އެމްއެމްޕީއާރުސީގެ ހިޔާނާތުގެ ފައިސާ ލިބިފައިވާ ކަމަށް ތުހުމަތު ކުރެވޭ ހުރިހާ މީހުން ވަކިކުރުމަށް އެ މައްސަލަ ބެލި ރައްޔިތުންގެ މަޖިލީހުގެ ކޮމެޓީން ނިންމާފައިވާއިރު އެ ކޮމެޓީގެ ނިންމުންތައް ވަރަށް ޒިންމާދާރުކަން ކުޑަ ކަމަށް މެދު ހެންވޭރު ދާއިރާގެ މެމްބަރު އަދި އެމްޑީޕީގެ ޕާލަމެންޓްރީ ގުރޫޕުގެ ލީޑަރު، އަލީ އާޒިމް އިއްޔެ ވިދާޅުވެއްޖެ އެވެ.
ހިޔާނާތް ބަލައި އެކަން ދިރާސާ ކުރަމުންދާ ސަލާމަތީ ހިދުމަތްތަކުގެ ކޮމިޓީ އާއި ޖުޑިޝަރީ ކޮމިޓީ ގުޅިގެން އުފައްދާފައިވާ ޖޮއިންޓް ކޮމިޓީން ވަނީ ރިޕޯޓް ފާސްކޮށް މުޅި ލިސްޓް ބުދަ ދުވަހު ވަނީ އާއްމުކޮށްފަ އެވެ. އެ ލިސްޓުގައި އެމްޑީޕީގެ އިސް ސަފުގައި މަޖިލިސް ތަމްސީލު ކުރައްވާ ހަތަރު މެމްބަރުން ހިމެނެ އެވެ. އޭގެ ތެރެއިން އަލީ އާޒިމަށް އެއް މިލިއަން ރުފިޔާ ލިބުނު ކަމަށް އާއްމުވި ލިސްޓެއްގައިވެ އެވެ.
ލިސްޓުގައިވާ ގޮތުން މިހާރު ދައުލަތުގެ އެކިއެކި މަގާމުގައި ތިބި 119 މީހެއްގެ ނަން އެބަ އޮތެވެ. އޭގެ ތެރެއިން އައްޔަންކޮށްފައިވާ މަގާމުތަކުގައި ތިބި މީހުން މަގާމުތަކުން ވަކިކުރަން މަސައްކަތް ފެށުމަށް ކޮމިޓީން ވަނީ ނިންމާފަ އެވެ. އަދި، އިންތިހާބީ މަގާމުތަކުގައި ތިބި މީހުންނަކީ އަމިއްލައަށް އިސްތިއުފާ ދިނުމުން ނޫނީ ހުކުމެއް ސާބިތުވެގެން ނޫން ގޮތަކަށް ވަކިވާނެ ބަޔަކަށް ނުވާތީ، އެފަދަ މީހުންގެ މައްސަލަތައް އަވަސް ކުރުމަށް ކަމާބެހޭ އިދާރާތަކަށް ދެންނެވުމަށް ވެސް ކޮމިޓީން ވަނީ ނިންމާފަ އެވެ.
"އަދަދު" ނޫހުން އިއްޔެ ފެށި "އެތެރެފުށް" ޕްރޮގްރާމުގައި އާޒިމް ވިދާޅުވީ ރައްޔިތުންގެ މަޖިލީހުން އެމްއެމްޕީއާރުސީގެ ހިޔާނާތް ބަލަން ޖެހުނީ އެސެޓް ރިކަވެރީ ކޮމިޝަނުން އެ ބޭފުޅުންގެ ޒިންމާ ރަނގަޅަށް އަދާ ނުކުރުމުން ކަމަށެވެ. ނަމަވެސް, މަޖިލީހުގެ ކޮމެޓީންވެސް ރަނގަޅު ޒިންމާދާރު މަސައްކަތެއް ކުރިތަން ނުފެންނަ ކަމަށް އޭނާ ވިދާޅުވި އެވެ.
