އެމްއެމްޕީއާރްސީ ހިޔާނާތުގެ ފައިސާ ލިބުނު ކަމަށް ތުހުމަތުވާ މީހުންގެ ލިސްޓުގެ ގޮތުގައި ރައްޔިތުންގެ މަޖިލިހުން އެކުލަވާލި ޖޮއިންޓް ކޮމިޓީން އާންމުކުރީ އެސެޓް ރިކަވަރީ ކޮމިޝަނުން މަޖިލީހަށް ފޮނުވި ލިސްޓުކަން، އެ ކޮމިޝަނުގެ ރައީސް އަހުމަދު އައްސަދު ކަށަވަރުކޮށްދެއްވައިފި އެވެ.
މަޖިލިހުގެ ސަލާމަތީ ހިދުމަތްތަކާ ބެހޭ ކޮމިޓީ އަދި ޖުޑީޝަރީ ކޮމިޓީ ގުޅިގެން އުފައްދާފައިވާ ޖޮއިންޓް ކޮމިޓީން ލިސްޓު ހާމަކުރީ މިއަދު އެވެ. އެކަމަކު، ކޮމިޓީން އާންމުކުރި ލިސްޓަކީ އުނިއިތުރު ގެނެސް، ބައެއް މީހުންގެ ނަން އުނިކޮށް އަނެއް ބައި މީހުންގެ ނަން އިތުރުކުރުމަށްފަހު މަޖިލީހުގެ ކޮމިޓީން ނެރުނު ލިސްޓެއް ކަމަށް ބައެއް ފަރާތްތަކުން ތުހުމަތުކުރި އެވެ.
އެކަމާއި ގުޅިގެން ލިސްޓުގެ ސައްހަކަމާ މެދު "އަދަދު"އިން ކުރި ސުވާލަކަށް ޖަވާބު ދެމުން އެސެޓް ރިކަވަރީ ކޮމިޝަނުގެ ރައީސް އައްސަދު ވިދާޅުވީ، ކޮމިޓީން ހާމަކުރީ އެ ކޮމިޝަނުން ފޮނުވި ލިސްޓު އެ އޮތް ގޮތަށް ކަމަށެވެ.
"އަޅުގަނޑުމެން ފޮނުވި ލިސްޓު އޮތް ގޮތަށް އެބޭފުޅުން ހާމަކުރީ،" އައްސަދު ވިދާޅުވި އެވެ.
އެމްއެމްޕީއާރްސީ ހިޔާނާތުގެ ލިސްޓާ ގުޅޭ ގޮތުން އައްސަދު ވިދާޅުވީ މިހާރު އޮތް ލިސްޓުގައި ހިމެނޭ ފަރާތްތަކަކީ "ޕާސަންސް އޮފް އިންޓްރެސްޓް" ލިސްޓެއް ކަމަށެވެ. އެހެން ގޮތަކުން ބުނާ ނަމަ ސުވާލުކޮށް ކަންތައްތަކެއް ސާފުކުރަން ބޭނުންވާ ބަޔެއްގެ ލިސްޓު ކަމަށާއި އެ މީހުންނަކީ ކުށްވެރިން ކަމުގައި ނުނިންމާ ކަމަށެވެ.
"އަޅުގަނޑުމެންގެ ލިސްޓަކީ ޕާސަންސް އޮފް އިންޓްރެސްޓް ލިސްޓެއް. އެއީ ކުށްވެރިން ކަމުގައި ނިންމުމަކީ އަޅުގަނޑުމެންގެ އިހުތިޔާރުގައި އޮތް ކަމެއް ނޫން،" އައްސަދު ވިދާޅުވި އެވެ.
މި މައްސަލައިގައި ދައުވާ ކުރުމާ މެދު ގޮތެއް ނިންމާނީ ސުވާލުކުރުމަށް ފަހު ލިބޭ މައުލޫމާތާއި ހެކީގެ މައްޗަށް ބިނާކޮށެވެ. އަދި އެންޓި ކޮރަޕްޝަން ކޮމިޝަނާއި ފުލުހުން އަދި އެސެޓް ރިކަވަރީ ކޮމިޝަން ގުޅިގެން ކުރަމުންދާ މަސައްކަތަކީ އެ ލިސްޓުން ދައުވާ ކުރާނެ ބަޔަކު ދެނެގަތުމުގެ މަސައްކަތް ކަމަށް އައްސަދު ވިދާޅުވި އެވެ.
އެއަށްފަހު އެ މައްސަލައިގައި ދައުވާކުރަން ފޮނުވަން ޖެހޭ ބަޔެއްގެ މައްޗަށް ދައުވާކުރަން ފޮނުވާނެ ކަމުގެ ޔަގީންކަން އޭނާ އެރުވި އެވެ.
ރައްޔިތުންގެ މަޖިލިހުން ހިޔާނާތުގެ ލިސްޓު އާންމުކުރީ، އެ ލިސްޓު އާންމުކުރަން މަޖިލިހަށް ޕްރެޝަރު ބޮޑުވެފައިވަނިކޮށެވެ. މީގެ ކުރިން ރަސްމީ އެއްވެސް އިދާރާއަކުން ލިސްޓު ހާމަކޮށްފައެއް ނުވެ އެވެ.
އެސެޓް ރިކަވަރީ ކޮމިޝަނުން އެ ލިސްޓު އާންމު ނުކުރި ސަބަބާ ގުޅޭ ގޮތުން އައްސަދު ވިދާޅުވީ "ލިސްޓު ހާމަނުކޮށް މަސައްކަތް ކުރަމުން ދިޔައީ މަސައްކަތް ކުރިޔަށް ދާތީ" ކަމަށެވެ.
ރައްޔިތުންގެ މަޖިލީހުން އާންމުކޮށްފައިވާ ލިސްޓްގައި ދައުލަތުގެ މަގާމުތަކުގައި ތިބި 119 ވަނަ މީހެއްގެ ނަން ހިމެނެ އެވެ. އޭގެ ތެރެއިން އައްޔަންކޮށްފައިވާ މަގާމުތަކުގައި ތިބި މީހުން މަގާމުތަކުން ވަކިކުރަން މަސައްކަތް ފެށުމަށް ކޮމިޓީން ވަނީ ނިންމާފަ އެވެ.
އަދި، އިންތިހާބީ މަގާމުތަކުގައި ތިބި މީހުންނަކީ އަމިއްލައަށް އިސްތިއުފާ ދިނުމުން ނޫނީ ހުކުމެއް ސާބިތުވެގެން ނޫން ގޮތަކަށް ވަކިވާނެ ބަޔަކަށް ނުވާތީ، އެފަދަ މީހުންގެ މައްސަލަތައް އަވަސް ކުރުމަށް ކަމާބެހޭ އިދާރާތަކަށް ދެންނެވުމަށް ވެސް ކޮމިޓީން ވަނީ ނިންމާފަ އެވެ.
