ލިޒްބަން (މެއި 14) - މި ސީޒަން ނިމުމުން ޔުވެންޓަސްގެ ތަރި ކްރިސްޓިއާނޯ ރޮނާލްޑޯ އަލުން އޭނާގެ ކުރީގެ ކްލަބް ސްޕޯޓިން ލިޒްބަން އަށް ގެންދަން އޭނާގެ މަންމަ ޑޮލޯރޭސް އަވިއޭރޯ މަސައްކަތް ކުރާނެ ކަމަށް އެވެ.
ރޮނާލްޑޯ އޭނާގެ ސީނިއާ ކެރިއަރު ފެށީ ސްޕޯޓިން އިންނެވެ. އުމުރުން 12 އަހަރުގައި ސްޕޯޓިން ޔޫތު ޓީމާ ގުޅުނު ރޮނާލްޑޯގެ އުމުރުން 16 އަހަރުގައި ވަނީ ސީނިއާ ޓީމަަށް ޕްރޮމޯޓް ކޮށްފަ އެވެ. ރޮނާލްޑޯ އަކީ 2001 ވަނަ އަހަރު ސްޕޯޓިންގެ 16، 17، 18 އަހަރުން ދަށުގެ ޓީމުތަކުގެ އިތުރުން ސްޕޯޓިން ބީ ޓީމު އަދި ސީނިއާ ޓީމުގެ އެކި މެޗުތަކުގައި ކުޅެމުން އައި ކުޅުންތެރިއެކެވެ. މިއީ ޕޯޗުގަލްގެ ތާރީހުގައި ވެސް އެއް ކުޅުންތެރިއަކު ހުރިހާ ލެވަލެއްގައި އެއް ސީޒަނެއްގައި ކުޅުނު ފުރަތަމަ ފަހަރެވެ.
ސީނިއާ ޓީމަށް ގަވާއިދުން ކުޅެމުން އަންނަނިކޮށް 2003 ވަނަ އަހަރު ރޮނާލްޑޯ އަށް މެންޗެސްޓާ ޔުނައިޓެޑްގެ ހުށަހެޅުމެއް ލިބި އޭނާ އެ ޓީމަށް ބަދަލުވީ 12.24 މިލިއަން ޕައުންޑަށެވެ. މިއީ އޭރު ޒުވާން ކުޅުންތެރިއަކަށް ޕްރިމިއާ ލީގު ޓީމަކުން ދިން އެންމެ ބޮޑު ފީ އެވެ.
ސްޕޯޓިންގެ މެޗެއްގެ ތެރެއިން ރޮނާލްޑޯ.-- ފޮޓޯ: އޭއެފްޕީ
މި ސީޒަނަށް ފަހު އުމުރުން 36 އަހަރުގެ ރޮނާލްޑޯ ޔުވެންޓަސް ދޫކޮށްލާނެ ކަމަށް މީޑިއާ ރިޕޯޓްތައް ބުނި ނަމަވެސް ޔުވެންޓަސްގެ ވައިސް ޗެއާމަން ޕަވެލް ނެޑްވެޑް ބުނީ ޔުވެންޓަސްއާ އެކު ރޮނާލްޑޯ ހަދާފައިވާ އެއްބަސްވުން ހަމަވަނީ 2022 ވަނަ އަހަރުގެ ޖޫންގެ ނިޔަލަށް ކަމަށެވެ. އަދި އެއްބަސްވުމާ އެއްގޮތަށް ރޮނާލްޑޯ އަމަލުކުރާނެ ކަމުގެ ޔަގީންކަން އެބައޮތް ކަމަށް ނެޑްވެޑް ބުންޏެވެ.
ރޮނާލްޑޯގެ މަންމަ ޑޮލޯރޭސް ވަނީ ސްޕޯޓިން ސަޕޯޓަރުން ގާތުގައި ރޮނާލްޑޯ އެ ޓީމަށް ގެންނަން މަސައްކަތް ކުރާނެ ކަމަށް ބުނެފަ އެވެ.
"އަހަރެން އަލުން އޭނަ ގެންނަން (ސްޕޯޓިން އަށް ގެންނަން) ވާހަކަ ދައްކާނަން. އަންނަ އަހަރު އޭނަ (ރޮނާލްޑޯ) ކުޅޭނީ އަލްވަލާޑޭގައި (ސްޕޯޓިން ދަނޑުގައި)،" ސްޕޯޓިން އިން މި ފަަހަރުގެ ޕޯޗުގަލްގެ ޗެމްޕިއަންކަން ހޯދުމުން ބޭއްވި އުފާފާޅުކުރުމުގެ ޕެރޭޑެއްގައި ތިބި އެ ކްލަބްގެ ސަޕޯޓަރުންތަކަކާ ވާހަކަ ދައްކަމުން ޑޮލޯރޭސް ބުންޏެވެ.
މީގެ ކުރިން ރޮނާލްޑޯ ވަނީ ކެރިއަރު ނިންމާލުމުގެ ކުރިން ސްޕޯޓިން އަށް ކުޅެލުމުގެ ފުރުސަތު ލިބިއްޖެނަަމަ ބޭނުން ހިފާނެ ކަމަށް ބުނެފަ އެވެ. އެއީ ރެއާލަށް ކުޅެމުން 2016 ވަނަ އަހަރުގެ ޗެމްޕިއަންސް ލީގުގައި ސްޕޯޓިންއާ ދެކޮޅަށް ކުޅުނު މެޗެއްގެ ކުރިންނެވެ.
ސްޕޯޓިން އިން ވަނީ 19 އަހަރު ތެރޭ ފުރަތަމަ ފަހަރަށް ޕޯޗުގަލްގެ ޗެމްޕިއަންކަން މި ސީޒަނުގައި ހޯދައިފަ އެެވެ. މިއާ އެކު އަންނަ ސީޒަނުގައި ޗެމްޕިއަންސް ލީގުގެ ގްރޫޕް ސްޓޭޖުން ސްޕޯޓިން އަށް ފުރުސަތު ލިބޭނެ އެވެ. އިޓަލީގެ މީޑިއާ ރިޕޯޓްތައް ބުނާގޮތުން ޔުވެންޓަސް އަށް އަންނަ ސީޒަނުގައި ޗެމްޕިއަންސް ލީގުން ފުރުސަތު ނުލިބިއްޖެނަމަ ރޮނާލްޑޯ އެ ޓީމު ދޫކޮށްލާނެ އެވެ.
