ރައްޔިތުންގެ މަޖިލީހަށް ފޮނުވި ލިސްޓުގައި ނަން އޮތް އެންމެންނަކީ އެމްއެމްޕީއާރުސީގެ ހިޔާނާތަށް ތުހުމަތު ކުރެވޭ މީހުންގެ ގޮތުގައި ނުނިންމާ ކަމަށް އެސެޓް ރިކަވަރީ ކޮމިޝަންގެ ރައީސް އަހްމަދު އަސްއަދު މިރޭ ވިދާޅުވެއްޖެ އެވެ.
ރައްޔިތުންގެ މަޖިލިހުގެ ސަލާމަތީ ހިދުމަތްތަކާ ބެހޭ ކޮމިޓީ އަދި ޖުޑީޝަރީ ކޮމިޓީ ގުޅިގެން އުފައްދާފައިވާ ޖޮއިންޓް ކޮމިޓީން ވަނީ ހިޔާނާތުން މަންފާވި ކަމަށް ބުނާ ލިސްޓު އާއްމުކޮށްފަ އެވެ. އެ ލިސްޓުގައި ދައުލަތުގެ އެކި މަގާމްތައް ފުރުއްވި އަދި މިހާރު ވެސް މަގާމްތަކުގައި ތިއްބެވި ބޭފުޅުންނާއި މަޖިލީސް ކުރީގެ މެމްބަރުންނާއި މިހާރުގެ މެމްބަރުން ހިމެނިވަޑައިގަންނަވަ އެވެ.
މި ވެރިކަން ފެށުމާ އެކު އެކުލަވާލި އެސެޓް ރިކަވަރީ ކޮމިޝަނުގެ ތަހުގީގު ލަސް ކަމުގެ ފާޑުކިއުން އަމާޒުވެ، މަޖިލީހުން އެދިގެން ލިސްޓު ފޮނުވުމުން، ކޮމިޓީގެ ނިންމުމަކީ އެ ލިސްޓު އާއްމުކުރުމެވެ. އޭގައި 281 މީހެއްގެ ނަން އޮތް އިރު، އެ އެންމެންނާ ސުވާލު ނުކޮށް ނަން ހިމެނި ކަމުގެ ކަންބޮޑުވުން ދަނީ ފާޅުކުރަމުންނެވެ.
މީގެ އިތުރުން އެ ލިސްޓު ސައްހަ ނޫން ކަމުގެ ތުހުމަތު ވެސް ދަނީ އަޅުވަމުންނެވެ.
އެސެޓް ރިކަވަރީ ކޮމިޝަންގެ ރައީސް އަސްއަދު މިރޭ ވަނީ އާންމުކުރި ލިސްޓަށް އުނި އިތުރު ގެނެސް، ބައެއް މީހުންގެ ނަން އުނިކޮށް އަނެއް ބައި މީހުންގެ ނަން އިތުރުކުރި ކަމަށް ދެކެވޭ ވާހަކަ ދޮގު ކުރައްވައިފަ އެވެ. އޭނާ ވިދާޅުވި ގޮތުގައި އެ ލިސްޓަކީ އެ ކޮމިޝަނުން މަޖިލިހަށް ފޮނުވި ލިސްޓެވެ.
އެމްއެމްޕީއާރުސީގެ ހިޔާނާތުގެ ލިސްޓުގައި ހިމެނޭ މީހުންނާއި ވިޔަފާރިތަކަށް ކުރެވޭ ހިޔާނާތުގެ ތުހުމަތާ ގުޅިގެން އައްސަދު ވިދާޅުވީ ލިސްޓުގައި ތިބި މީހުންނަކީ "ޕާސަންސް އޮފް އިންޓްރެސްޓް" ކަމަށެވެ. އެހެން ގޮތަކުން ބުނާ ނަމަ އެއީ ސުވާލުކޮށް ކަންތައްތަކެއް ސާފުކުރަން ބޭނުންވާ ބައެއްގެ ލިސްޓު ކަމަށް އޭނާ ވިދާޅުވި އެވެ.
