގަ އެވެ. މެޗު ނިމެން ދެ މިނިޓަށް ވެފައި ވަނިކޮށް ރޭންޖާސްގެ ފަހު ގޯލު ޖެހީ އިނގިރޭސި ގިނަ ކްލަބްތަކަކަށް ކުޅުނު ޖަމެއިން ޑެފޯ އެވެ.
މި މޮޅާ އެކު ރޭންޖާސް އިން ވަނީ މި ފަހަރު ލީގުގައި އަމިއްލަ ދަނޑުގައި ކުޅުނު 19 މެޗުން ވެސް މޮޅުވެފަ އެވެ. އެކަން އެންމެ ފަހުން ހާސިލްކުރީ 2002 ވަނަ އަހަރު ސެލްޓިކާ އެކު މަޝްހޫރު ކޯޗު މާޓިން އޮނީލް އެވެ.
ރޭންޖާސްގެ ކޮޅަށް މި ފަހަރު ލީގުގައި 13 ގޯލު ވަންއިރު، އެ ޓީމުން ވަނީ ސްކޮޓްލެންޑް ލީގުގައި 107 އަހަރުވީ ކްލީންޝީޓް ރެކޯޑާ ވެސް ހަމަކޮށްފަ އެވެ. ސެލްޓިކުން 1913-1914 ވަނަ ލީގު ހޯދިއިރު ވެސް އެ ޓީމު ކޮޅަށް ވަނީ 13 ގޯލެވެ.
ލިވަޕޫލް ޔޫތު ޓީމުން ކޯޗިން ކެރިއަރު ފަށައި ޖެރާޑް ރޭންޖާސްއާ ހަވާލުވީ 2018 ވަަނަ އަހަރުގެ އޭޕްރީލް މަހުގަ އެވެ. މި ފަހަރު ރޭންޖާސްއާ އެކު ހޯދާފައި މިވަނީ ޖެރާޑްގެ ފުޓްބޯޅަ ކެރިއަރުގެ ފުރަތަމަ ލީގު ތަށްޓެވެ. އަދި ކޯޗިން ކެރިއަރުގެ ވެސް ފުރަތަމަ ތަށްޓެވެ.
