ގއ. ކޮނޑޭ ކައުންސިލްގެ އިންތިހާބީ ރައީސް ހުވާކުރުން ފަސްކުރުމަށް ހައި ކޯޓުން އިއްޔެ އަމުރުކޮށްފި އެވެ.
ގާތްގަނޑަކަށް 300 މީހުންގެ އާބާދީގެ ކޮނޑޭ އިން ކައުންސިލްގެ ރައީސްކަމަށް އިންތިހާބުވީ އެމްޑީޕީގެ ކެންޑިޑޭޓު އަބްދުލްހަކީމެވެ.
އޭނާ މަގާމުގެ ހުވާކުރުން ހައި ކޯޓުން ހުއްޓުވީ، އިންތިހާބުގައި ދެ ވަނަ އަށް އެންމެ ގިނަ ވޯޓު ލިބުނު ޝުއައިބު މުހައްމަދު ދީދީ ހުށަހެޅި އިންތިހާބީ ޝަކުވާއަކާ ގުޅިގެންނެވެ. އޭނާ އަށް އިންތިހާބު ގެއްލުނީ ދެ ވޯޓުގެ ތަފާތަކުންނެވެ.
ތިން ފަނޑިޔާރުން އިއްތިފާގުވެވަޑައިގަތް އަމުރުގައި ބުނީ އިންތިހާބީ ޝަކުވާގެ މައްސަލަ ނިމުމުގެ ކުރިން ކައުންސިލް ރައީސްގެ މަގާމުގެ ގާނޫނީ ހުވާކުރުމަކީ އެ ވޯޓާ ގުޅިގެން މައްސަލަ ހުށަހަޅާފައިވާ ފަރާތާއި އިންތިހާބުގައި ވާދަކުރި އެހެން ފަރާތްތަކުގެ ހައްގަށް އުނިކަމެއް އަތުވެދާނެ ކަމެއް ކަމަށް ބެލެވޭ ކަަމަށެވެ. އެހެންވެ ހައި ކޯޓުން ބަލާ މައްސަލައިގައި ގޮތެއް ކަނޑައަޅަންދެން ނުވަތަ ވަކި ގޮތެއް އަންގަންދެން ކައުންސިލްގެ ރައީސް ހުވާކުރުން ފަސްކުރަން އެ އަމުރުގައި ވެ އެވެ.
މި އަމުރު ނެރުއްވީ ފަނޑިޔާރު އަބްދުއްރައޫފް އިބްރާހީމާއި ފަނޑިޔާރު އަބްދުﷲ ހަމީދުގެ އިތުރުން ފަނޑިޔާރު ފާތުމަތު ފަރްހީޒާ އެވެ.
ކައުންސިލަރުން ހުވާކުރަން ހަމަޖައްސާފައި ވަނީ އަންނަ އާދީއްތަދުވަހެވެ. ކޮވިޑުގެ ބަލިމަޑުކަމާ ހެދި އެލްޖީއޭ އިން އިންތިޒާމްކޮށްފައި އޮތީ ހުވާކުރުމުގެ ރަސްމިއްޔާތު އޮންލައިންކޮށް ބޭއްވުމަށެވެ.
