އެމްއެމްޕީއާރުސީގެ ހިޔާނާތުގެ ލޯ ލާރިއެއްގައި ވެސް ނުޖެހޭ ކަމަށާއި މަޖިލީހުން މިއަދު އާއްމުކުރި ލިސްޓުގައި ނަން ހިމަނާފައި އޮތީ އަބުރު ކަތިލަން ކަމަށް ޕީއެންސީގެ ރައީސް އަބްދުއްރަހީމް އަބްދުﷲ (އަދުރޭ) މިރޭ ވިދާޅުވެއްޖެ އެވެ.
އެސެޓް ރިކަވަރީ ކޮމިޝަނުން ރައްޔިތުންގެ މަޖިލީހަށް ދިން ލިސްޓު މިއަދު އާއްމުކުރި އިރު އަދުރޭގެ ނަން ހިމަނާފައި އޮތެވެ. އޭނާއަށް 1.71 މިލިއަން ރުފިޔާ ލިބުނު ކަމަށް ލިސްޓުގައިވެ އެވެ.
އަދުރޭ ކުރެއްވި ޓުވީޓުގައި ވިދާޅުވި ގޮތުގައި މަތިމައްޗަށް ލިސްޓުތަކުގައި އޭނާ ނަން ޖެހިޔަސް ފަހަތަށް ޖެހިވަޑައެއް ނުގަންނަވާނެ އެވެ.
"މިހުރީ ވަރަށް ސާބިތުކަމާ އެކު ތުހުމަތަށް ޖަވާބުދާރީވުމަށް ތައްޔާރު،" އަދުރޭ ވިދާޅުވި އެވެ.
އަދުރޭ ހިމެނިވަޑައިގަންނަވާ ގޮތުން ރައްޔިތުންގެ މަޖިލީހުގެ ކުރީގެ 44 މެމްބަރުންނާއި މިހާރުގެ 16 މެމްބަރުންގެ ނަން ލިސްޓުގައި އެބައޮތެވެ. މިއީ މި ލިސްޓް ރަސްމީ ފަރާތަކުން އާންމުކުރި ފުރަތަމަ ފަހަރެވެ.
ލިސްޓުގައިވާ ގޮތުން މިހާރު ދައުލަތުގެ އެކިއެކި މަގާމުގައި ތިބި 119 މީހެއްގެ ނަން އެބަ އޮތެވެ. އޭގެ ތެރެއިން އައްޔަންކޮށްފައިވާ މަގާމުތަކުގައި ތިބި މީހުން މަގާމުތަކުން ވަކިކުރަން މަސައްކަތް ފެށުމަށް ކޮމިޓީން ވަނީ ނިންމައިފަ އެވެ.
އާއްމުކުރި ލިސްޓުގައި ހިމެނޭ އެންމެންނާ އެސެޓް ރިކަވަރީ ކޮމިޝަނުން ސުވާލު ކުރި ކަމެއް ސާފެއް ނޫނެވެ. އެ ކޮމިޝަނުން ބުނެފައިވާ ގޮތުގައި އެ ލިސްޓަކީ ސުވާލުކޮށް ކަންތައްތަކެއް ސާފުކުރަން ބޭނުންވާ ބައެއްގެ ލިސްޓު ކަމަށާއި އެ މީހުންނަކީ ކުށްވެރިން ކަމުގައި ނުނިންމާ ކަމަށެވެ.
