ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް އަމާޒުކޮށް ދިން ހަމަލާގެ އަޑީގައި ތިބި މީހުން ހޯދައި އިންސާފުގެ ކުރިމައްޗަށް ގެންނާނެ ކަމުގެ ޔަގީންކަން ރައީސް އިބްރާހިމް މުހައްމަދު ސޯލިހު ދެއްވައިފި އެވެ.
ރައީސް ނަޝީދަށް އަމާޒުކޮށް އައިއީޑީއެއް ގޮއްވާލި މައްސަލާގައި މިހާތަނަށް އެކަމުގައި އަމަލީ ގޮތުން ބައިވެރިވި ކަމުގެ ތުހުމަތަށް ތިން މީހަކު ހައްޔަރުކޮށްފައިވާއިރު، ހަމަލާގެ ފަހަތުގައި ތިބި މީހުން ހޯދުމަށް ފުލުހުން ތަހުގީގު ދަނީ ހިންގަމުންނެވެ. މި ހަމަލާގައި ލިބުނު ޒަހަމްތަކަށް ރައީސް ނަޝީދު އަދިވެސް ގެންދަވަނީ ފަރުވާ ހޯއްދަވަމުންނެވެ.
ފިތުރު އީދު ދުވަހުގެ މުނާސަބަތުގައި ގައުމާ މުހާތަބު ކުރައްވަމުން ރައީސް ސޯލިހު ވިދާޅުވީ އެ ހަމަލާއަކީ، އެއްވެސް ހަމައަކުން ބަލައިގަނެވޭނެ އަމަލެއް ނޫން ކަމާއި އެއްވެސް މީހެއްގެ ފުރާނަ ދުއްވައިލުމަށް ހަމަލާއެއް ދިނުމަކީ، ކުޑަވެސް އިންސާނިއްޔަތުކަމެއް ހުރި މީހަކު ކުރާނެ ކަމެއް ނޫން ކަމަށެވެ.
"އެ ޒާތުގެ އަމަލުތަކުން، އެބަޔަކު ބޭނުންވާ އެއްވެސް މަގުސަދެއް، މާތް ﷲގެ އިރާދަފުޅުން މި ފަސްގަނޑުގައި ހާސިލެއް ނުވާނެ،" ރައީސް ވިދާޅުވި އެވެ.
ރައީސް ވިދާޅުވީ ގާނޫނުތައް ޓެރަރިސްޓުން ވަށައިލާނެ ކަމަށާއި އަދުލު އިންސާފު އަރައި ހަމަކުރާނެ ކަމަށެވެ. ރައީސް ނަޝީދަށް ދިން ހަމަލާއާ ގުޅިގެން މިހާރު ހައްޔަރުކޮށްފައިވާ ތިން މީހުންގެ މައްޗަށް މިނިވަން ތަހުގީގަކަށް ފަހު، އިންސާފުގެ ކުރިމައްޗަށް އެމީހުން ގެނެވޭނެ ކަމަށެވެ. އަދި، އެމީހުން އެ ކުރި އަމަލުތަކަށް އެމީހުން ޒިންމާދާރު ކުރުވޭނެ ކަމަށެވެ.
"މިއީ ހަމައެކަނި، މި ތިން މީހުންނާ ހަމައިން ނިމޭނެ ކަމެއް ކަމަކަށް އަޅުގަނޑު ނުދެކެން. މިކަމުގެ އަޑީގައި ތިބި ބަޔަކު ހޯދައި، އެބަޔަކު ވެސް އިރާދަކުރެއްވިއްޔާ އިންސާފުގެ ކުރިމައްޗަށް ގެންނާނަން." ރައީސް ވިދާޅުވި އެވެ.
މިފަދަ ދަށު ދަރަޖައިގެ ލާއިންސާނީ އަމަލުތަކުގެ ސަބަބުން، އިޖްތިމާއީ ގުޅުންތަކަށް ވެސް ވަރަށް ބޮޑަށް އެބަ އަސަރު ކުރާ ކަމަށާއި މުޖްތަމައުގެ ހަމަޖެހުމާއި އުފާވެރިކަން ގެއްލިގެންދާ ކަމަށެވެ.
"އީދު ފާހަގަކުރުމަށް، އިސްލާމް ދީނުގައި ކަނޑައަޅުއްވާފައި ހުރި ކަންކަމަށް ބަލާއިރު މުޅިންވެސް ފެންނަނީ، އެއް މުސްލިމަކު އަނެއް މުސްލިމަކަށް، އަދި އެއް އިންސާނަކު އަނެއް އިންސާނަކަށް، އޯގާތެރިވުމާއި އެހީތެރިވުމާއި، ހިތްހެޔޮކަން ފާޅުކުރުމާއި، އުފާވެރިކަމާއެކު ބައްދަލުކުރުމަށް މަގުފަހިކޮށްދޭ ކަންކަން." ރައީސް ވިދާޅުވި އެވެ.