"އަޅުގަނޑުމެންގެ ލިސްޓަކީ ޕާސަންސް އޮފް އިންޓްރެސްޓް ލިސްޓެއް. އެއީ ކުށްވެރިން ކަމުގައި ނިންމުމަކީ އަޅުގަނޑުމެންގެ އިހުތިޔާރުގައި އޮތް ކަމެއް ނޫން، -- އަސްއަދު
މި މައްސަލަ ތަހުގީގުކުރަމުން ދަނީ އެސެޓް ރިކަވަރީ ކޮމިޝަނާއި އެންޓި ކޮރަޕްޝަން ކޮމިޝަން އަދި ފުލުހުން ގުޅިގެންނެވެ.
އަސްއަދު ވިދާޅުވީ ލިސްޓުގައި ހިމެނޭ މީހުންނަށް ދައުވާ ކުރުމާ މެދު ގޮތެއް ނިންމާނީ ތަހުގީގުގެ ތެރެއިން ސުވާލުކުރުމަށް ފަހު ލިބޭ މައުލޫމާތާއި ހެކީގެ މައްޗަށް ބިނާކޮށް ކަމަށެވެ. އަދި، ތިން އިދާރާ ގުޅިގެން ކުރަމުންދާ މަސައްކަތަކީ އެ މައުލޫމާތާއި ހެކީގެ އަލީގައި ދައުވާ ކުރާނެ ބަޔަކު އޮޅުންފިލުވުމުގެ މަސައްކަތް ކަމަށް ވިދާޅުވި އެވެ.
ތަހުގީގަށް ފަހު ހިޔާނާތުގެ މައްސަލައިގައި ދައުވާކުރަން ފޮނުވަން ޖެހޭ ބަޔެއްގެ މައްޗަށް ދައުވާކުރަން ފޮނުވާނެ ކަމުގެ ޔަގީންކަން އައްސަދު އެރުވި އެވެ.
ރައްޔިތުންގެ މަޖިލިހުން ހިޔާނާތުގެ ފައިސާ ލިބުނު ލިސްޓު އާންމުކުރީ، އެކަން ކުރަން މަޖިލިހަށާއި ވެރިކަން ކުރާ މައި ޕާޓީ އެމްޑީޕީއަށް އިންތިހާއަށް ޕްރެޝަރު ބޮޑުވި ފަހުންނެވެ. މީގެ ކުރިން ރަސްމީ އެއްވެސް އިދާރާއަކުން ލިސްޓު ހާމަކޮށްފައެއް ނުވެ އެވެ.
އެސެޓް ރިކަވަރީ ކޮމިޝަނުން އެ ލިސްޓު އާންމު ނުކުރި ސަބަބާ ގުޅޭ ގޮތުން އަސްއަދު ވިދާޅުވީ "ލިސްޓު ހާމަނުކޮށް މަސައްކަތް ކުރަމުން ދިޔައީ މަސައްކަތް ކުރިޔަށް ދާތީ" ކަމަށެވެ.
ރައްޔިތުންގެ މަޖިލީހުން އާންމުކޮށްފައިވާ ލިސްޓްގައި ދައުލަތުގެ މަގާމުތަކުގައި ތިބި 119 ވަނަ މީހެއްގެ ނަން ހިމެނެ އެވެ. އޭގެ ތެރެއިން އައްޔަންކޮށްފައިވާ މަގާމުތަކުގައި ތިބި މީހުން މަގާމުތަކުން ވަކިކުރަން މަސައްކަތް ފެށުމަށް ކޮމިޓީން ވަނީ ނިންމާފަ އެވެ.
އަދި، އިންތިހާބީ މަގާމުތަކުގައި ތިބި މީހުންނަކީ އަމިއްލައަށް އިސްތިއުފާ ދިނުމުން ނޫނީ ހުކުމެއް ސާބިތުވެގެން ނޫން ގޮތަކަށް ވަކިވާނެ ބަޔަކަށް ނުވާތީ، އެފަދަ މީހުންގެ މައްސަލަތައް އަވަސް ކުރުމަށް ކަމާބެހޭ އިދާރާތަކަށް ދެންނެވުމަށް ވެސް ކޮމިޓީން ވަނީ ނިންމާފަ އެވެ.
