ޓިއުރިން (މެއި 11) - އަންނަ ސީޒަނުގެ ޗެމްޕިއަންސް ލީގަށް ޔުވެންޓަސް ކޮލިފައި ނުވެއްޖެނަމަ އެ ޓީމުގެ ތަރި ކްރިސްޓިއާނޯ ރޮނާލްޑޯ އެ ކްލަބް ދޫކޮށްލާނެ ކަމަށް އިޓަލީގެ މީޑިއާ ރިޕޯޓްތައް ބުނެފި އެވެ.
ލީގުގެ ފަހު ތިން މެޗަށް ނުކުންނައިރު، ޔުވެންޓަސް މި ވަގުތު އޮތީ ފަސް ވަނައިގަ އެވެ. އިޓާލިއަން ލީގުން ޗެމްޕިއަންސް ލީގަށް ކޮލިފައިވާނީ ގަދަ ހަތަރު ޓީމެވެ. ލީގު ޗެމްޕިއަންކަން ޔަގީންކޮށްފައިވާ އިންޓަ މިލާން އެއް ވަނައިގައި އޮތީ 35 މެޗުން 85 ޕޮއިންޓް ހޯދައިގެންނެވެ. ދެ ވަނައިގައި އޮތް އެޓަލަންޓާ އާއި ތިން ވަނައިގައި އޮތް މިލާނަށް 35 މެޗުން 72 ޕޮއިންޓް ލިބިފައިވާއިރު، އެޓަލަންޓާ އަށް ކުރި ލިބެނީ ހެޑް ޓު ހެޑް ގަވާއިދުންނެވެ. ނަޕޯލީ ހަަތަރެއްގައި އޮތީ 35 މެޗުން 70 ޕޮއިންޓާ އެކު އެވެ. ފަސް ވަނައިގައި އޮތް ޔުވެންޓަސް އަށް 35 މެޗުން ވަނީ 69 ޕޮއިންޓް ލިބިފަ އެވެ.
ޔުވެންޓަސް އަށް ބާކީ އޮތް ތިން މެޗަކީ ރަށުންބޭރުގައި ލީގުގެ އަށް ވަނައިގައި އޮތް ސަސުއޯލޯ އާއި 12 ވަނައިގައި އޮތް ބޮލޯނިއާއާ ދެކޮޅަށް ކުޅޭ ދެ މެޗާއި އަމިއްލަ ދަނޑުގައި ޗެމްޕިއަން އިންޓައާ ދެކޮޅަށް ކުޅޭ މެޗެވެ. މިއީ ގަދަ ހަތަރަކަށް ވާދަކުރާ އެހެން ޓީމުތަކާ އަޅާކިޔާއިރު، އުނދަގޫ މެޗުތަކެކެވެ. އަމުދުން ޔުވެންޓަސްގެ ފޯމު ފަހަކަށް އައިސް އޮތްގޮތުން މި މެޗުތަކުގައި ނަތީޖާ ނެރުން ވާނީ އުނދަގޫ ކަމަކަށެވެ.
ޔުވެންޓަސްގެ މެޗެއްގެ ތެރެއިން ރޮނާލްޑޯ: ރޮނާލްޑޯ މި ސީޒަނަށް ފަހު އެ ކްލަބް ދޫކޮށްލުމުގެ ފުރުސަތު ބޮޑު.
މީގެ ތިން އަހަރު ކުރިން ރެއާލަށް 100 މިލިއަން ޔޫރޯ ދިނުމަށް ފަހު ޔުވެންޓަސް އިން ރޮނާލްޑޯ ގެނައި އެންމެ ބޮޑު އަމާޒަކީ ޗެމްޕިއަންސް ލީގު ކާމިޔާބުކުރުމެވެ. ރޮނާލްޑޯ ގުޅުނު ފަހުން ޔުވެންޓަސް އަށް ޗެމްޕިއަންސް ލީގުގެ ކުއާޓާ ފައިނަލް ފަހަނައަޅައި ދެވިފައިނުވެ އެވެ. ޔުވެންޓަސްއާ އެކު ރޮނާލްޑޯ ހަދާފައިވާ އެއްބަސްވުން ހަމަވާނީ އަންނަ އަހަރު ޖޫން މަހު އެވެ. ހަރަދުކުޑަ ކުރުމުގެ ގޮތުން މިދިޔަ ސީޒަނަށް ފަހު ވެސް ރޮނާލްޑޯ ދޫކޮށްލަން ޔުވެންޓަސް އިން މަސައްކަތްކުރި ކަމަށް މީޑިއާގައި ރިޕޯޓްކުރި އެވެ. އެކަމަކު ޔުވެންޓަސް އިން ފަހުން އެ ވާހަކަތައް ދޮގުކުރި އެވެ.
