އެމްއެމްޕީއާރުސީގެ ހިޔާނާތުގެ ފައިސާ ލިބުނު ކަމަށް ތުހުމަތު ކުރެވޭ ލިސްޓުގައި އޮތް އަށް ކުންފުންޏެއްގެ މައްޗަށް މަދަނީ ދައުވާ އުފުލުމާ މެދު ގޮތެއް ނިންމަން ރައީސް އޮފީހަށް ފޮނުވައިފި އެވެ.
އެމްއެމްޕީއާރުސީ ހިޔާނާތުގެ ފައިސާ ލިބުނު ލިސްޓުގައި 50 ވިޔަފާރިއެއް ހިމެނެ އެވެ. އޭގެ ތެރޭގައި ހިމެނެނީ ރާއްޖޭގައި ރަޖިސްޓްރީކޮށްގެން ހިންގާ 43 ވިޔަފާރިއަކާއި ބޭރުގެ ގައުމުތަކުގައި ރަޖިސްޓްރީކޮށްގެން ހިންގާ ހަތް ވިޔަފާރިއެކެވެ.
މީގެ ތެރެއިން 28 ވިޔަފާރިއެއްގެ މައްސަލަ އޮތީ ތަހުގީގު މަރުހަލާގަ އެވެ. އަދި ހަތް ވިޔަފާރިއެއްގެ މައްސަލަ އޮތީ މައުލޫމާތު އެއްކުރުމުގެ މަރުހަލާގަ އެވެ. އިތުރު ތިން ވިޔަފާރިއެއްގެ މައްސަލަ ސަސްޕެކްޓް އައިޑެންޓިފިކޭޝަން މަރުހަލާގައި އޮތް އިރު، އެއް ވިޔަފާރީގެ މައްސަލަ އޮތީ އިބްތިދާއީ ތަހުގީގު މަރުހަލާގަ އެވެ.
ހިޔާނާތުގެ ފައިސާ ލިބުނު ކަމަށް ބުނާ ވިޔަފާރިތަކުގެ ތެރެއިން މަދަނީ ދައުވާ އުފުލުމާ މެދު ގޮތެއް ނިންމަން ރައީސް އޮފީހަށް ފޮނުވި ލިސްޓުގައި އައިލެންޑް އޭވިއޭޝަން ހިމެނެ އެވެ. އެ ކުންފުންޏަކީ ދިވެހި ދައުލަތުގެ ސައްތައިން ސައްތަ ހިއްސާ އޮންނަ ކުންފުންޏެކެވެ. އެ ކުންފުނީގެ އިތުރުން ދައުވާ ކުރުމާ މެދު ގޮތް ނިންމަން ރައީސް އޮފީހަށް ފޮނުވީ:
- އެޕޯލޯ ހޯލްޑިންގްސް ޕްރައިވެޓް ލިމިޓެޑް
- ޔޫރޯ މާކެޓިން ޕްރައިވެޓް ލިމިޓެޑް
- ހެވަންލީ މޯލްޑިވްސް ޕްރައިވެޓް ލިމިޓެޑް
- އިންޓްރެޕިޑް ޕްރައިވެޓް ލިމިޓެޑް
- އައިލެންޑް ޓްރާންސްޕޯޓް ޕްރައިވެޓް ލިމިޓެޑް
- މެރިން ޑިޒައިން މޯލްޑިވްސް ޕްރައިވެޓް ލިމިޓެޑް
- ސީނިިއާ އިންޓަނޭޝަނަލް ޕްރައިވެޓް ލިމިޓެޑް
އެސެޓް ރިކަވަރީ ކޮމިޝަނުން އެކުލަވާލާފައިވާ އެމްއެމްޕީއާރްސީ ހިޔާނާތުގެ ފައިސާ ލިބުނު ކަމަށް ތުހުމަތުކުރެވޭ ލިސްޓު މަޖިލިހުން އާންމުކުރީ، އެ ލިސްޓު ހާމަކުރަން ގޮވާލާތާ އެތައް ދުވަސްހެއް ވީފަހުންނެވެ. މި ލިސްޓުގައި ޖުމްލަ 281 ފަރާތެއްގެ ނަން ހިމެނޭ އިރު، އޭގެ ތެރޭގައި ކުރީ ސަރުކާރުގެ އިސްވެރިންނާއި، ކުންފުނިތަކުގެ ވެރިންނާއި، ކުރީގެ މަޖިލިސް މެމްބަރުންނާއި މިހާރުގެ ސަރުކާރުގެ ބައެއް އިސްވެރިންނާއި މަޖިލިސް މެމްބަރުން ހިމެނެ އެވެ.
މި ހިޔާނާތުގެ ތެރެއިން ބިލިއަނަކަށް ވުރެ ގިނަ ރުފިޔާއަށް ހިޔާނާތްތެރިވެފައިވާ އިރު، މިހާތަނަށް އެ ހިޔާނާތުގެ ބައިވެރިވުމުގެ މައްސަލައިގައި ދައުވާ ސާބިތުވީ ހަތަރު މީހެއްގެ މައްޗަށެވެ. އެއީ ކުރީގެ ރައީސް އަބްދުﷲ ޔާމީން، ކުރީގެ ނައިބު ރައީސް އަހުމަދު އަދީބު އަދި އެމްއެމްޕީއާރްސީގެ ކުރީގެ މެނޭޖިން ޑިރެކްޓަރު ހަސަން ޒިޔަތުގެ އިތުރުން ވިޔަފާރިވެރިޔާ ހާމިދު އިސްމާއިލް (ހާމިދު ސޭޓު) އެވެ.