އަޅުގަނޑު ދެވަރެސް ވޭ އިނގޭތޯ ރައްޔިތުންގެ މަޖިލީހުގެ މެމްބަރެއްގެ ގޮތުން އިނދެގެން މިވާހަކަ ބުނަން. އެހެން ނަމަވެސް ޒިންމާދާރު މަސައްކަތެއް ކުރެވުނު ކަމަށް ވަނީނަމައެއް ދެން ހަމަ އެ ސިޓީ އެއައި ގޮތަކަށް ބޭރު ކުރުމުގެ ބޭނުމެއް ނެތްތާ،-- އާޒިމް
އޭނާ ވިދާޅުވި ގޮތުގައި އެމްއެމްޕީއާރުސީގެ ތަހުގީގުގެ ތެރެއަށް މަޖިލީހުން ވަދެ އެކަން އަވަސް ކުރަން ޖެހޭ ކަމަށެވެ. އެކަމުގައި މަޖިލީހުގެ މެމްބަރުންތަކަކަށް ތުހުމަތު ކުރެވުމާއި ދައުލަތަށް ލިބެން ޖެހޭ ފައިސާތަކެއް ނުލިބި އޮތުމަކީ ބަލަން ޖެހޭ ކަމެއް ކަމަށް އަޒިމް ވިދާޅުވި އެވެ.
ނަމަވެސް, އާޒިމް ވިދާޅުވީ އެސެޓް ރިކަވެރީ ކޮމިޝަންގެ މަގުސަދަކަށް ވާންވާނީ ބަޔަކު ފަލީހަތް ކުރުން ނޫން ކަމަށެވެ.
"އަކަށީގެންވާ ރަނގަޅު މަގުސަދެއް އޮންނަން ވާނެ ކަމެއް ކޮށް ނިމޭއިރުގައި. އެސެޓް ރިކަވެރީ ކޮމިޝަންގެ މަގުސަދަކީ ދައުލަތަށް ދައުލަތުން ގެއްލުނު ފައިސާ އަނބުރާ ހޯދުން. މީހުން ފަލީހަތް ކުރުމެއް ވެސް ނޫން. މީހުންގެ ވާހަކަ ދެއްކުމެއް ވެސް ނޫން، މީހަކާ ދޭތެރޭ ޝައްކެއް އުފެއްދުމެއް ވެސް ނޫން،" އާޒިމް ވިދާޅުވި އެވެ.
އާޒިމް ވެސް ވިދާޅުވީ ތުހުމަތު ކުރެވޭ މީހުންގެ ތެރެއިން ދައުލަތުގެ އިސް މަގާމުތަކުގައި ތިބި މީހުންނާ ދޭތެރޭ އަވަސް ފިޔަވަޅުތަކެއް އެޅެން ޖެހޭ ކަމަށެވެ.
ތަހުގީގެއް ކުރެވި ޕްރޮސިކިއުޓް ކުރަން ފޮނުވޭވަރަށް ހެކި ހުރި ފަރާތްތައް އެބަ ޖެހޭ ދުރުގައި ތިބެން،-- އާޒިމް
އެމްއެމްޕީއާރުސީގެ ހިޔާނާތުގައި އިސްކޮށް ހުންނެވި ކުރީގެ ނައިބު ރައީސް އަހުމަދު އަދީބާ ގާތްގުޅުމެއް އޮތްނަމަވެސް އެ ހިޔާނާތުގެ އެއްވެސް ފައިސާއެއް ލިބިފައިނުވާ ކަމަށް އާޒިމް ވިދާޅުވި އެވެ. އަދި އެ މައްސަލާގައި އޭނާގެ މައްޗަށް ދައުވާ ކުރަން ފޮނުވާ ހިސާބުން އިސްތިއުފާ ދެއްވާނެ ކަމަށް އާޒިމް ވިދާޅުވި އެވެ.