ރިޕޯޓްތައް ބުނާގޮތުން އުމުރުން 36 އަހަރުގެ ރޮނާލްޑޯ މިހާރު ވިސްނައިގެން ހުރީ ޔުވެންޓަސް އަށް ޗެމްޕިއަންސް ލީގުގައި ކުޅެން އަންނަ ސީޒަނުގައި ފުރުސަތު ނުލިބިއްޖެނަމަ އެހެން ޓީމަކާ ގުޅޭށެވެ. އިޓަލީގެ މީޑިއާ ރިޕޯޓްތައް ބުނާގޮތުން ޔުވެންޓަސް އިން ރޮނާލްޑޯ ބޭނުންވާނަމަ އޭނާ ދޫކޮށްލާނެ އެވެ. އެއީ ހަރަދު ސަލާމަތްކުރުމުގެ ގޮތުންނެވެ. ރޮނާލްޑޯ މި ވަގުތު ޔުވެންޓަސްގައި ހުރީ އަހަރަކު 30 މިލިއަން ޔޫރޯގެ މުސާރަ އަކަށެވެ.
ރޮނާލްޑޯ، ޔުވެންޓަސް ދޫކޮށްލައިފިނަމަ އޭނާ ހޯދަން މަސައްކަތްކުރާނެ ކްލަބްތަކުގެ ތެރޭގައި ކުރިން އޭނާ ކުޅުނު މެންޗެސްޓާ ޔުނައިޓެޑާއި ރެއާލްގެ އިތުރުން ފްރާންސްގެ ޗެމްޕިއަން ޕީއެސްޖީ ހިމެނެ އެވެ. ޕީއެސްޖީން ރޮނާލްޑޯ ގެންދާނެ ކަމަށް ބެލެވެނީ އެ ކްލަބަށް ކުޅޭ ކީލިއަން އެމްބާޕޭ ޓީމު ދޫކޮށްލައިފިނަމަ އެވެ.
މި ސީޒަނުގައި މިހާތަނަށް ރޮނާލްޑޯ ވަނީ ޔުވެންޓަސް އަށް ކުޅެދިން 41 މެޗުން 34 ގޯލު ޖަހައިފަ އެވެ. އޭގެ ތެރެެއިން 27 ގޯލަކީ ލީގުގައި ޖެހި ގޯލުތަކެވެ.
ޔުވެންޓަސް އަށް ބަދަލުވުމަށް ފަހު ރޮނާލްޑޯ ވަނީ އެ ކްލަބަށް 99 ގޯލު ޖަހައިދީފަ އެވެ. ޔުވެންޓަސް އަށް އިތުރު އެއް ގޯލު ޖަހައިދިނުމާ އެކު ރޮނާލްޑޯ ވެގެންދާނީ ޔޫރަޕްގެ ވަރުގަދަ ތިން ލީގެއްގައި ތިން ކްލަަބަކަށް 100 ގޯލު ޖެހި ފުރަތަމަ ކުޅުންތެރިޔާ އަށެވެ. ރޮނާލްޑޯ ވަނީ ރެއާލަށް 450 ގޯލު ޖަހައިދީފަ އެވެ. އަދި އޭނާ އެންމެ ފުރަތަމަ ވިދާލި ޔުނައިޓެޑަށް 118 ގޯލު ކާމިޔާބުކޮށްދިނެވެ.
