ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލަން ދިން ބޮމުގެ ހަމަލާގައި ލިބުނު ޒަހަމްތަކަށް އިތުރު ފަރުވާއަށް މާދަމާ ޖަރުމަނަށް ގެންދާ ގޮތަށް އާއިލާއިން ހަމަޖައްސައިފި އެވެ.
ނަޝީދު ދިރިއުޅުއްވާ ކެނެރީގެ ކައިރީގައި ސައިކަލެއްގައި އައިއީޑީއެއް ގޮއްވާލުމުން އެމަނިކުފާނުގެ ހަށިކޮޅަށް 10 ރޭޒަ ފުއް ވަދެފައިވެ އެވެ. ހަށިގަނޑުގެ މުހިއްމު ގުނަވަންތައް ފޫއަޅުވާލި ރޭޒަ ފުއްތަށް ނަގަން 16 ގަޑިއިރުގެ އޮޕަރޭޝަންތަކެއް ކުރި އެވެ.
ނަޝީދަށް ފަރުވާ ދެއްވި އޭޑީކޭގެ ޑޮކްޓަރުންގެ ޓީމުން މީޑިއާތަކަށް އާއްމުކުރި މައުލޫމާތުން ރައީސް ނަޝީދުގެ ފުރާނަ ސަލާމަތްވީ ހަމަ ކިރިޔާކަން އެނގެ އެވެ.
އެ ހަމަލާގައި ހަށިކޮޅު ފޫއަޅުވާލި ރޭޒަ ފުއްތައް ނަގަން ކުރި ސާޖަރީތަކަށް ފަހު އެމަނިކުފާނުގެ ހާލު ރަނގަޅުވަމުން އަންނަކަމަށް އާއިލާގެ މެމްބަރަކު މިރޭ "އަދަދު"އަށް ވިދާޅުވި އެވެ.
އިތުރަށް ވިދާޅުވީ އޭޑީކޭގެ ޑޮކްޓަރުންގެ ލަފާއާއެކު ރައީސް ނަޝީދު ޖަރުމަނަށް ގެންދަން ހަމަޖެހިފައިވަނީ މާދަމާގެ ހެނދުނުގެ ވަގުތެއްގައި ކަމަށެވެ.
ހޭނައްތައިގެން ކުރި ސާޖަރީތަކަށް ފަހު ނަޝީދު ވެންޓިލޭޓަރުން ނެގީ މި ހަފުތާގަ އެވެ. އެހެންވިޔަސް ވަރަށް ރަނގަޅަށް މޮނިޓަކުރަން ޖެހޭ ކަަމަށާއި ނަޝީދު ހޮސްޕިޓަލުން ދޫކޮށްލުމާ ގުޅޭ ޕްލޭނެއް އަދި ނެތް ކަމަށް ޑޮކްޓަރުން ވަނީ ވިދާޅުވެފަ އެވެ.
ނަޝީދަށް ދިން ހަމަލާއާ ގުޅިގެން ތިން މީހަކު ވަނީ ހައްޔަރުކޮށް ބަންދުގެ މުއްދަތު ޖަހައިފަ އެވެ. މި ހަމަލާ އަމާޒުވި ސީދާ ސަބަބެއް އަދި ނޭނގުނަސް ބޮޑަށް ގުޅެނީ ހަރުކަށި ފިކުރާ އެވެ.
